Nabala-balor Kani Jehova i Luluam Ira

1-2. Ngatta tumangi ittam?

MAGGA siminangi ka ngana. Nu karuan, tumangi ittam megafu ta sobra i ayayya tam. Awayya na gapa nga makalua ka nu egga i importante onu espesial nga nesimmu nikaw. Angngarigan na, turi ta neyana i abbimmu, nu meraddammammu i tadday nga gannug nga namagayayya niko, onu nakkasingakkamu uli na madukko nga kofummu kabalin na aru nga dagun.

² Ngem maruddu nga tumangi ittam megafu ta maraddam anna mazziga-riga ittam. Angngarigan na, baka tumangi ittam nu natakitan ittam ta kingngua na tadday. Baka gapa tumangi ittam ta nabayag ittam ngana nga mataki anna sumussussu i taki natun onu natayan ittam. Ta kunnatun ira nga situasion, baka matageno tam gapa i natageno ni profeta Jeremias turi ta zinaral na Babilonio ira i Jerusalem. Kinagi na: “Masiki-sikan i agi na danum nga maggafu ta matà . . . Tulu-tuloy nga mallua i matà, ari nga magiggimmang.”—Sila. 3:​48, 49.

3. Anni i matageno ni Jehova nu masingan na nga mazziga-riga i aripan na ira? (Isaias 63:9)

³ Ammu ni Jehova nu mamippiga ittam ngana nga siminangi megafu ta mariga nga situasion nga pappasa-pasattam. Ipasiguradu na Biblia nga masingi-singan ni Jehova kada egga i aripan na nga mazziga-riga anna ginnan na ittam nu maddaga-raging ittam nga makikurag sa. (Sal. 34:15) Ngem ari laman ittam nga iinnan anna gigginnan ni Jehova. Gitta na minaggiddu nga yama, matakitan yayya nu masingi-singan na nga tumangi i ana na. Yatutta kakayà na nga uffunan ittam.—Bibbigan i Isaias 63:9.

4. Anni i magigiammu tam ta karakter ira ta Biblia meyannung ta appana-panono ni Jehova?

⁴ Mabibbig tam ta Biblia i natageno ni Jehova turi ta siminatangi i aripan na ira anna nu kunnasi na ira nga inuffunan. Mammuattam yatun ta istoria da Hana, David, anna Patul Hezekias. Ngatta siminangi ira? Kunnasi ira nga inuffunan ni Jehova? Kunnasi makoffun i istoria da nu tumatangi ittam megafu ta maraddam ittam, natraydor ittam, onu awan ngana tu iddanama tam?

LULUA IRA MEGAFU TA DADDAM

5. Anni i natageno ni Hana megafu ta situasion na?

⁵ Aru i problema ni Hana yatutta naraddam yayya anna siminangi. I tadday ta problema na ay egga i tanakuan nga atawa na atawa na. I ngagan natun nga babay ay Penina anna ikala-kalussaw na si Hana. Awan gapa tu ana ni Hana, ngem aru i ána ni Penina. (1 Sam. 1:​1, 2) Megafu ta baug si Hana, ari nga magiggimmang si Penina nga insultowan yayya. Anni i matageno mu nu sikaw i egga ta situasion ni Hana? Sobra i daddam ni Hana yatutta “tumangi yayya anna ari nga kuman,” anna ‘kiteddammo i panageno na.’—1 Sam. 1:​6, 7, 10.

6. Anni i kingngua ni Hana tapenu mabanna-bannayan yayya?

⁶ Kunnasi nga nabanna-bannayan si Hana? I tadday nga nakoffun ta nisa ay i pinaggangay na ta tabernakulo nga sentro na kurug nga paddayaw. Awayya na nga “namegafu yayya nga nakimallo anna siminatangi” aranni ta pattallungan na patio na tabernakulo. Nakimemallo yayya kani Jehova: “Innammu i pazziga-riga na aripammu anna daddamman nà.” (1 Sam. 1:10b, 11) Kinagi ni Hana ta pakimallo i ngamin nga mataga-tageno na. Magga natakitan si Jehova turi ta nasingan na nga tumatangi si Hana. Para kani Jehova, iddeddu na tu ana nga babay si Hana yatutta kayà na yayya nga uffunan.

7. Kunnasi nga nabanna-bannayan si Hana kabalin na nga ikagi i ngamin nga mataga-tageno na kani Jehova?

⁷ Anni i natageno ni Hana kabalin na nga nipakimallo i ngamin nga mataga-tageno na anna kabalin nga ipasiguradu ta nisa na Atannang nga Pari nga si Eli nga matabbag i pakimallo na? Kagian na Biblia: “Nanaw ngana i babay anna kiminan, anna ari ngana nga narraddam i muka na.” (1 Sam. 1:​17, 18) Maski nu ari nga nanguli i mariga nga situasion ni Hana, nabanna-bannayan yayya. Nitalo na ngana i ngamin nga pakadammakkan na kani Jehova. Nasingan ni Jehova i mariga nga pappasa-pasan ni Hana, naginna na i paddaga-raging anna i pattangi na, yatutta inuffunan na si Hana tapenu makka-ana.—1 Sam. 1:​19, 20; 2:21.

8-9. Base ta Hebreo 10:​24, 25, ngatta ikagumattam nakuan i makistudy? (Innan gapa i letratu.)

⁸ I magigiammu tam. Mariga kari i pappasa-pasammu yatutta maraddam ka anna tumatangi? Baka natay i kafamiliam onu kofummu. Ta kunnatun ira nga situasion, gagangay laman nga kayà mu i magitetadday. Ngem nonopammu nakuan si Hana. Nabanna-bannayan yayya anna napagaram ta pinaggangay na ta tabernakulo. Magga mabanna-bannayakka gapa nu makistudy ka maski nu nababbannag ka ngana anna maraddam ka. (Bibbigan i Hebreo 10:​24, 25.) Ta study gare, makaginna ittam tu teksto ira ta Biblia nga mamagaram ta nittam. Yatun i usu-usan ni Jehova tapenu moffunan na ittam nga ari ngana pannonopan i gannug ira nga mamarraddam ta nittam. Makoffun yatun tapenu makontrol tam i mataga-tageno tam maski nu awan paga tu pangulian na situasiottam.

⁹ Ta study tam ira, makavulu tam i minangngikallo ira nga wawwaragi. Mapagaram ittam ta pangikavurung anna aya da ta nittam. (1 Tes. 5:​11, 14) Napakurug mismu yatun na special pioneer nga brother nga natayan tu atawa. Kagian na: “Adde sangawe, tumatangi ngà lagapa. Nu karuan lagu, magitubang ngà laman ta aggig tapus tumatangi ngà laman. Ngem talaga napasikan ngà ta study tam ira. Mabanna-bannayan ngà ta pamasikan na wawwaragi kunne na gapa ta komento da ira. Maski mavuru-vurung ngà onu maraddam nige na study, sonu egga ngà ngana tari, mappipia i panageno ku.” Nu makistudy ittam, usan ni Jehova i wawwaragi tam tapenu uffunan ittam.

10. Kunnasi tam nga maparigan si Hana nu fermi i daddam tam?

¹⁰ Nabanna-bannayan gapa si Hana turi ta kinagi na i ngamin nga mataga-tageno na kani Jehova ta pakimallo. Awayyam gapa nga ‘ipammakatalo ngamin i kavurungammu’ kani Jehova anna mattalo ka nakuan nga ginnan naka. (1 Ped. 5:7) Egga i tadday nga sister nga pinatay na akkoko ira i atawa na. Kunnaw i istorian na: “Mataka-taki i futù anna gitta na ari ngà ngana maka-recover. Ngem kada makimallo ngà ta minaggiddu nga Yamà ta langi nga si Jehova, mabanna-bannayan ngà. Egga ira i tiempo nga kakku ammu i kagiakku nisa, ngem malippawa na yatun. Nu fermi gapa i daddam ku anna i avvuru-vurukku, ikiddò ta nisa nga iddan nà tu imammo. Tapus insigida nga makkalma ngà anna makuà ngana i mawag nga balinakku tatun nga aggaw.” Nu ikagim gapa i ngamin nga pakavurungammu kani Jehova, matakitan yayya nu tumatangi ka gafu ta daddam mu anna malippawa na i taki nga mataga-tageno mu. Maski nu ari paga nga mawawan i problema nga mamarraddam nikaw, mabanna-bannayan naka ni Jehova anna uffunan naka tapenu mabbalin tu memammo i panageno mu. (Sal. 94:19; Fil. 4:​6, 7) Bala-balakkan naka gapa megafu ta matalo ka anna magatta-attam ka.—Heb. 11:6.

LULUA MEGAFU TA NATRAYDOR KA

11. Anni i natageno ni David megafu ta mariga ira nga nappasan na?

¹¹ Aru i inattamman ni David nga mariga nga situasion nga namatangi sa. Aru i mangikalussaw ta nisa anna trinaydor paga lagu yayya danuri na pattalakkan na. (1 Sam. 19:​10, 11; 2 Sam. 15:​10-14, 30) Mittan, kuruga mariga i situasion ni David yatutta nitura na: “Ta nepallo nga daddam ku, makkakafi ngà ngana; kada gabi i aggiddak-ku, ay mabasa-basa ta lulua; ta pattangi-tangi ku, mabasasso i fungak-ku gapa.” Ngatta kunnatun i natageno ni David? Kagian na: “Megafu ta pamatangi niakan na kokontrà.” (Sal. 6:​6, 7) Natakitan si David ta marake nga kingngua na tanakuan ta nisa yatutta siminatangi yayya.

12. Base ta Salmo 56:​8, ta anni nga kumbinsidu si David?

¹² Maski nu aru i mariga nga nappasa-pasan ni David, kumbinsidu yayya nga iddeddu yayya ni Jehova. Nitura na: “Ta pattangi-tangi ku, i YAFU ay en-nà ginnan.” (Sal. 6:8) Egga gapa i makasta nga nitura ni David ta Salmo 56:8. (Bibbigan.) Nu bibbigattam yatun nga nitura na, mas malippawa tam i aya anna pangikavurung ni Jehova. Kinagi ni David nga gitta na ipappan ni Jehova i lulua na ira onu itura na yatun ta tadday nga libru. Siguradu si David nga ammu ni Jehova i taki nga mataga-tageno na anna daddaddamman na yatun. Kumbinsidu si David nga ari laman nga ammu na minaggiddu nga Yama na ta langi nu anni i pappasa-pasan na. Ammu na gapa nu kunnasi nga nafektan si David tatun.

13. Nu natakitan ittam onu natraydor ittam, anni i makasta nga daddammattam? (Innan gapa i letratu.)

¹³ I magigiammu tam. Mataka-takitakka kari megafu ta kingngua na tanakuan onu inilloku anna trinaydor naka na pattalakkammu? Baka marigi-rigatakka megafu ta ariammu nga ekspektan nga massina kamu na nobiom onu nobiam onu na atawam. Awayya na gapa nga nagimmang nga masserbi kani Jehova i kafamiliam onu kofummu. Nakilalaki i atawa na tadday nga brother tapus pinanawan na yayya. Kagian na: “Nakaddagan ngà ta nesimmu. Gitta na awan tu sesserbì, naraddam ngà, anna nappoporay.” Nu marigi-rigatakka megafu ta inilloku daka onu natakitakka ta kingngua na tanakuan, daddammammu nakuan nga ari naka vuluvuga panawan ni Jehova. Istorian na brother: “Nanono ku nga awayya na tu mabbalin nga ari nga matalo ta nittam i tolay, ngem kanayun nga mapattalakkattam si Jehova. Maski gafu anni i mesimmu, kanayuttam yayya nga kavulu. Ari na vuluvuga panawan i matalo ta nisa.” (Sal. 37:28) Daddammammu gapa nga mas dakal i pangaya ni Jehova nikaw anne ta pangaya nikaw na maski sinni nga tolay. Kurug tu mataka-taki nu inilloku naka na tadday. Ngem ari vuluvuga nga afektan natun i kadakal na pangaya ni Jehova nikaw. (Roma 8:​38, 39) Yaw i punto: Maski nu illokuan onu traydoraddaka, iddeddu naka na Yamam ta langi.

14. Anni i ipasiguradu ta nittam na Salmo 34:18?

¹⁴ Nu marigi-rigatan ittam megafu ta natraydor ittam, mabanna-bannayan ittam gapa ta kinagi ira ni David ta Salmo 34:18. (Bibbigan.) Kunnasi nga uffunan ni Jehova ‘danuri i awan tu iddanama da’ megafu ta grabe nga natakitan ira? “Aranni” si Jehova ta kada tadday nittam. Gitta na i magana nga kemmikan na anna banna-bannayan na i tumatangi nga ana na. Nu marigi-rigatan ittam gafu ta inilloku onu pinanawan ittam na iddeddu tam, matakitan si Jehova anna uffunan na ittam insigida. Kakayà na nga bannayan danuri nakkafi i nono da anna marigi-rigatan. Iddan na ittam gapa tu iddanama tapenu moffunan na ittam nga attamman i pappasa-pasattam.—Isa. 65:17.

LULUA MEGAFU TA AWAN NGANA TU IDDANAMA NA SITUASIOMMU

15. Anni nga situasion i namatangi kani Hezekias?

¹⁵ Si Patul Hezekias na Juda ay nattaki tu grabe turi ta 39 anios yayya. Nipakannammu ni profeta Isaias i mensahe ni Jehova nga ipatay ni Hezekias i taki na. (2 Pat. 20:1) Gitta na awan ngana tu iddanama na situasion ni Hezekias. Turi ta naginna na yatun, siminatangi yayya anna nakimemallo kani Jehova.—2 Pat. 20:​2, 3.

16. Anni i kingngua ni Jehova megafu ta pattatangi anna pakimemallo ni Hezekias?

¹⁶ Megafu ta pattatangi anna pakimemallo ni Hezekias, nikallo yayya ni Jehova anna kinagi na sa: “Naginnà i pakimallo mu. Nasingakku i luluam ira. Pammapiattaka.” Gukaban ni Isaias, nipromesa ni Jehova kani Hezekias nga mapiddu i inango na anna paliaran na i Jerusalem kontra ta Asiriano ira.—2 Pat. 20:​4-6.

17. Kunnasi ittam nga uuffunan ni Jehova nu grabe i taki tam? (Salmo 41:3) (Innan gapa i letratu.)

¹⁷ I magigiammu tam. Ari ngana kari mammapia i taki mu yatutta gitta na awan ngana tu iddanama na situasiommu? Makimallo ka kani Jehova, maski paga itangi mu i ngamin sa. Ipasiguradu ta nittam na Biblia nga ta ngamin nga pappasa-pasattam, banna-bannayan ittam na “minaggallallo nga Yama anna Dios nga paggafuan na ngamin nga uffun.” (2 Cor. 1:​3, 4) Ari tam ekspektan nga alsan ni Jehova i ngamin nga problema tam ta maddaggun. Ngem makapattalo ittam nga uffunan na ittam. (Bibbigan i Salmo 41:3.) Usan ni Jehova i masanto nga espiritu na tapenu iyawa i sikan, sirib, anna imammo nga kawagattam tapenu makapagattam ittam. (Prov. 18:14; Fil. 4:​13, NW) Banna-bannayan na ittam gapa gukaban na pangiyawa tu iddanama nga duttal saw i tiempo nga awan ngana tu mattaki.—Isa. 33:24.

18. Anni nga teksto i mamanna-bannay nikaw nu kitazziga i pappasa-pasammu? (Innan i kahon nga “Makapabannay ira nga Teksto nu Tumangi Ka.”)

¹⁸ Nabanna-bannayan si Hezekias ta kinagi ira ni Jehova. Mabanna-bannayan ittam gapa ta kagian nittam ni Jehova ta Biblia. Nipetura na yatun ira nga makapabannay nga uvovug tapenu massikan i nono tam nu kitazziga i pappasa-pasattam. (Roma 15:4) Tadday nga sister ta West Africa i kanayun nga tumangi namegafu turi ta nammuan na nga egga i cancer na. Istorian na: “Isaias 26:3 i tadday ta teksto nga talaga mamanna-bannay niakan. Maski nu maruddu nga ari tam kontroladu i problema ira nga pappasattam, ipasiguradu natun nga teksto nga meyawa ni Jehova i imammo nga kawagattam tapenu makontrol tam i reaksiottam ta problema tam.” Egga kari i teksto nga kakayà mu anna mamanna-bannay nikaw nu kitazziga i pappasa-pasammu onu nu gitta na awan ngana tu solusion na problemam?

19. Anni i makasta nga iinnaggattam ta mappange?

¹⁹ Mattolay ittam ngana ta ultimu nga parte na pangurianan ira nga aggaw, yatutta ekspektattam nga mas umaru i situasion nga mamatangi ta nittam. Ngem gitta na nagigiammu tam kani Hana, David, anna Patul Hezekias, masingi-singan ni Jehova kada tumangi ittam anna matakitan yayya megafu tatun. Nabala-balor kani Jehova i lulua tam ira. Nu mariga i pappasa-pasattam, ikagi tam nakuan i ngamin nga mataga-tageno tam kani Jehova ta pakimallo. Ari tam nakuan gapa isisina i baggi tam ta minaggiddu ira nga wawwaragi tam. Kanayun ittam nakuan nga mabbibbig tu Biblia tapenu mabanna-bannayan ittam ta uvovug ira ni Jehova. Makasiguradu ittam nga bendisionan ittam ni Jehova nu magattam ittam anna mattalupaddian nga matalo. Nelagum tatun i makakkasta nga promesa nga duttal saw i tiempo nga funatan na i ngamin nga lulua tam megafu ta maraddam ittam, natraydor ittam, anna awan ngana tu iddanama na situasiottam. (Nep. 21:4) Tatun saw nga tiempo, i rason ngana laman na pattangi tam ay megafu ta ayayya tam.