Ihe Ọ Chọrọ Bụ Ime Ihe n’Eziokwu

Otu nwa agbọghọ n’Ecuador gara ịza ajụjụ ọnụ e ji ewe mmadụ n’ọrụ. Mgbe o sooro ndị ọzọ bịara maka ajụjụ ọnụ ahụ kparịtasịa ụka—ha dị 36 ná ngụkọta—ọ ghọtara na ohere ndị o nwere dị nnọọ nta. Ha nwere ahụmahụ ọrụ na mmụta mahadum, ma ọ dịghị nke o nwere. N’ime ajụjụ isii ndị a jụrụ, ọ zataghị abụọ. Otú ọ dị, otu ajụjụ bụ ụdị mmadụ na-aza n’onwe ya: “Gịnị bụ eziokwu nye gị?”

Nwanyị ahụ zara, sị: “Eziokwu abụghị echiche efu na-adịghị adị kama ọ bụ ihe anyị kwesịrị iji na-adị ndụ. Anyị kwesịrị ikwu eziokwu ọ bụghị ịgha ụgha, n’ihi na ọ bụrụ na anyị aghaa ụgha, anyị na-esonyere Setan bụ́ Ekwensu. Ọ bụrụ na anyị ekwuo eziokwu, anyị na-eme ihe na-atọ Chineke ụtọ ma na-erite ọtụtụ uru onwe onye.”

Mgbe manịja ahụ jụrụ ihe bụ okpukpe nwanyị ahụ, ọ zaghachiri na ya bụ otu n’ime Ndịàmà Jehova. N’ụbọchị na-esonụ a gwara ya na a họrọwo ya maka ọrụ ahụ. Mgbe otu ọnwa gasịrị nwanyị ahụ jụrụ manịja ahụ ihe mere o ji họrọ ya, o kwukwara na ọ bụ n’ihi ime ihe n’eziokwu ya.

Ọ́ bụghị eziokwu na ọtụtụ ndị taa adịghị eme ihe n’eziokwu? N’aka nke ọzọ, a maara ndị na-akwanyere Bible ùgwù maka ime ihe n’eziokwu ha. Ụlọ Nche nke July 1, 1995, sịrị: “N’ime Bible, ‘eziokwu’ adịtụghị ka echiche efu, nke na-adịghị adị nke ndị ọkà ihe ọmụma ụwa na-arụ ụka banyere ya.”

Ị ga-erite uru site n’ịgụchi Ụlọ Nche anya, bụ́ nke a maara n’ụwa nile dị ka onye nkwado nke eziokwu Bible.