Na-eme Ihe Ndị Ga-eme Ka Ahụ́ Gbasie Gị Ike

Ì CHETARA Ram, onye e kwuru okwu ya n’isiokwu mbụ? Ọtụtụ ndị n’ụwa taa amaghị na iri nri na-edozi ahụ́ na ime ihe ndị ọzọ kwa ụbọchị dị mkpa ma ọ bụrụ na mmadụ chọrọ ka ahụ́ na-adị ya mma. Na mbụ, Ram amaghị ihe ndị a. Ma o mechara kwuo, sị: “Isiokwu bụ́ ‘Ihe Oriri Ndị Na-enye Ihe n’Ahụ́ Dị n’Ebe Aka Gị Ga-eru,’ nke gbara na Teta! May 8, 2002, nyeere m aka ịghọta ihe mere anyị kwesịrị iji kpachara anya n’ụdị nri ndị anyị na-eri.”

Ram kwukwara, sị: “Anyị niile n’ezinụlọ anyị na-agbalị ime ihe ndị anyị mụtara n’isiokwu ahụ. Ka oge na-aga, anyị chọpụtara na anyị anaghị arịakarịzi ọrịa. Tupu anyị ebido ilebara ihe anyị na-eri anya, anyị na-arịakarị ahụ́ ọkụ, ma ugbu a ọ na-esi ike anyị arịa ahụ́ ọkụ. Mgbe anyị gụkwara isiokwu bụ́ ‘Ụzọ 6 Isi Chekwaa Ahụ́ Ike Gị,’ nke gbara na Teta! October 8, 2003, anyị mụtara otú ka mfe anyị ga-esi na-enweta ezigbo mmiri ọṅụṅụ, nke na-anaghị efukwa anyị nnukwu ego.

“Isiokwu ọzọ bụ́ ‘Ncha—“Ọgwụ Mgbochi Ọrịa I Ji Aka Gị Enye Onwe Gị,”’ nke gbara na Teta! December 8, 2003, nyeere m aka ime ka ahụ́ na-adị ndị ezinụlọ m mma. Ozugbo anyị gụchara isiokwu ahụ, anyị bidoro ime ihe ndị anyị gụtara. Ugbu a, anyị anaghị arịakarịzi ọrịa anya otú anyị si arịa ya na mbụ.

“Na ijiji na anwụnta juru gburugburu ebe anyị bi agbasaghịdị ọtụtụ ndị bi n’ógbè ebe anyị bi. Ma mgbe anyị kirichara vidio bụ́ The Bible—Its Power in Your Life,a ezinụlọ anyị mụtara na anyị kwesịrị izere ụmụ ahụhụ ndị ahụ. Ihe a anyị mụtara nyekwara aka mee ka ahụ́ na-adịkwu anyị mma.”

Ekwela ka ihe ọ bụla kụda gị aka! N’agbanyeghị otú mgbanwe ndị i kwesịrị ime hà, ị ga-aka eme nke ọma ma i bido ha obere obere ma gbalịa ime ndị nke ị ga-emeli n’oge ahụ. Dị ka ihe atụ, kama ịkwụsịcha iri nri ndị na-anaghị edozicha ahụ́, selata aka n’otú i si eri ha. Gbalịa ka ị na-alakpu ụra n’oge karịa ka ị na-emebu, gbalịakwa na-emegatụkwu ahụ́. Ọ ka mma ịgbalị imetụ ihe eme karịa ịghara ime chaa chaa. Ọ na-ewe oge tupu onye chọrọ ịkwụsị ịkpa àgwà ọjọọ akwụsịchaa àgwà ọjọọ ya. N’ihi ya, ọ bụrụ na ọ dị gị ka e nweghị uru dị ná mgbalị ị na-eme, ekwela ka nke ahụ kụda gị mmụọ. Ọ bụrụ na ị nọgide na-eme ihe ndị i kwesịrị ime, n’agbanyeghị na ọ dịghịrị gị mfe, ị ga-emecha hụ na ahụ́ adịwakwuola gị mma.

N’ụwa ọjọọ a, o nweghị otú mmadụ ga-esi nọrọ n’arịaghị ọrịa. Ọ bụrụ na ị rịawa ọrịa, o nwere ike ịbụ n’ihi na anyị ezughị okè, ọ bụghị n’ihi na ị naghị elebara onwe gị anya nke ọma. N’ihi ya, ekwela ka ọrịa ma ọ bụ ihe ọ bụla ọzọ mee ka ị na-echegbu onwe gị karịa otú i kwesịrị. Jizọs jụrụ, sị: “Ònye n’ime unu pụrụ ịgbakwụnye otu kubit n’afọ ndụ ya site n’ichegbu onwe ya?” (Luk 12:25) Kama, gbalịa na-ezere ihe ndị nwere ike ime ka ị nwụchuo ọnwụ ma ọ bụ ka ndụ ghara ịtọ gị ụtọ. Ọ bụrụ na i mee otú ahụ, ọ ga-eme ka ahụ́ dị gị mma otú o kwere gị mee ruokwa mgbe ụwa ọhụrụ Chineke ga-abịa, bụ́ mgbe “onye bi na ya [na-agaghị asị]: ‘Ana m arịa ọrịa.’”—Aịzaya 33:24.

[Ihe e dere n’ala ala peeji]