Nwa Gị Ọ̀ Nọ Ná Nchebe?

Dị ka Ụlọ Ọrụ Mba Na-ahụ Maka Nchebe Ndị Njem n’Ụzọ Awara Awara nke United States (NHTSA) si kwuo, mkpọka ụgbọala bụ ihe kasị akpata ọnwụ n’etiti ụmụaka dị n’agbata afọ 5 na afọ 14. Ụlọ ọrụ NHTSA na-ekwu, sị: “Ihe karịrị ọkara nke ụmụaka ndị na-anwụ ná mkpọka ụgbọala bụ ndị [ihe ndị na-echebe mmadụ] na-ejideghị. Ọzọkwa, ụmụaka 4 n’ime ụmụaka 5 bụ ndị na-enweghị ihe njide ndị kwesịrị ekwesị.”

Ụlọ ọrụ NHTSA tụrụ ọtụtụ aro, nyekwa ọtụtụ ịdọ aka ná ntị banyere nchebe maka ndị na-ebu ụmụaka n’ụgbọala. Ọ bụ ezie na iwu na-adịgasị iche iche site ná mba gaa ná mba nakwa ọbụna site na steeti gaa na steeti, ụkpụrụ nduzi ndị a bụ ihe ọtụtụ ndị nne na nna na ndị na-elekọta ụmụaka kwesịrị ichebara echiche. Biko chọpụta ihe bụ́ iwu dị n’ógbè unu ma mee ihe ọ bụla ị pụrụ ime iji chebe ibu dị oké ọnụ ahịa i bu!

ARO MAKA NCHEBE

Ebe kasị dị nchebe maka ụmụaka nile bụ n’oche azụ.

1 E kwesịrị ikusa ụmụaka a mụrụ ọhụrụ n’oche ụmụaka nke chere ihu n’azụ nke dị n’oche azụ ụgbọala.

2 A pụrụ ikusa nwatakịrị dị ma ọ dịkarịa ala otu afọ, onye dịkwa kilogram itoolu n’arọ ma ọ dịkarịa ala, n’oche chere ihu n’ihu.

3 Mgbe nwatakịrị dị kilogram 18 n’arọ, nwa ahụ pụrụ ịnọdụ ‘n’oche a pụrụ ịtụkwasị n’elu oche ọzọ,’ bụ́ nke e ji otu n’ime belt oche ụgbọala nke na-ejide apata ụkwụ na nke na-ejide ubu jide.

4 Mgbe ọ dị ihe dị ka kilogram 36 n’arọ dịkwa ihe dị ka sentimita 140 n’ogo, nwatakịrị ahụ pụrụ ịmalite iji belt nke ndị toworo eto na-eme ihe.

ỊDỌ AKA NÁ NTỊ

Ụmụaka ekwesịghị ịnọ n’oche ihu ruo mgbe ha ruru ma ọ dịkarịa ala afọ 13. Akpa ikuku na-adị n’oche ihu pụrụ imerụ ụmụ ọhụru na obere ụmụaka ahụ nke ukwuu.

Mgbe e ji oche a pụrụ ịtụkwasị n’elu oche ọzọ mee ihe, nanị belt nke na-ejide apata ụkwụ agaghị ezu iji chebe ya ma ọ bụrụ na oche ahụ a pụrụ ịtụkwasị n’elu oche ọzọ enweghị ihe mgbochi.

Echekwala na nanị belt nke na-ejide ubu ga-echebe obere nwatakịrị; ọ bụrụ na ụgbọala akpọkaa, belt ahụ pụrụ ijide nwatakịrị ahụ n’olu, na-akpatara ya mmerụ ahụ dị ukwuu ma ọ bụ ọbụna ọnwụ.

Gbasochie ntụziaka e nyere anya mgbe ị na-etinye oche ụmụaka ma ọ bụ na-ekusa nwatakịrị na ya. Dị ka ụlọ ọrụ NHTSA si kwuo, “ọbụna oche ‘kasị dịrị nchebe’ nwere ike ọ gaghị echebe nwa gị ma ọ bụrụ na e jighị ya mee ihe n’ụzọ ziri ezi.”

[Foto ndị dị na peeji nke 31]

Itinye oche ụmụaka n’ụzọ kwesịrị ekwesị gụnyere ikechisi belt oche ike