MAGIGIAMMU NGA ARTIKULO 47
KANSION 38 Pasikannan Naka
“Nabala-balor Ka”!
“ Nabala-balor ka.”—DAN. 9:23.
I MAGIGIAMMU TAM
Nu kunnasi moffunan danuri i alalinno i anningadda ta baggi da tapenu malippawa da nga nabala-balor ira kani Jehova.
1-2. Kunnasi tam makasiguradu nga nabala-balor ittam kani Jehova?
NABALA-BALOR kani Jehova i aripan na ira. Ngem awayya na tu ari nga kurugan na karuan nira yatun. Baka gare marake i pinattratu na tanakuan nira. Kunnatukka kari gapa? Nu wan, kunnasi ka makasiguradu nga nabala-balor ka kani Jehova?
2 Makoffun ta nikaw i pabbibbig tu istoria ira ta Biblia nga mangipasingan tu ikaya ni Jehova tu makasta i katratu na totolay. Nirespeto ni Jesus i totolay anna makasta i pinattratu na nira. Megafu tatun, nipasingan na tu nabalor ta nira na Yama na danuri i alinno i paningadda ta baggi da. (Juan 5:19; Heb. 1:3) Taw nga artikulo, gigiammuattam (1) nu kunnasi nga inuffunan ni Jesus i totolay nga masingan tu nabala-balor ira kani Jehova anna (2) nu kunnasi tam masiguradu nga kuruga nabalor ittam ta Dios.—Hag. 2:7.
INUFFUNAN NI JESUS I TOTOLAY IRA NGA MASINGAN TU NABALA-BALOR IRA
3. Kunnasi i pinattratu ni Jesus ta totolay ira nga taga-Galilea nga minay nisa nga mappoffun?
3 Turi ta nallayyagayya si Jesus ta Galilea, aru nga totolay i minaranni nisa tapenu magginna anna mapporu. Kinagi ni Jesus tu ‘mavuru-vurung ira, awan tu awa-awayya da, anna kagitta da i karneru ira nga napagurayan.’ (Innan i study note ira na Mateo 9:36.) Para gare ta lider ira na relihion, awan tu kwenta da. Kinagi da paga lagu tu “agga-dian nira i batù na Dios” onu nebariaw ira. (Innan i study note na Juan 7:47-49.) Ngem makasta i pinattratu ni Jesus nira. Sinudduan na ira anna inuru na i taka-taki da. (Mat. 9:35) Tapenu gapa mas aru paga i moffunan na, sinanay na gapa i apostoles na ta pallayyagayya anna niddan na ira tu pakapangngua nga pammapian danuri i mataki.—Mat. 10:5-8.
4. Anni i magigiammu tam ta nipattratu ni Jesus tari ira ta ari tu importante para ta tanakuan?
4 Nabalor para kani Jesus anna ta Yama na danuri i ari nga importante para ta tanakuan ira nga tolay. Masippo i pinattratu ni Jesus nira anna nirespeto na ira. Masserbi ka kari kani Jehova ngem matageno mu nga ari ka nga importante? Nonopammu i pinattratu ni Jesus tari ira ta ari tu importante ngem kayà da i makagigiammu ta nisa. Makoffun yatun tapenu masingammu tu nabalor ka kani Jehova.
5. Istorian i situasion na taga-Galilea nga babay.
5 Ari laman tu sinudduan ni Jesus i grupo ira na totolay. Inuffunan na gapa i kada tadday nira. Angngarigan na, turi ta nallayyagayya yayya ta Galilea nasimmuan na i babay nga 12 nga dagun ngana nga massesse tu daga. (Mar. 5:25) Segun ta Dob, maritta yatun nga babay. I sinni laman gapa nga maniggeg ta nisa ay mabbalin tu maritta. Yatutta awayya na tu awan kuruga tu umara-aranni ta nisa. Ari gapa yayya nga makapaddayaw kani Jehova ta sinagoga onu ta tiempo na fiesta ira kavulu i tanakuan. (Lev. 15:19, 25) Ari laman tu mataki yatun nga babay. Matageno na gapa nga awan tu kwenta na.—Mar. 5:26.
6. Anni i kingngua na babay tapenu mammapia yayya?
6 Ikaya na mazziga-riga nga babay nga pammapian yayya ni Jesus. Ngem ngatta ta ari yayya minaranni onu nakibbida kani Jesus? Awayya na tu mappasirang yayya ta taki na. Baka maganassing gapa yayya tu papanawan yayya ni Jesus megafu ta nelivi-livu yayya ta aru nga totolay maski nu maritta yayya. Yayya ta sinukkal laman na babay i sinnun i Jesus. Mangurug yayya tu mammapia yayya maski nu yatun laman i kuan na. (Mar. 5:27, 28) Megafu tatun nga masikan nga pangurug na, nammapia yayya. Niyavu ni Jesus nu sinni i nanukkal ta nisa anna kinagi na babay tu yayya i nagangngua tatun. Kunnasi i pinattratu ni Jesus ta nisa?
7. Kunnasi i pinattratu ni Jesus ta mazziga-riga nga babay? (Marcos 5:34)
7 Masippo i pinattratu ni Jesus ta babay anna nirespeto na yayya. Nasingan na nga “namippippig i babay ta assing na.” (Mar. 5:33) Yayya nga pinasikan na i nono na. Inagalan na paga lagu yayya tu “ana ku.” Ta pagagal ni Jesus tu kunnatun, nirespeto na yayya. Nipasingan na gapa tu iddu na yayya. (Bibbigan i Marcos 5:34.) Yatun laman i tiempo nga nakagi ta Biblia nga inagalan ni Jesus i tadday nga babay nga “ana ku.” Awayya na tu niyusa na yatun nga uvovug megafu ta nasingan na i babay nga fermi i assing na. Megafu ta kinagi ni Jesus, nepasiguradu ta babay nga ari tu marake i pinanukkal na ta sinnun na anna i pakillivi-livu na ta aru nga totolay. Inuffunan yayya ni Jesus nga masingan tu nabalor yayya nga ana nga babay ni Jehova.
8. Anni ira i problema na sister nga taga-Brazil?
8 Maraddam anna matageno na karuan ira nga aripan na Dios tu awan tu kwenta da megafu ta taka-taki da. Kunnatun i matageno ni Mariaa nga regular pioneer ta Brazil. Neyana yayya tu awan tu takki na anna awan tu zimigi nga lima na. Nikagi na: “Kanayuddà nga kanchawan ta eskuela gafu ta diferensià. Komforme i pagagal da ta nio. Maski paga lagu i familià, gitta na awan tu kwentà nira.”
9. Anni i nakoffun kani Maria tapenu masingan na tu nabalor yayya kani Jehova?
9 Anni i nakoffun kani Maria? Turi ta nabbalin yayya tu Saksi ni Jehova, binanna-bannayan anna inuffunan yayya na wawwaragi tapenu masingan tu nabala-balor yayya kani Jehova. Kinagi na: “Napakaru nga wawwaragi i nanuffun niakan. Mappabalo ngà kani Jehova megafu ta pangiyawa na niakan tu familià ta espiritual.” Talaga dakal i neyuffun na wawwaragi kani Maria tapenu ari na matageno tu awan tu kwenta na.
10. Anni ira i problema ni Maria Magdalena, anna anni i natageno na tatun? (Innan gapa i letratu ira.)
10 Inuffunan gapa ni Jesus si Maria Magdalena. Sinallungan yayya na pitu nga demonio! (Luc. 8:2) Awayya na tu komforme i kukukuan na megafu ta influwensia natun ira nga demonio. Megafu tatun, inarayyuan yayya na totolay. Fermi i ziga-riga na tatun anna siguradu tu naganassing yayya anna ninono na tu awan tu mangiddu ta nisa onu makoffun ta nisa. Pinalawan ni Jesus i demonio nga namarriga nisa anna nabbalin yayya tu disipulo na. Inuffunan ni Jesus si Maria Magdalena nga malippawa nga nabala-balor yayya ta Dios. Anni paga i kingngua ni Jesus tapenu matageno na yatun?
Kunnasi nga nipasingan ni Jesus kani Maria Magdalena nga nabala-balor yayya kani Jehova? (Innan i parapo 10-11)
11. Kunnasi nga nipasingan ni Jesus kani Maria Magdalena nga nabala-balor yayya ta Dios? (Innan gapa i letratu ira.)
11 Inagalan ni Jesus si Maria Magdalena tu vulungan na yayya ta pallayyagayya ta madduruma ira nga lugar.b Megafu tatun, naginna ni Maria Magdalena i panuddu ni Jesus. Nappasingan gapa si Jesus nisa turi ta napaginnolay yayya. Tadday yayya ta ollu nga disipulo nga kinibbida ni Jesus tatun nga aggaw. Zinog na paga lagu yayya tu ikagi ta apostoles na tu napaginnolay ngana yayya. Tatun ira nga kingngua ni Jesus, nipasingan na tu kuruga nabala-balor yayya kani Jehova!—Juan 20:11-18.
12. Ngatta natageno ni Lidia tu awan tu mangiddu nisa?
12 Kagitta ni Maria Magdalena, aru sangawe i makatageno nga awan tu mangiddu nira. Kunnatun i naekspiriensa ni Sister Lidia nga taga-Spain. Inistoria na tu ninono na yena na nga ipalattu yayya habang agga-vussi na yayya. Manono paga lagu ni Lidia nga ta kabbinna, paga-pagurayan yayya na yena na anna mataki i abbibida na ta nisa. Istorian na: “Nimula na yenà ta nono ku nga marake ngà nga tolay yatutta abbo ku tu maski anni i kuakku, awan tu mangiddu niakan. Kayà ku laman gapa tu iddukan nà na tanakuan.”
13. Anni i nakoffun kani Lidia tapenu masingan na tu nabala-balor yayya kani Jehova?
13 Turi ta naggigiammu si Lidia tu Biblia, nanguli i ganna-gannug. Nakoffun nisa i pakimallo anna i pabbibbig tu Biblia tapenu masingan na tu nabala-balor yayya kani Jehova. Masippo gapa i wawwaragi ta nisa anna makasta i kakkagiadda. Istorian na: “Kanayun gapa nga ipanono niakan na atawà i makasta ira nga ugalì. Kunnatun gapa i kuan na tanakuan ira nga wawwaragi.” Egga kari ta kongregasion nu i kagitta ni Lidia? Maduffunammu ira nga masingan tu nabalor ira kani Jehova nu masippo ka nira anna makasta i kakkagiammu.
ANNI I KUATTAM TAPENU MAKASIGURADU ITTAM TU NABALOR ITTAM KANI JEHOVA?
14. Kunnasi makoffun i 1 Samuel 16:7 tapenu makasiguradu ittam tu nabalor ittam kani Jehova? (Innan gapa i kahon nga “Ngatta Nabala-balor Kani Jehova i Totolena?”)
14 Daddamman nga tanakuan i paningan ni Jehova ta niko ta paningan na mundo. (Bibbigan i 1 Samuel 16:7.) Ta mundo, nabalor ka megafu ta itchuram, ta karu na kuartum, onu ta binalimmu. Ngem ari tu kunnatun si Jehova. (Isa. 55:8, 9) Nu paddudammu nu nabalor ka, nonopammu i paningan ni Jehova ta niko, ari tu i kagian na mundo. Mabibbig ta Biblia i totolay ira nga natageno da tu awan tu kwenta da kagitta ni Elias, Noemi, anna Hana. Bibbigammu danatun tapenu masingammu nu kunnasi ira kabalor kani Jehova. Egga kari gapa i kingngua ni Jehova ta niko yatutta natageno mu tu iddeddu naka anna nabala-balor ka kani Jehova? Awayyam itura yatun. Awayyam gapa i magaleg tu topiko ira ta publikasiottam ira nga mangipakanawag meyannung ta balor tam ta Dios.c
15. Ngatta “nabala-balor” si Daniel kani Jehova? (Daniel 9:23)
15 Nonopammu nga nabala-balor ka kani Jehova megafu ta matalo ka. Turi ta maggi 100 ngana i dagun ni Daniel, egga i tiempo nga “makkakafi” i baggi anna i nono na. (Dan. 9:20, 21) Kunnasi yayya nga pinasikan ni Jehova? Zinog na si anghel Gabriel tapenu ikagi kani Daniel nga “nabala-balor” yayya anna naginna na i pakimallo na ira. (Bibbigan i Daniel 9:23.) Ngatta nabala-balor si Daniel ta Dios? Megafu ta matunung anna matalo yayya. (Eze. 14:14) Nipetura ni Jehova yatun ta Biblia tapenu mapasikan gapa i nono tam. (Roma 15:4) Gigginnan gapa ni Jehova i pakimallo mu ira anna nabala-balor ka ta nisa megafu ta matunung anna matalo ka.—Mik. 6:8, ftn.; Heb. 6:10.
16. Anni i kuammu tapenu matageno mu nga kagitta na yamam si Jehova nga mangiddu nikaw?
16 Nonopammu nga kagitta na yamam si Jehova anna iddeddu naka. Ari na nga inninnan i pakkamaliammu ira. Kakayà naka paga lagu nga uffunan. (Sal. 130:3; Mat. 7:11; Luc. 12:6, 7) Nakoffun i pannono tatun tari ira ta wawwaragi tam nga matageno da tu awan tu kwenta da. Tadday tatun si Sister Michelle nga taga-Spain. Matageno na tu awan tu magiddu nisa anna awan tu kwenta na megafu ta piga dagun nga kanayun nga mataki i pabbibida na atawa na ta nisa. Istorian na: “Kada matageno ku tu awan tu kwentà, imajinakku nga agga-gabbay nà ni Jehova anna ipatageno na niakan nga iddeddu anna protektan nà.” (Sal. 28:9) Kunnaw gapa i nonopan ni Sister Lauren nga taga-South Africa: “Niyaranni nà mismu ni Jehova nisa anna ari na nga pinagurayan nga umarayyu ngà nisa adde sangawe. Inusa nà paga lagu tapenu tudduan i tanakuan. Gafu tatun, talaga makagì nga nabalor ngà ta nisa.”—Os. 11:4.
17. Anni i makoffun tapenu kurugammu nga ayatan naka ni Jehova? (Salmo 5:12) (Innan gapa i letratu.)
17 Kurugammu nga ayatan naka ni Jehova. (Bibbigan i Salmo 5:12.) Nigitta ni David i pangaya ni Jehova ta dakal nga “kalatag” nga mapprotekta ta matunung ira nga totolay. Kunnasi ittam nga protektan natun? Malabanattam i pannono nga awan tu kwenta tam nu ammu tam nga ayatan anna uuffunan ittam ni Jehova. Kunnasi ka gafu makasiguradu nga ayatan naka ni Jehova? Kagitta na nagigiammu tam, niyawa nittam ni Jehova i Biblia tapenu mammuammu tu nabalor ka ta nisa. Usu-usan na gapa i elder ira, i madukko nga kokkofun, anna i tanakuan paga. Anni gafu i kuammu nu egga i mamagaram niko?
Nu ammum nga ayatan naka ni Jehova, malabanammu i pannono nga awan tu kwentam (Innan i parapo 17)
18. Ngatta kurugammu nakuan nu komendan naka na tanakuan?
18 Nu komendan naka danuri na makakkilala anna mangiddu niko, kurugammu nakuan i kakkagiadda. Nonopammu nakuan nga awayya na tu usu-usan ira ni Jehova tapenu matageno mu tu iddeddu naka. Kunnaw i kagian ni Michelle nga nakagi ta nappasa ira nga parapo: “Ta gafu, narigatan ngà nga kurugan i makasta ira nga kakkagian ta nio na tanakuan. Ngem sisinu nga nakumbinsi ngà tu kurug danatun. Ammù gare tu yatun i kayà ni Jehova tu kurugakku.” Dakal gapa i neyuffun na elder ira kani Michelle tapenu kurugan na nga iddeddu yayya ni Jehova. Payunir ngana yayya sangawe anna remote volunteer ta Bethel.
19. Ngatta makasiguradu ka nga nabala-balor ka ta Dios?
19 Ituddu nittam ni Jesus nga nabala-balor ittam ta Yama tam ta langi. (Luc 12:24) Makasiguradu ittam gafu nga talaga nabala-balor ittam kani Jehova. Kanayuttam nakuan nga ipay ta nono tam yatun! Kuattam nakuan gapa i adde na mawayya tam tapenu uffunan i tanakuan nga mammuan tu nabala-balor ira ta Dios!
KANSION 139 Sonu Napabagu i Ngamin
a Natalian i karuan nga ngagan.
b Tadday si Maria Magdalena ta babbay nga nevulu ta pallayyagayya ni Jesus. Naggafu lagapa nira i ginastu da tapenu meyawa i pakawagan ni Jesus anna na apostol ira.—Mat. 27:55, 56; Luc. 8:1-3.
c Angngarigan na, innan i kapitulo 24 na libru nga Maging Malapít kay Jehova anna bibbigammu i teksto anna i istoria ira ta Biblia ta topiko nga “Pagdududa” ta libru nga Mga Teksto Para sa Kristiyanong Pamumuhay.