Kansion ira nga Mas Mamaddukko Nittam ta Dios

Makakkasta nga regalu ni Jehova i musika. Afektan natun i nono tam, i panageno tam, anna pagaramman na ittam. Kunnatun i efekto na original song tam ira. I kurug, awayya tam i mas maddukko kani Jehova megafu ta kansiottam ira.

Namegafu ta 2014, maturu ngana tu 70 nga original song i napadday. Available ngana paga lagu i karuan tatun nga kansion ta maturu tu 500 nga lengguahe! Ngem baka manono mu, ‘Sinni i magaggangngua ta kansion ira, anna kunnasi danatun nga mapadday?’

Nu Kunnasi nga Mapadday i Kansion

I original song ira ay kukukuan na tadday nga music team ta Audio/Video Services nga mattrabahu ta direksion na Teaching Committee na Manangngal nga Baggi. Egga i 13 nga wawwaragi ta music team. Maddurudduffun ira ta composing, music engineering, scheduling, anna karuan paga. Fuera paga ta nira, inapruban na Teaching Committee i remote volunteer ira ta interu mundo tapenu manguffun ta trabahu, gitta na composer, musician, anna singer. Mapakalinno nga usu-usan na wawwaragi tam i talento da ira anna manaki da nga ira i medayaw.

Kunnasi nga mapadday i tadday nga original song? Ollu, mappili i Teaching Committee tu teksto nga pangibaseyadda ta kansion anna i matageno nakuan na magginna ta kansion. Tapus, mangi-asayn i music team nu sinni i mac-compose ta musika anna nu sinni i mamadday ta lyrics. Meprepara i sampol nga recording. I-review na Teaching Committee i sampol nga recording anna mangiyawa ira tu suhestion. Tapus, i-adjust na music team i kansion anna irekord da i final version. Merekord i kansion ira ta madduruma nga lugar, angngarigan na, ta fasilidad na branch onu ta balay nga egga i recording equipment na.

Mangusa i wawwaragi tam tu madduruma nga computer program ta pac-compose anna parrekord ta original song ira. Mawag gapa i madduruma nga equipment kagitta na musical instrument, mixing console, amplifier, speaker, anna microphone. Mabbalor i tadday nga microphone tu ₱5,000 ($100) adde ta maturu tu ₱50,000 ($1,000 U.S.). Ta 2020, naggastu ittam tu maggi ₱6 million ($116,000 U.S.) para ta music-recording equipment.

Anni i kukukuattam tapenu makamenos ittam? Imbes tu mabbuu ittam tu dakal nga music team ta Bethel, mangusa ittam tu aru nga remote volunteer. Tadday paga, imbes tu live nga mangirekord i aru nga musician ira, mangusa i wawwaragi tam tu computer program tapenu mac-compose anna mamadday tu musika.

“Mamassikan ta Espiritualidad”

Kakayà na wawwaragi tam i magginna tu original song. Kinagi ni Tara nga taga-Germany: “Marelaks ngà ta kansion ira nu mavurung ngà. Nu ginnakku i kansion ira ta lengguahè, gitta na gaggakkopan nà ni Jehova.” Kinagi ni Dmitry nga taga-Kazakhstan: “Kakayà ku i magginna ta kansion ira ta ari ngà ngana mavurung nu mekontra danatun ta prinsipio ira na Biblia. Kunne na gapa, makaduffun i kansion ira tapenu makafokus ngà ta espiritual ira nga gannug.”

Kunnaw gapa i kinagi ni Delia nga taga-South Africa meyannung ta original song ira: “Danaw i mamassikan ta espiritualidad ku. Nu malungkut ngà onu nu egga i problemà, kanayun nga egga i kansion nga sakto ta situasiokku. Tono paga laman na kansion, makkasta ngana i panageno ku!”

Egga gapa i original song ira nga faborito na aru. Kinagi ni Lerato nga taga-South Africa: “Ta kansion nga ‘Araranni Ngana’ anna ‘Sonu Paraiso,’ maimajin ku nga dafungakku i iddeddu ku nga yena. Kada ginnakku danatun nga kansion, maimajin ku yayya nga makkara-karela tapenu gakkopan nà.”

Nakaduffun gapa i tadday nga original song ta tinedyer nga taga-Sri Lanka. Kinagi na: “Pinoryan nà na science teacher ku ta arubang na kaklasè ira ta Saksi ni Jehova ngà. Naganassing ngà anna kakku ammu i kagiakku. Ta pallabbe ku, kinagi ni yenà nga ginnakku i kansion nga ‘Ikaw ay Tatatag.’ Nagigiammù ta kansion nga mawag ku i mar-research anna mapprepara tu tabbag. Kommanan na, kinibbidà i teacher ku. Gininna nà anna nappabalo yayya ta malippawa na ngana i pangurug na Saksi ira ni Jehova. Mappappabalo ngà ta organisasion ni Jehova ta pamadday da tu makkarasta ira nga kansion.”

Paggafuan na fundu nga meyusa ta pamadday tu kansion ira? Ta donasion nu ira ta interu mundo nga trabahu. Aru tatun i nedona gukaban na metodo ira nga nakagi ta donate.jw.org. Mabbalo ta kinavuka-palag nu.