I Magigiammu Tam ta Ultimu nga 40 nga Aggaw ni Jesus ta Davvun

1-2. Anni i nesimmu ta dua nga disipulos ni Jesus habang paumay ira ta Emmaus?

TURI TA Nisan 16, 33 C.E., maraddam anna maganassing i disipulos ni Jesus. Nanaw ta Jerusalem i dua ta nira anna paumay ira ta Emmaus, tadday nga bario nga 11 kilometro i karayyu na ta Jerusalem. Nakkafi i nono natun nga dua nga lalaki megafu ta napapatay si Jesus nga Yafu da. Nawanan ira tu pag-asa para ta kuan nakuan na Mesias. Ngem makaddag ira ta tumunug nga mesimmu.

² Egga i tadday nga lalaki nga minaranni nira tapus nevulu yayya ta nira. Niyistoria da nisa i marake ira nga nesimmu kani Jesus. Tapus gavva nga nipakiyuvovug na lalaki i gannug nga ari da vuluvuga nga makattaman. “Namegafu ta nitura ira ni Moises tuange ta nitura na ngamin nga profeta ira,” nipakanawag na nu ngatta mawag nga mazziga-riga anna matay i Mesias. Ta pakadde da tallu ta Emmaus, egga i kingngua natun nga lalaki nga nangipanono ta disipulos nga yayya i napaginnolay nga si Jesus! Magga magayayya i disipulos ta nammuadda nga matolay i Mesias!—Luc. 24:​13-35.

3-4. Anni i nesimmu ta disipulos ni Jesus, anna anni i gigiammuattam taw nga artikulo? (Kingngua 1:3)

³ Ta ultimu nga 40 nga aggaw ni Jesus taw ta davvun, namippiga yayya nappasingan ta disipulos na.a (Bibbigan i Kingngua 1:3.) Megafu tatun, ari ngana nga maraddam anna maganassing i tagatuttul na ira. Magayayya ngana ira, sigga-komfiansa, anna magutu nga mallayyagayya anna manuddu meyannung ta mapia nga dumug na Pappatulan.

⁴ Mammakapia ittam nu gigiammuattam i kingngua ira ni Jesus tatun nga tiempo. Gigiammuattam taw nga artikulo nu kunnasi inusa ni Jesus yatun nga tiempo (1) tapenu pagaramman i disipulos na, (2) tapenu uffunan ira nga mas malippawa i Katurakan, anna (3) tapenu sanayan ira nga tangngawan i mas dakal ira nga responsibilidad. Ammuattam nu kunnasi tam nga maparigan yatun ira nga kingngua ni Jesus.

PAGARAMMAN I TANAKUAN

5. Ngatta kawagan na disipulos ni Jesus i pamagaram?

⁵ Kawagan na disipulos ni Jesus i pamagaram. Pinanawan gare na karuan nira i baleda, i familia da, anna i negosio da ira tapenu mabbalin tu tagatuttul ni Jesus. (Mat. 19:27) Nefefera gapa i karuan megafu ta nabbalin ira tu disipulos. (Juan 9:22) Kingngua da yatun ira nga sakrifisio megafu ta kinurug da nga si Jesus i nepromesa nga Mesias. (Mat. 16:16) Ngem turi ta napapatay si Jesus, naraddam ira anna nawanan ira tu pag-asa.

6. Anni i kingngua ni Jesus kabalin na nga mapaginnolay?

⁶ Turi ta nasingan ni Jesus nga maraddam i disipulos na, ninono na kari nga makafi i espiritualidad da? Ari. Malippawa na nga gagangay laman nga reaksion yatun megafu ta natayan ira. Yayya nga ta mismu nga aggaw nga napaginnolay yayya, insigida na ira nga pinagaram. Angngarigan na, nappasingan yayya kani Maria Magdalena turi ta sinatangitan yayya ni Maria ta attanamman. (Juan 20:​11, 16) Nappasingan gapa yayya ta dua nga disipulos kagitta na nakagi ta gafu naw nga artikulo. Tapus nappasingan yayya kani apostol Pedro. (Luc. 24:34) Anni i magigiammu tam tatun nga kingngua ni Jesus? Ammuattam labbi i nesimmu turi ta nappasingan yayya kani Maria Magdalena.

7. Base ta Juan 20:​11-16, anni i nasingan ni Jesus nga kukukuan ni Maria, anna anni i kingngua ni Jesus megafu tatun? (Innan gapa i letratu.)

⁷ Bibbigan i Juan 20:​11-16. Ta ummumma na Nisan 16, egga i matalo nga babbay nga minay ta niketanamman ni Jesus. (Luc. 24:​1, 10) Tadday tatun si Maria Magdalena. Ta pakadde ni Maria ta attanamman, nasingan na nga awan tu naddian natun. Nakkara-karela yayya tapenu ikagi yatun kani Pedro anna kani Juan. Tapus nakkara-karela yatun nga dua nga lalaki paumay ta attanamman anna ziminaddan gapa si Maria. Turi ta nasingan na lallaki nga awan tu naddian na attanamman, limibbe ira. Ngem nappabattang si Maria tapus siminatangi yayya. Ari na nga ammu tu inninnan balo yayya ni Jesus. Nasingan ni Jesus i pattatangi naw nga matalo nga babay anna kayà na yayya nga banna-bannayan. Yatutta nappasingan yayya kani Maria anna egga i simple nga kingngua na tapenu mapagaram yayya. Kinibbida na yayya anna niddan na yayya tu importante nga annungan. Mawag tu ikagi ni Maria ta wawwagi ni Jesus nga naginnolay si Jesus.—Juan 20:​17, 18.

8. Kunnasi tam maparigan si Jesus?

⁸ Kunnasi tam maparigan si Jesus? Mas mapagaram tam i wawwaragi nga itulu-tuloy da i passerbi da kani Jehova nu ammu tam i pappasa-pasadda. Makipattageno ittam nakuan ta nira anna banna-bannayattam ira kagitta na kingngua ni Jesus. Kunnatun i naekspiriensa ni Sister Jocelyn nga natay i wagi na nga babay ta aksidente. Kagian na, “Piga vulan nga maraddam ngà.” Ngem tadday nga magatawa i nagimbita nisa ta baleda. Nakipattageno ira anna gininna da yayya tu mapia. Tapus nipasiguradu da ta nisa nga iddeddu yayya ni Jehova. Istorian ni Jocelyn, “Awan ngana tu awa-awayyà. Gittà i malallaggabban ta bebay habang masikan i bagiu. Ngem inusa ni Jehova yatun nga magatawa tapenu ipay nà ta life boat. Inuffunaddà tapenu manoli i ganas ku ta passerbi kani Jehova.” Mapagaram tam gapa i tanakuan nu ginnattam ira tu mapia habang ivuvvu da i mayan na futu da. Nu kunnatun i kuattam, mabanna-bannayattam ira anna moffunattam ira tapenu metulu-tuloy da i passerbi da kani Jehova.—Roma 12:15.

UFFUNAN I TANAKUAN NGA MAS MALIPPAWA I BIBLIA

9. Anni i prinoblema na disipulos ni Jesus, anna kunnasi na ira inuffunan?

⁹ Inalawa na disipulos ni Jesus i Uvovug na Dios anna nikagumadda nga parulattan yatun. (Juan 17:6) Ngem ariadda malippawa nu ngatta natay si Jesus nga kagitta na kriminal. Ammu ni Jesus nga nadduda ira, ari nga megafu ta kurang i pangurug da, nu ari lagu, megafu ta ariadda paga nga malippawa i Katurakan. (Luc. 9:​44, 45; Juan 20:9) Yatutta sinudduan ira ni Jesus tapenu mas malippawa da yatun. Innattam nu kunnasi na nga kingngua yatun turi ta nappasingan yayya ta dua nga disipulos na ta dalan paumay ta Emmaus.

10. Kunnasi nga kinumbinsi ni Jesus i disipulos na nga yayya talaga i Mesias? (Lucas 24:​18-27)

¹⁰ Bibbigan i Lucas 24:​18-27. Base tatun, ari insigida nga kinagi ni Jesus ta dua nga lalaki nu sinni yayya. Nappakkiavu labbi yayya. Ngatta? Kayà na gare nga ikagi na disipulos na i nononopan anna mataga-tageno da. Kunnatun mismu i kingngua da. Inistoria da nisa nga iniddanamadda nga ipaliag ni Jesus i Israel ta panazza-tazzi na Romano ira. Tapus kabalidda nga inistoria yatun nga pakavurungadda, inusa ni Jesus i Katurakan tapenu uffunan ira nga mas malippawa i nesimmu.b Turi ta gabi ngana, nevulu gapa si Jesus ta tanakuan paga nga disipulos tapenu ipakanawag ta nira yatun nga nesimmu. (Luc. 24:​33-48) Anni i magigiammu tam tatun?

11-12. (a) Anni i magigiammu tam ta pangituddu ni Jesus ta kinakurug ira ta Biblia? (Innan gapa i letratu ira.) (b) Kunnasi nga inuffunan na tadday nga brother i Bible study na?

¹¹ Kunnasi tam maparigan si Jesus? Nu tudduammu i Bible studym ira, mangusa ka tu mepangngo ira nga pakkiavu tapenu mammuammu i nononopan anna mataga-tageno da. (Prov. 20:5) Nu malippawa mu ngana i mataga-tageno da, ituddum nira nu kunnasi magaleg tu espesipiko nga teksto nga makoffun ta situasiodda. Ariammu ira diktan nu anni i kuadda. Mas makasta nu uffunammu ira nga mas malippawa i Biblia anna masingan nu kunnasi da nga meyaplika i prinsipio ira. Kunnatun i nesimmu kani Brother Nortey nga taga-Ghana.

¹² Nappa-Bible study si Nortey turi ta 16 i dagun na. Ngem ari nabbayag, kinokkontra yayya na familia na. Ngatta nitulu-tuloy lagapa ni Nortey i pab-Bible study na? Inusa na mangi-Bible study ta nisa i Mateo kapitulo 10 tapenu ipakanawag ta nisa nga mapersigi i kurug ira nga Cristiano. Kagian ni Nortey, “Turi ta napersigi ngà, nakumbinsi ngà nga nalegakku i kinakurug.” Inusa gapa na mangi-Bible study nisa i Mateo 10:16. Inuffunan na si Nortey nga malippawa nga mawag tu magimmugug anna marespeto yayya nu ipakanawag na i kuru-kurugan na ta familia na. Turi ta na-baptize ngana si Nortey, kayà na i mappayunir. Ngem ekspektan na yama na tu makkolehio yayya. Imbes tu diktan na si Nortey, nangusa i mangi-Bible study nisa tu pakkiavu ira tapenu makanono si Nortey tu prinsipio ira ta Biblia anna makangngua yayya tu fustu nga desision. Anni i resulta natun? Nappayunir si Nortey. Pinapanaw yayya na yama na ta baleda. Anni i natageno ni Nortey tatun ira nga nesimmu? Kagian na, “Kumbinsidu ngà nga fustu i desisiokku.” Nu uffunattam i tanakuan nga mas malippawa i Biblia, moffunattam ira nga malladda i pangurug da, anna metulu-tuloy da i passerbi da kani Jehova.—Efe. 3:​16-19.

SANAYAN I BROTHER IRA TAPENU MABBALIN IRA TU ‘REGALU TA TOTOLAY’

13. Anni i kingngua ni Jesus tapenu masiguradu na nga ari mapagurayan i trabahu nga nipakua na Yama na? (Efeso 4:8)

¹³ Ta kegga ni Jesus ta davvun, natuppal na i ngamin nga nipakua na Yama na ta nisa. (Juan 17:4) Ngem ari nga nanono ni Jesus i kunnaw, ‘Nu kayà mu tu ari ka makkaproblema, siko na lapa i magangngua.’ Ta tallu-gaddua-dagun nga pinamministerio ni Jesus, sinanay na i tanakuan. Nige nappalangi si Jesus, nitalo na ta disipulos na i responsibilidad nga tangngawan i nabalor nga karneru ni Jehova anna irolluan i trabahu nga pallayyagayya anna panuddu. Awayya na tu maturu tu 20 pagalaman i dagun na karuan tatun. (Bibbigan i Efeso 4:8.) Kunnasi nga inusa ni Jesus i ultimu nga 40 nga aggaw na tapenu uffunan danatun nga matalikarag, matalo, anna malallappo nga lallaki nga mabbalin tu ‘regalu ta totolay’?—Innan i study note na Efeso 4:8.

14. Kunnasi nga inuffunan ni Jesus i disipulos na nga mapprogreso ta espiritual ta ultimu nga 40 nga aggaw na ta davvun? (Innan gapa i letratu.)

¹⁴ Prangka nga sinabarangngan ni Jesus i disipulos na, ngem masippo nga kingngua na yatun. Angngarigan na, sinabarangngan na i karuan nira turi ta napansin na nga madduda ira. (Luc. 24:​25-27; Juan 20:27) Kinagi na paga nira nga mawag tu mas maffokus ira ta panangngaw ta totolay ni Jehova imbes tu ta pagaleradda. (Juan 21:15) Niperaddam na gapa ta nira nga ari da nakuan nga ikumpara i netuppal da ta passerbi kani Jehova tari ira ta makua na tanakuan. (Juan 21:​20-22) Nitunung na gapa i ugal ira nga nononopadda meyannung ta Pappatulan anna inuffunan na ira nga maffokus ta pangilayyagayya ta mapia nga dumug. (King. 1:​6-8) Anni i magigiammu na elder ira kani Jesus?

15-16. (a) Kunnasi maparigan na elder ira si Jesus? (b) Anni i makasta nga efekto na tabarang kani Patrick?

¹⁵ Kunnasi maparigan na elder ira si Jesus? Mawag nga sanayan anna uffunadda i brother ira, maski danuri mabbing paga, tapenu ammu da saw nga tangngawan i mas dakal ira nga responsibilidad.c Ari nga ekspektan na elder ira nga ari makkamali danuri sanayadda. Mawag nga masippo da ira nga tabarangngan tapenu mas makagigiammu yaw ira nga kabataan nga brother anna malippawa da nga mawag tu mabbalin ira tu minappakalinno, matalo, anna sigga-paran nga masserbi ta tanakuan.—1 Tim. 3:1; 2 Tim. 2:2; 1 Ped. 5:5.

¹⁶ Ikonsidera tam nu kunnasi nga nammakapia si Brother Patrick ta tabarang. Turi ta kabataan pagalaman yayya, mataki i abbibida na anna ari tu makasta i pattratu na maski ta sister ira. Napansin yatun na tadday nga elder. Yari tu prangka ngem masippo nga sinabarangngan na si Patrick ta mawag ira nga ulian na. Istorian ni Patrick: “Pia ngana laman ta kingngua na yatun. Dati bi, madismaya ngà nu makalawa i tanakuan nga brother tu pribilehio ira nga kakayà ku. Ngem nakoffun niakan i tabarang natun nga elder. Nagigiammù nga mawag ku i mappakalinno anna ipasingan i aya ta wawwaragi anne ta maffokus ta pribilehio ira.” Megafu tatun, natunno si Patrick bilang elder turi ta 23 i dagun na.—Prov. 27:9.

17. Kunnasi nga nipasingan ni Jesus nga mattalo yayya ta disipulos na ira?

¹⁷ Niddan ni Jesus tu responsibilidad i disipulos na ira nga manuddu ari laman tu mallayyagayya. (Innan i “itinuturo sa kanila” nga study note na Mateo 28:20.) Awayya na tu natageno na disipulos ira nga ari da metuppal i ipakua nira ni Jesus. Ngem siguradu si Jesus nga metuppal da i trabahu. Dakal i pakkomfiansa na ta nira yari tu kinagi na: “Ta kunna nipaddog na Yama niakan, kunnatun gapa i paddog ku nikamu.”—Juan 20:21.

18. Kunnasi maparigan na elder ira si Jesus?

¹⁸ Kunnasi maparigan na elder ira si Jesus? Sanayan na ekspiriensadu ira nga elder i tanakuan gukaban na pangitalo ta nira tu responsibilidad. (Fil. 2:​19-22) Angngarigan na, puede nga ikiddaw na elder ira ta mabbing ira nga manguffun ira ta pappakarenu anna pammentena ta Kingdom Hall. Puede nga iddan na elder ira tu trabahu onu annungan i brother ira, sanayan ira nu kunnasi kuan yatun, tapus mattalo nga metuppal da i trabahu. Mappappabalo i bagu nga elder nga si Matthew ta ekspiriensadu ira nga elder nga nassanay nisa tapenu metuppal i madduruma nga annungan ta kongregasion anna ta pattalo da nga metuppal na yatun. Istorian na, “Nu makkamali ngà, uffunaddà nga makagigiammu tatun anna magimprove paga.”d

19. Anni i determinadu nga kuattam?

¹⁹ Inusa ni Jesus i ultimu nga 40 nga aggaw na ta davvun tapenu pagaramman, tudduan, anna sanayan i tanakuan. Determinadu ittam nakuan gafu nga parigan i ehemplo na. (1 Ped. 2:21) Uffunan na ittam nga makua yatun. Nipromesa na paga lagu: “Kanayun ngà makitappaddian nikamu adde ta panuppalan na mundo.”—Mat. 28:20.