Ɛgɛ Néē I Bi Ɔkpá Nyā Le Nwu Ɛlā Ɛ̄cī Doodu

Ipu ɔkpá nyā, a géē má ɛga ku Ubáyíbu néē ta ɛ̄cī doodu mla aɛlā néē ka lɛyikw ɔ a. A lɔfu jé ɛlā ō nwu ku ɛ̄cī doodu nyā eko duuma nōo he uwɔ ɔtu gla. Amáŋ ācɛ alɛwa ka é gē lɛ itene ŋma anu fiyɛ, eko duuma néē leyi yɛ ɔ ɔcɔɔci. Ohigbu ɔdi? É ka ɛnyā gē ta uwa abɔ kéē lɛ ɔdā néē géē yɔ i gbɛla lɛyikwu ɔ ɛjɛɛji ɛ̄cī ɔɔma. Ó gē lɔhi fiyɛ ɔdaŋ ku apɔlɛ jila tɔha kéē leyi yɛ ɛlā ō nwu ku ɛ̄cī doodu nyā tɔha. Ipu oduudu ɛcɛ, ācɛ nōo gē yuklɔ ipu Ubɛtɛlu a gē leyi yɛ ɔ eko duuma néē lɛ ɔdole ku ɔcɔɔci le kwɛyi.

É bi ɛlā nēé ka lɛyikwu ɛga ku Ubáyíbu duuma a, ŋma ipu Ɔda Ō Gbaajɛ (w) ku Ɔya Ɔmɛnɛ 2023 gáā tu Ɔya Ɔmɛtɛ 2024. Aflɛyi a géē má inɔmba nōo yɔ i mafu ɔya ku Ɔda Ō Gbaajɛ néē je ɛlā a ŋma a, inɔmba nōo gboce ɔɔma kē wɛ inɔmba ku upeji a, amoomɛ a kē wɛ inɔmba ku ogwotu ɛ̄nɛ̄ é je ɛlā a ŋma a. (Má ɔdā néē pi ɛhaajɛ a.) Ɔdaŋ ka kē dɔka ō je ɔdā alɛwa lɛyikwu ɛlā a fiyɛ, a lɔfu gáā jé ikpɛyi ɛlā ku Ɔda Ō Gbaajɛ ɔɔma.