Affutan na Edukasion nga Naggafu ta Dios i Pangireruma

Ari nga mangireruma si Jehova. (King 10:34, 35) Alawatanna i totolay nga “madduma-ruma i naggagafuanad-da nga nasion, rasa, tribu, anna madduma-ruma i paguvuvog da.” (Nep 7:9) Yari tu awan tu lugar na pangireruma onu faboritismo ta kongregasion Cristiano. (San 2:1-4) Mabbala-balo ittam ta edukasion nga naggafu ta Dios megafu ta maekspiriensa tam i espiritual nga paraiso nga masingi-singattam i panguli na totolay. (Isa 11:6-9) Durante nga mappursigi ittam nga alsan i maski baddi laman nga pangireruma nga egga ta futu tam, mapakurug tam nga paparigattam i Dios.—Ef 5:1, 2.

GIRAWAN I VIDEO NGA JOHNY AND GIDEON: ONCE ENEMIES, NOW BROTHERS. TAPUS, TABBAGAN I TUMUMUG IRA NGA PAKKIAVU:

• Ngatta mas makapangngua i edukasion nga naggafu ta Dios anne ta appursigi na totolay nga alsan i diskriminasion anna pangireruma?

• Anni i nagustuammu ta internasional nga pawwaragi tam?

• Kunnasi nga medayaw si Jehova nu pattalupaddianattam i pattaradday tam bilang Cristiano?