Alawatan i Bisita Tam Ira

Sonu Marso 23, egga 12 million onu maturu paga nga bisita i ekspektattam nga magatende ta Memorial. Talaga makakkasta nga pamakurug i maginnada durante nga ipalappa na ispiker i meyannung ta regalu ni Jehova nga tavvu anna i karuan ira ta mappange nga bendision nga malawa na totolay! (Isa 11:6-9; 35:5, 6; 65:21-23; Jn 3:16) Ngem, ari laman tu i ispiker i mamakurug taw nga espesial nga okasion. Egga i parte tam ngamin ta meddu nga pangalawa ta bisita tam ira. (Ro 15:7) Yaw i karuan nga suhestion.

• Imbes tu agga-itubang laman anna maginnag ta pamegafu na programa, minakkikofun anna nakangizzi nakuan nga mangalawa ta bisita anna inactive ira

• Maski nu okupadu ka ta pangasikaso ta bisitam ira, alerto ka nakuan ta tanakuan ira nga nagatende megafu ta nakalawa ira tu imbitasion turi ta kampania. Imbitammu ira nga magitubang ta bikomu. Ipeyusam nira i Biblia anna libru nga pakkansionammu

• Kabalin na palappa, sigga-paran ka nakuan nga tumabbag ta pakkiavu ira. Nu limitadu i oras megafu ta egga i tumunug nga mangiyusa ta Kingdom Hall, iyunnugmu nga bisitan insigida i tolay. Nu awan tu contact number-na nikaw, awayyam kagian: “Kayaku mammuan nu anni i makagim ta programa. Kunnasi taka tamma makontak?”