Egga Kari i Mapammakatalakkan nga Giya ta Makasta nga Mappange?

Nagigiammu tam ta nappollu ira nga artikulo nga mattalo i totolay ta destiny, edukasion, kuartu, anna pagangngua tu mapia tapenu makkasta i mappange da. Nu mattalo ittam tatun ira, gitta na mangusa ittam tu mali nga mapa tapenu makadde ittam ta angngayattam. Kayà na kari kagian nga awan ngana tu mapammakatalakkan nga giya para ta mappange? Ari gapa!

I KAPIANAN NGA PAGGAFUAN NA GIYA

Nu maddesision ittam, gagangay ngana nga makkiavu ittam ta mas kaka anna mas ma-uto nittam. Egga gapa i mas kaka anna mas ma-uto anne ta nittam nga makeyawa ta mapammakatalakkan nga giya para ta mappange. Mabibbig tam i tabarang na ta libru nga magalan tu Biblia nga namegafu nga netura 3,500 dagun ngana i nappasa.

Ngatta makapattalo ka ta Biblia? Megafu ta i Autor naw i pinakakaka anna pinakama-uto ta uniberso. Yayya i “Ollu ta Aggaggaw” anna ‘mannanayun nga Dios gari anna adde noka.’ (Daniel 7:9; Salmo 90:2) Yayya i “Namaratu ta langi, i kurug nga Dios, i nagangngua ta davvun.” (Isaias 45:18) Nipakannammu na ta nittam nga Jehova i ngagan na.—Salmo 83:18, NW.

Awan tu nakagi ta Biblia nga mas mapia i tadday nga kultura onu lahi megafu ta naggafu yaw ta Namaratu ta ngamin nga totolay. Ari nga maddana i tabarang na anna pammakapianan yaw na ngamin nga totolay. Mabibbig yaw ta aru nga lengguahe anna yaw nga libru i netaneg ta pinaka-aru nga kopia.a Mabibbig gafu yaw na ngamin nga totolay tapenu megiya ira. Kunnatun gapa i kagian na Biblia:

“I Dios ay arian na nga padduma-ruman i pangikakua na ta totolay. Ta alawatan na i sinni laman nga matunung anna minakkimoray sa, maski nu anni nga rasa i naggafuan na.”—KINGNGUA 10:34, 35.

Kagitta na mammagana nga mangaya anna manguffun ta ána da, si Jehova nga Dios ay minaggiddu nga Yama nga maya nga manguffun ta nittam gukaban na Uvovug na, i Biblia. (2 Timoteo 3:16) Makapattalo ka ta Uvovug na megafu ta yayya i namaratu ta nittam anna ammu na nu anni i mamagayayya ta nittam.

MAKAPATTALO ITTAM TA BIBLIA

Masingi-singattam ngana nga mesissimmu i kinagi na Biblia ma-2,000 dagun ngana i nappasa, yayya nga makapattalo ittam ta kinagi na meyannung ta mappange.

I KINAGI NA BIBLIA NGA MESIMMU

“Maggegerra noka i nasa-nasion tuange gapa ta pappatulan ira. Egga noka i masikan ira nga lunig, bisin anna palakag nga tulu-tulagan [onu, kappatay nga taka-taki] ta madduma-ruma nga lugar.”—LUCAS 21:10, 11.

I KINAGI NA BIBLIA NGA UGALI NA TOTOLAY

“Duttal noka i ziga-riga ta pangurianan ira nga aggaw. Tatun ira noka nga aggaw, ayatan na totolay i baggi da laman, anna kuartu laman i agga-nono da. Palagopog noka ira, minappakatannang, minangnguyu-uyaw, ari nga manguru-kurug ta magana da, ariad-da nga ammu i mabbala-balo, anna awan tu agganassing da ta Dios. Ari tu yaw laman: manattazzi paga noka ira, awan tu allo da ta ikattolay da, mamara-parake ira, ariad-da nga matangngallan i baggi anna nono da, kitapporay, anna ikalussaw da noka i mapia. Ari laman tu yatun: traidor paga noka ira, ariad-da nonopan i kuad-da, atatannang i paningannad-da ta baggi da, anna i ala-alerad-da noka i pappaga-pagayaya laman anne ta Dios.”—2 TIMOTEO 3:1-4.

Anni i makagim ta eksakto nga mesissimmu i kinagi na Biblia meyannung ta kaggawattam? Siguradu nga umanugu ka ta kinagi ni Leung nga taga-Hong Kong: “Nabayag ngana nga netura i profesiya ira ta Biblia. Imposible ta tolay nga ammu na danatun ira nga eksakto nga mesimmu. Siguradu nga naggafu i Biblia ta tadday nga mas makawayya anne ta nittam.”

Aru ngana nga profesiya ta Biblia i natuppal.b Pakurugan natun nga Uvovug na Dios i Biblia. Kinagi ni Jehova: “Sakan i Dios anna awan tu kagittà. Ta gafa-gafu paga, niprofesiyà ngana i mesimmu.” (Isaias 46:9, 10) Makapattalo ka gafu ta kagian na Biblia meyannung ta mappange.

GIYA NGA PAMMAKAPIANATTAM SANGAWE ADDE TA MANNANAYUN

Pammakapianammu nu tuttulammu i tabarang ira na Biblia. Innattam i karuan nga tabarang na.

BALANSE NGA PAGIMAMMA TA KUARTU ANNA TRABAHU

“Mas makasta i tanga-kamo nga pagibannag anne ta dua-kamo nga pabbabbannag anna paddaddag ta paddag.”—ECLESIASTES 4:6.

FAMILIA

“Mawag tu ayatan na lallaki i gi-attawad-da ta kunna pangaya da ta baggi da laggapa. Mawag gapa tu i babbay ay ikakua da i gi-attawad-da.”—EFESO 5:33.

RELASION TA TOTOLAY

“Ari ka nga mavvuru-vurung anna mappoporay, ta danaw ay parattalad-da laman i marakay.”—SALMO 37:8.

Nu tuttulammu i kagian na Biblia, pammakapianammu yatun sangawe anna makkasta i mappange mu. Mabibbig tam ta Biblia i makakkasta ira nga promesa na Dios ta mappange. Angngarigan na:

IMAMMO ANNA SEGURIDAD

“Mattolay ira ta imammo nga mannanayun.”—SALMO 37:11.

EGGA I BALAY ANNA MAKAN NA NGAMIN

“Mangipataddag ira tu babalay anna maddian ira tatun, anna mammula ira tu ubas anna kanadda i vunga na.”—ISAIAS 65:21.

AWAN NGANA TU MATTAKI ONU MATAY

“Awan ngana noka tu matay, onu maraddam, onu tumangi-tangi, onu magattam ta taki.”—NEPAKANNAMMU 21:4.

Anni i mawag nga kuammu tapenu malawa mu yatun ta mappange? Innan i tumunug nga artikulo.

a Para ta detalye meyannung ta translation anna ketaneg na Biblia, umay ta www.pr418.com/ibg anna innan ta TUTTUDDU NA BIBLIA > HISTORIA ANNA I BIBLIA.

b Para ta aru paga nga detalye, innan i kapitulo 9 na libru nga Ang Bibliya—Salita ng Diyos o ng Tao? nga nipublisa na Saksi ira ni Jehova. Available yatun online ta www.pr418.com/tl. Innan ta LIBRARY > AKLAT AT BROSYUR.