Egga Paga Kari i Pangirespeto na Totolay ta Baggi Da?

NU NGATTA IMPORTANTE I PANGIRESPETO TA BAGGI DA

Mawayya na totolay nga egga i respeto da ta baggi da nga marubang i kapurueba ira. Ari ira insigida magimmang.

Kagian na research nga sobra i pavvuru-vurung, egga i depression, anna eating disorder na totolay nga negatibo i pagimamma da ta baggi da. Maruddu nga adik ira ta droga anna minaggillellaw.
I totolay nga egga i respeto da ta baggi da, ariadda ikumpara i baggi da ta tanakuan megafu tatun makasta i relasiodda ta totolay anna mapeggan ira tu madukko nga kokkofun. Minakkritika i totolay nga awan tu pangirespeto da ta baggi da anna makadaral yatun ta relasiodda ta tanakuan.
Mawayya na totolay nga egga i pangirespeto da ta baggi da nga marubang i problema ira; awan tu makefugag nira ta paggawa ta goal da. Ngem i awan tu pangirespeto da ta baggi da, imammatadda tu darakal i baraddi nga problema. Megafu tatun, insigida nga magimmang ira.

I MAKUAM

Pilian i kokkofun nga mamagaram nikaw. Makikavvulu ta totolay ira nga marespeto, mangikavurung, anna mamagaram nikaw.

“I kurug nga kofun ay mangipasingan tu aya ta ngamin nga tiempo, anna wagi nga meyana ta tiempo na ziga.”—Proverbio 17:17.

Uffunan i tanakuan. Nu masippo ka anna uffunammu i tanakuan—maski ta totolay ira nga ariadda nga makua yatun—siguradu nga magayayya ka lagapa. Maski paga nu awan tu makasingan ta makasta ira nga kuammu.

“Mas dakal i pagayaya ta pangiyawa anne ta pangalawa.”—Kingngua 20:35.

Uffunan i abbing ira nga irespeto i baggi da. Makua nu yatun nu ipamavulun nu nga solbadda i problema da, nu awayya da nga kuan yatun. Makoffun yatun ta abbing ira tapenu magigiammu da nga arubangan anna solban i problema da. Matudduan gapa ira nga irespeto i baggi da anna makoffun yatun nira adde ta paddakal da.

“Sanayammu i abbing ta dalan nga mawag tu angngayan na; maski nu mammanakam yayya ay arianna yatun panawan.” —Proverbio 22:6.

Tadday nga Saksi ni Jehova nga i-Bible study na i babay ta café.

I KUAMMI IRA

Makoffun i study anna paggigiammu tu Biblia nga programa na Saksi ira ni Jehova ta totolay tapenu mapakasta i pattoleda anna mapeggan ira tu pangirespeto ta baggi da.

I LINIGGUAN NGA STUDY MI

Ta linigguan nga study mi, makaginna kami tu palappa ira nga nebase ta Biblia nga makoffun tapenu mapeggakkami tu pangirespeto ta baggi mi. Awan tu mapagan ta study mi ira anna awayya na nga magatende i maski sinni. Angngarigan na, magigiammum ta study mi nu . . .

ngatta importante ka ta Dios
anni i kurug nga gakkag na pattolem
kunnasi ka mapeggan tu madukko anna mannanayun tu pakikkofun

Makaleg ka gapa tu kurug ira nga kokkofun nga egga i ‘parehu nga pakka-iddu-iddu’ da ta kataggi-tadday. —1 Corinto 12:25, 26.

Tapenu mammuan i aru paga ta study mi, alegan ta jw.org i ababba nga video nga Anni Kukukuadda ta Kingdom Hall?

I PAGGIGIAMMU MI TU BIBLIA

Mangiyofer kami tu libre nga paggigiammu tu Biblia nga meyusa i libru nga Magayayya nga Mattolay tu Mannanayun! Makoffun yaw nga libru tapenu malippawa i teksto ira gukaban na efektibo ira nga pakkiavu, egga gapa i makasta ira nga artwork anna video na. Makoffun i paggigiammu tu Biblia tapenu mapeggan i totolay tu respeto ta baggi da anna mapakasta i pattoleda.

Tapenu mammuammu i benefisio na paggigiammu tu Biblia kavulu i Saksi ira ni Jehova, alegan ta jw.org i ababba nga video nga Ngatta Gigiammuammu i Biblia?