“Awa Ole Ka M Kwesịrị Ịgụrụ?”

Ò nwetụla mgbe ị jụrụ ajụjụ a? N’akwụkwọ Ndị A Haziri, peeji nke 86-87, e kwuru ihe ndị ga-enyere anyị aka ịma otú anyị ga-esi na-agụrụ awa. Mgbe ụfọdụkwa, a na-akọwara anyị ihe ndị ọzọ anyị kwesịrị ime dị ka a kọwara n’Igbe Ajụjụ gbara n’Ozi Alaeze Anyị nke ọnwa September 2008. Ebe ọ bụ na otú ihe si dịrị n’otu ókèala nwere ike ịdị iche n’otú ihe si dịrị n’ókèala ọzọ, e nweghị ebe e depụtachara ihe ndị ọ ga-abụ anyị mee, anyị agụrụ awa. N’ihi ya, ọ gaghị adị mma ka ndị okenye ma ọ bụkwanụ ndị ọ bụla ọzọ kwuo ihe ọgbakọ ga na-eme n’okwu a.

Ọ bụrụ na onye nkwusa amaghị otú ọ ga-esi gụrụ awa, o nweghịkwanụ akwụkwọ anyị ga-enyere ya aka ịma ihe o nwere ike ime, ihe ọ ga-ajụ onwe ya bụ: Oge ahụ ọ̀ bụ oge m ji gaa ozi ọma ka è nwere ihe ọzọ na-agbasaghị ozi ọma m ji ya mee? Ọ dị mma ka awa anyị na-edenye n’akụkọ ozi anyị n’ọnwa ọ bụla bụrụ nke ọ ga-abụ anyị dechaa, obi adị anyị ụtọ, akọnuche anyị agharakwa inye anyị nsogbu. (Ọrụ 23:1) Nke bụ́ eziokwu bụ na mkpa anyị abụghị ịgụrụ awa, kama, ọ bụ ịhụ na anyị dị uchu n’ozi anyị.—Hib. 6:11.