Gịnị Ga-enyere Gị Aka Ịma Ihe Ị Ga-ekpebi?
“Eluigwe na ụwa ga-ejili aka ha kee onwe ha.” —Ihe Stephen Hawking na Leonard Mlodinow, bụ́ ndị mụrụ gbasara fiziks, kwuru n’afọ 2010.
“Chineke kere eluigwe na ụwa.”—Ihe Baịbụl kwuru na Jenesis 1:1.
Ọ̀ bụ Chineke kere eluigwe na ụwa na ihe ndị dị ndụ dị na ha, ka hà nọkatara dịrị? Ihe ndị fiziks abụọ ahụ zara ná mmalite isiokwu a dị nnọọ iche n’ihe Baịbụl zara. Azịza nke ọ bụla nwekwara ndị na-akwadosi ya ike. Ma, ọtụtụ ndị amaghị nke ha ga-ekwere ekwere. Ọtụtụ ndị arụọkwala ụka banyere ya n’akwụkwọ ndị kacha aga ahịa nakwa na tiivi.
O nwere ike ịbụ na ndị nkụzi unu gwara unu na eluigwe na ụwa ji aka ha dịrị, na o nweghị onye kere ha. Ma, hà gwara unu ihe gosiri na o nweghị onye kere ha? O nwekwara ike ịbụ na ị nụla ebe ndị isi chọọchị na-akụzi na e nwere onye kere ihe ndị a. Ma, hà gwara gị ihe gosiri na e nwere onye kere ha? Ka hà gwara gị jiri “okwukwe” nabata ihe ha kwuru?
O doro anya na i chebarala ajụjụ a echiche. Ma, o nwere ike ịdị gị ka o nweghị onye ma ma è nwere Onye kere ihe niile n’eziokwu. I nwekwara ike ịna-ajụ onwe gị ma ịmata azịza ajụjụ a ọ̀ dịkwanụ mkpa?
N’akwụkwọ a, anyị ga-ebu ụzọ kwuo ihe ụfọdụ mere ka ọtụtụ ndị kweta na e nwere Onye kere ihe niile. Anyị kwuchaa ya, anyị ekwuzie ihe mere o ji dị mkpa ka anyị mata otú ihe ndị dị ndụ si malite n’ụwa.