Isi 83

Onye Farisii Lere Ya Ọbịa

JISỌS ka nọkwa n’ụlọ otu onye Farisii a ma ama, ọ ka gwọsịkwara nwoke na-arịa ọrịa ahụ mmiri. Ka ọ na-ekiri ndị ọbịa ibe ya ka ha na-ahọrọ ọnọdụ kasị mma ná nnọkọ oriri ahụ, ọ kụziri ihe banyere mmadụ iweda onwe ya ala.

Mgbe ahụ, Jisọs na-akọwa sị, “Mgbe ọ bụla mmadụ ga-akpọ gị n’oriri ọlụlụ nwunye, anọdụla n’isi ọnọdụ; ma eleghị anya ọ kpọworị otu onye ka gị ná nsọpụrụ, onye kpọrọ gị na ya wee bịa sị gị, Nye nwoke a ọnọdụ; mgbe ahụ ị ga-amalite iji ihere were ọnọdụ ikpeazụ.”

Ya mere, Jisọs nyere ndụmọdụ, sị: “Ma mgbe ọ bụla a ga-akpọ gị, gaa nọdụ n’ọnọdụ ikpeazụ; ka, mgbe onye kpọworo gị ga-abịa, ka o wee sị gị, Enyi m, rịgoo n’ọnọdụ ka elu: mgbe ahụ ị ga-enwe otuto n’ihu ndị nile gị na ha na-anọdụ ná nri.” N’ikwubi okwu ya, Jisọs na-asị: “N’ihi na onye ọ bụla nke na-eweli onwe ya elu, a ga-eweda ya; ọzọ, onye na-eweda onwe ya, a ga-eweli ya.”

Ihe ọzọ Jisọs mere bụ ịgwa onye Farisii ahụ nke kpọworo ya òkù okwu, na-akọwa otú e si akpọ nnọkọ oriri nke na-atọ Chineke ụtọ. “Mgbe ọ bụla i siri nri ụtụtụ ma ọ bụ nri anyasị, akpọla ndị enyi gị, ma ọ bụ ụmụnne gị, ma ọ bụ ndị ikwu gị, ma ọ bụ ndị agbata obi gị, bụ́ ndị ọgaranya; ka ha onwe ha wee ghara ịkpọghachikwa gị ma eleghị anya, e wee nyeghachi gị ihe. Kama mgbe ọ bụla i siri nri ukwu, kpọọ ndị ogbenye, ndị ọrụsị, ndị ngwụrọ, ndị ìsì: onye ngọzi [“obi ụtọ,” NW] ka ị ga-abụ; n’ihi na ha enweghị ihe inyeghachi gị.”

Inye ndị dị otú a ihe na-esiri ike nri ga-ewetara onye ahụ na-enye ya obi ụtọ n’ihi na, dị ka Jisọs kọwaara onye ahụ kpọrọ ya, “A ga-enyeghachi gị ná mbilite n’ọnwụ nke ndị ezi omume.” Nkọwa nke a Jisọs nyere banyere nnọkọ oriri nke dị mma kpalitere ụdị nnọkọ oriri ọzọ n’uche nke otu onye ọzọ a kpọkwara òkù. Onye ọbịa nke a na-ekwu sị, “Ngọzi [“obi ụtọ,” NW] na-adịrị onye ga-eri nri n’alaeze Chineke.” Ma, ọ bụghị mmadụ nile ji olileanya obi ụtọ dị otú a kpọrọ ihe, dị ka Jisọs gara n’ihu igosipụta site n’otu ihe atụ.

“Otu nwoke siri nri anyasị ukwu; wee kpọọ ọtụtụ mmadụ: o wee zipụ ohu ya . . . ịsị ndị a kpọwororịị, Bịanụ; n’ihi na e doziwo ihe nile ugbu a. Ma ha nile weere otu olu malite ịrịọ ka a hapụ ha. Onye mbụ sịrị ya, Azụtara m ubi, ọ dịkwa m mkpa ịpụ gaa lee ya: arịọ m gị gụọ m n’onye rịọrọ ka a hapụ ya. Onye ọzọ sịkwara, Azụtara m ehi ọrụ iri e jikọrọ abụọ abụọ, ana m agakwa ịnwa ha: arịọ m gị gụọ m n’onye ­rịọrọ ka a hapụ ya. Onye ọzọ sịkwara, Alụrụ m nwunye, n’ihi nke a apụghị m ịbịa.”

Lee nnọọ ihe ngọpụ na-enweghị isi ndị a bụ! A na-ebu ụzọ nyochaa ubi ma ọ bụ anụ ụlọ tupu azụọ ha, ya mere ọ dịghị ihe ọ bụla ọ dị mkpa n’ezie ka e mee ngwa ngwa iji jee nyochaa ha mgbe a zụtasịworo ha. Otu aka ahụ, na mmadụ lụrụ nwunye ekwesịghị igbochi ya ịnakwere ọkpụkpọ òkù dị mkpa otú a. Ya mere mgbe ọ nụrụ arịrịọ nhapụ nile ndị ahụ, onye kpọrọ òkù ahụ were iwe wee nye ohu ya iwu, sị:

“Pụọ ọsọ ọsọ gaa n’ámá nile na ụzọ nta nile nke obodo, kubata n’ebe a ndị ogbenye na ndị ọrụsị na ndị ìsì na ndị ngwụrọ. [“Mgbe oge ụfọdụ gasịrị,” NW] ohu ahụ wee sị, Onyenwe anyị, e mewo ihe i nyere n’iwu, ọnọdụ fọdụkwara. Onyenwe ụlọ ahụ wee sị ohu ya, Pụọ gaa n’ụzọ nile na ogige nile, rụgidekwa mmadụ ka ha bata, ka ụlọ m wee jupụta. . . . Ọ dịghị otu onye n’ime ndị ikom ndị a kpọworo ga-edetụ nri anyasị m ire.”

Ọnọdụ dị aṅaa ka a kọwara n’ihe atụ ahụ? “Onyenwe ụlọ ahụ” nke na-enye ihe oriri nọchiri anya Jehova; “ohu” ahụ nke na-eje ịkpọ òkù bụ Jisọs Kraịst; “nri anyasị ukwu” ahụ bụkwa ohere nile nke ịbanye n’Alaeze eluigwe.

Ndị e bu ụzọ kpọọ òkù iso ná ndị ga-abanye n’Alaeze ahụ bụ, karịsịa ndị ọzọ nile, ndị ndú okpukpe Juu nke oge Jisọs. Otú ọ dị, ha jụrụ ọkpụkpọ òkù ahụ. Otú a, malite na Pentikọst nke 33 O.A. karịsịa, e zipụrụ ọkpụkpọ òkù nke abụọ nye ndị e wedara n’ala ná mba ndị Juu. Ma ọnụ ọgụgụ zuru ezu azaghachighị iji mezuo 144,000 ọnọdụ ndị e nwere na Alaeze eluigwe Chineke. Ya mere na 36 O.A., mgbe afọ atọ na ọkara gasịrị, e zipụrụ ọkpụkpọ òkù nke atọ nye ndị na-abụghị ndị Juu, ndị a na-ebighịkwa úgwù, nchịkọta nke ndị dị otú ahụ nọgidekwara ruo n’ụbọchị anyị. Luk 14:​1-24.

▪ Ihe mmụta dị aṅaa ka Jisọs na-enye banyere iweda onwe onye ala?

▪ Olee otú onye nwe ụlọ pụrụ isi dokwaa nnọkọ oriri nke na-adị Chineke mma, n’ihi gịnịkwa ka ọ ga-eji wetara ya obi ụtọ?

▪ Gịnị mere o ji bụrụ na ngọpụ nke ndị ahụ a kpọrọ òkù enweghị isi?

▪ Gịnị ka ilu Jisọs banyere “nri anyasị ukwu” nọchiri anya ya?