Sitaw Talaga Nakadepende i Mappange Mu?
Aru nga tolay i mangurug nga kontroladu na ari masingan nga fuersa i mappange da. Megafu tatun nga kuru-kurugadda, egga ira i madduruma nga kukukuadda tapenu makkasta i pattoleda.
I KURU-KURUGAN NA ARU
ASTROLOHIYA: Mangurug i karuan nga nakadepende i mappange na tadday nga tolay ta posision na bitun ira ta keyana na. Mabbibbig ira tu horoscope tapenu mammuadda i mesimmu ta nira anna tapenu ammu da i kuadda.
FENG SHUI: Mangurug i karuan nga nu ayusadda i baleda ta partikular nga disenio, makkasta i pattolay da. Kinagi ni Lo Winga nga taga-Hong Kong, “Kinagi nio na tadday nga feng shui expert nga nu mangipay ngà tu espesial nga kristal ta espesipiko nga lugar ta chendà, dumakal i kità.”
PADDAYAW TA GINAFUAN IRA: Mangurug gapa i karuan nga mawag tu dayawadda i natay ira nga ginafuadda onu i sinan-dios ira tapenu maproteksionan anna mabendisionan ira. Kagian ni Van nga taga-Vietnam, “Nangurug ngà nga nu dayawakku i ginafuakku ira, makkasta i pattolè anna na ána ku sangawe anna ta mappange.”
REINKARNASION: Aru i mangurug nga nu matay i tadday nga tolay, meyana uli yayya tapus pakatotoli laman yatun nga mesimmu. Kurugadda nga resulta kanu na kinikkingngua da ta nappasa nga pattoleda i mapia onu marake nga mesissimmu ta nira ta maddaggun.
Aru i makkagi nga ariadda mabba kurugan danatun. Ngem makkonsulta lapa ira ta magipalag, horoscope, bola nga kristal, tarot card, anna tanakuan paga. Abbattadda nga mammuadda i mappange da nu kuadda danatun.
ANNI I RESULTA NA?
Nakkasta kari i pattolay anna mappange danuri i nangurug ira tatun?
Kunnaw i ekspiriensa ni Hào nga taga-Vietnam. Nangusa yayya tu astrolohiya, feng shui, anna naddayaw yayya ta ginafuan na ira. Nakkasta kari i pattolena? Kinagi na, “Nalugi i negosiò, nelammag ngà ta gatu, nakkaproblema i familià, anna nadepres ngà.”
Nangurug gapa si Qiuming nga taga-Taiwan ta astrolohiya, reinkarnasion, suerte, feng shui, anna paddayaw ta ginafuan ira. Pinannonopan na tu mapia danatun ira nga kuru-kurugan na. Kunna: “Na-realize ku nga makkorontra anna magulu danatun ira nga tuttuddu anna kostumbre. Kanayun nga ugal i kagian na horoscope. Ta reinkarnasion gapa, kunnasim gafu nga mauli onu mapakasta i tumunug nga pattolem nu kammu mabba matandaanan i nappasa nga pattolem?”
“Na-realize ku nga makkorontra anna magulu danatun ira nga tuttuddu anna kostumbre.”—QIUMING, TAIWAN
Napakurug ni Hào, Qiuming, anna na aru paga nga ari tu nakadepende i mappange tam ta suerte, ta bitun ira, ta natay ira nga ginafuattam, onu ta reinkarnasion. Kayà na kari kagian nga awan tu makua tam ta mappange tam?
Para ta aru, makkasta kanu i mappange da nu atannang i ginigiammu da anna aru i kuartu da. Anni i nesimmu ta karuan nga kunnatun i prayoridad da?
a Natalian i karuan nga ngagan taw nga artikulo anna ta tumunug ira.
b Malegan yaw ta Masanto nga Biblia ta Galacia 6:7. Kagitta gapa yatun na popular nga akkagianan ta karuan nga lugar nga Mammula ka tu melon tapenu magapit ka tu melon; mammula ka tu vuku-vukal tapenu magapit ka tu vuku-vukal.