Iddeddukan Naka na Dios
I BIBLIA i paggafuan na kakastan nga tabarang megafu ta naggafu yatun ta Dios. Ari yaw nga libru ta medisina, ngem makaduffun yaw tapenu marubang tam i mariga ira nga situasion, i magulu nga nono, i mataki nga mataga-tageno tam, anna i pisikal anna mental ira nga taki.
I pinaka-importante, ipasiguradu ta nittam na Biblia nga malippawa na Namaratu nittam, si Jehova nga Dios,a i nononopattam anna i mataga-tageno tam anne ta maski sinni. Kakayà na ittam nga duffunan ta anni laman nga problema tam. Yaw i dua laman ta makapabannay ira nga teksto ta Biblia:
“Aranni i YAFU ta makafi i nono da; arian na nga pagurayan danuri i awan tu iddanama [da].”—SALMO 34:18.
“Sakan, si Jehova nga Dios mu, agga-tammi ku i ziwanan nga limam, i makkakkagi nikaw, ‘Ari ka maganassing. Uffunattaka.’”—ISAIAS 41:13.
Kunnasi ittam gafu nga maduffunan ni Jehova nu egga i mental nga taki tam onu na iddeddukattam ira? Mammuammu ta tumunug ira nga artikulo nga aru nga uffun i iyayawa ni Jehova megafu ta iddeddukan na ittam.
a Jehova i ngagan na Dios.—Salmo 83:18, NW.