“Kwụsịnụ Ichegbu Onwe Unu”

“Ego niile anyị nwere n’ụlọ akụ̀ gwụrụ, ma nke anyị chekwara n’aha ụmụ anyị. Anyị nọrọ ọtụtụ ọnwa n’enweghị ego na-abata anyị n’aka.”

● Enwere m otu ụlọ akwụkwọ n’otu ime obodo dị n’India. Ụlọ akwụkwọ ahụ na-emekwa nnọọ nke ọma. O nwedịrị oge ụmụ akwụkwọ anyị ruru narị ise. Ka oge na-aga, otu ụlọ akwụkwọ a ma ama nke dị n’otu obodo ukwu dị nso ebe ahụ malitere iji bọs na-abịa n’ime obodo ebe ahụ na-eburu ụmụ akwụkwọ, ha mekwara ka ọ dịrị ụmụ akwụkwọ mfe ịmalite akwụkwọ n’ụlọ akwụkwọ ha. O jughị m anya mgbe ọtụtụ ụmụ akwụkwọ m gafere n’ụlọ akwụkwọ ahụ dị n’obodo ukwu. Nke a mere ka ọnụ ọgụgụ ụmụ akwụkwọ nọ n’ụlọ akwụkwọ m si n’ihe dị ka narị ise gbadaruo ihe dị ka iri isii. Ihe bịara ka njọ mgbe otu onye m binyere ego na-ekweghịzi akwụ m ụgwọ ahụ. Ebe ọ bụ na m nwere ọtụtụ ndị nkụzi na ndị ọrụ ndị ọzọ m na-akwụ ụgwọ, abanyere m n’ụgwọ.

Mụ na ezinụlọ m nọọrọ ala kwurịta nsogbu a. A bịa n’ihe gbasara ego, anyị niile mụtara ịchụ ihe ụfọdụ n’àjà iji nwee ike ime ihe ahụ Jizọs kwuru banyere ‘anya anyị ilegide otu ebe.’ Ihe ọ pụtara bụ na anyị mụtara ikowe akpa anyị ebe aka anyị ga-eru. (Matiu 6:22, 25) O nwedịrị oge anyị kwụsịrị iji ụgbọala anyị aga ebe ọ bụla n’ihi na anyị enweghị ego mmanụ ụgbọala na ego anyị ji elekọta ya. Anyị malitere ịga ahịa n’oge mgbede, mgbe ihe oriri na-adị ọnụ ala. Anyị wetulatakwara aka n’ihe ndị anyị na-eri n’ụbọchị.

Anyị bụ Ndịàmà Jehova, n’ihi ya kwa, anyị maara na ọ dị mkpa ka anyị na Ndịàmà ibe anyị na-ezukọta maka ife Chineke. (Ndị Hibru 10:25) N’ihi ya, n’agbanyeghị na anyị enweghị ego, anyị kpebiri na o nweghị ọmụmụ ihe ma ọ bụ mgbakọ Ndị Kraịst ndị anyị na-enwe a ga-achọ anyị achọ na ya, ọ sọkwa ya ya bụrụ na ebe a na-aga ya dị anya. Anyị na-agakwa ozi ọma na-akụziri ndị mmadụ Baịbụl, mgbe ụfọdụkwa, ọ na-abụ n’ebe dị ezigbo anya. Anyị na-eji otu obere ọgba tum tum aga kama iji ụgbọala. Ọ bụ naanị mmadụ abụọ ka ọgba tum tum ahụ nwere ike ibu.

Ma nke a emeghị ka anyị ghara ịna-agachi ozi ọma anya. Kama nke ahụ, nwunye m na nwa m nwaanyị malitere ịgachikwu ozi ọma anya. Mgbe ụfọdụ, ha na-aga ije ihe ruru kilomita isii ma ọ bụ asatọ iji ruo n’ụlọ ndị nwere mmasị ma kụziere ha Baịbụl. Mụ na nwa m nwoke gbalịkwara hụ na anyị na-ewepụtakwu oge na-aga akụziri ndị mmadụ Baịbụl.

Ihe adịtụrụla anyị mma ugbu a. Ma ihe a mere anyị akụzierela onye ọ bụla n’ezinụlọ anyị na ọ dịghị mma ịtụkwasị obi n’ihe onwunwe. Anyị mụtakwara na ọ baghị uru mmadụ ichegbu onwe ya n’ihe ọ na-agaghị agbanweli. Abụ Ọma 55:22 na-agba anyị ume n’ụzọ pụrụ iche. Ọ sịrị: “Tụkwasị Jehova ibu arọ gị, ya onwe ya ga-akwadokwa gị. Ọ dịghị mgbe ọ ga-ekwe ka onye ezi omume maa jijiji.” N’oge ahụ ụkọ ego ji anyị aka ọjọọ, anyị bịara chọpụta na ihe a Akwụkwọ Nsọ kwuru bụ eziokwu!—Ọ bụ onye na-agụ akwụkwọ anyị detara ya.