Ebe A Ga-aga Maka Azịza

“Ozizi nke ahụhụ ebighị ebi ekwekọghị n’ịhụnanya Chineke maka ihe ndị e kere eke. . . . Ikwere na ntaramahụhụ ebighị ebi nke mkpụrụ obi n’ihi ihie ụzọ ndị e mere n’afọ ole na ole, n’enyeghị ya ohere maka mgbazi, bụ ihe ezi uche na-adịghị na ya.”—NIKHILANANDA ONYE ỌKÀ IHE ỌMỤMA HINDU.

1, 2. N’ihi ndịrịta iche nke nkwenkwe banyere Ndụ Mgbe A Nwụsịrị, ajụjụ ndị dị aṅaa na-ebilite?

DỊ KA onye ọkà mmụta Hindu a, ahụ adịghị eru ọtụtụ ndị ala taa n’ebe nkụzi mmekpa ahụ ebighị ebi dị. N’otu aka ahụ, ọ na-esiri ndị ọzọ ike ịghọta ụdị echiche ndị dị ka irute Nirvana na isoro Tao dị n’otu.

² Ma, n’ihi echiche nke na mkpụrụ obi adịghị anwụghị anwụ, okpukpe nke ma Ebe Ọwụwa Anyanwụ ma Ebe Ọdịda Anyanwụ akpalitewo mgbanwe ndị dị mgbagwoju anya na-esochi ibe ha nke nkwenkwe banyere Ndụ Mgbe A Nwụsịrị. Ọ̀ pụrụ ikwe omume ịmata eziokwu banyere ihe na-eme anyị mgbe anyị nwụrụ? Mkpụrụ obi ọ̀ bụ n’ezie ihe na-adịghị anwụ anwụ? Olee ebe anyị ga-aga maka azịza?

Sayensị na Nkà Ihe Ọmụma

3. Sayensị ma ọ bụ ụzọ e si eji sayensị achọpụta ihe ò nwere azịza maka ajụjụ ndị metụtara ịdị ndụ mgbe a nwụsịrị?

³ Sayensị ma ọ bụ ụzọ e si eji sayensị achọpụta ihe ò nwere azịza maka ajụjụ ndị metụtara Ndụ Mgbe A Nwụsịrị? N’ịdabere n’akụkọ ndị a na-akọ n’oge na-adịbeghị anya maka ahụmahụ nke ịfọ nke nta ka a nwụọ ma ọ bụ ‘ndị na-abụghị n’ime ahụ,’ ndị nchọpụta ụfọdụ anwawo ime nnyocha banyere ndụ mgbe a nwụsịrị. Ka ọ na-atụle nzọrọ ha ụfọdụ n’okwu ya bụ́ “Ọnwụ Ọ̀ Bụ Ụzọ E Si Aba n’Ìhè?,” ọkà mmụta okpukpe Katọlik bụ́ Hans Küng kwubiri, sị: “Ahụmahụ ndị dị otú a anwapụtaghị ihe ọ bụla banyere ikwe omume nke ndụ mgbe a nwụsịrị: ihe ndị a na-ezo aka nanị na minit ise ikpeazụ tupu ọnwụ, ọ bụghịkwa ná ndụ mgbe ebighị ebi mgbe ọnwụ gasịrị.” Ọ gbakwụnyere, sị: “Okwu banyere ndụ mgbe a nwụsịrị dị oké mkpa maka ndụ tupu ọnwụ. Ọ chọrọ azịza nke a na-aghaghị ịchọ n’ebe ọzọ ma ọ bụrụ na nkà ọgwụ apụghị inye ya.”

4. Nkà ihe ọmụma ọ̀ pụrụ inyere anyị aka ịchọta azịza n’etiti ọtụtụ ikwe omume nke ndụ mgbe a nwụsịrị nke okpukpe dị iche iche na-ekwe nkwa ya?

⁴ Gịnị banyere nkà ihe ọmụma? Ọ̀ pụrụ inyere anyị aka ịchọta azịza n’etiti ikwe omume nke ndụ mgbe a nwụsịrị bụ́ ndị okpukpe dị iche iche na-ekwe nkwa ya? Nchọpụta nkà ihe ọmụma na-agụnye “ọrụ ịkọ nkọ,” ka onye Britain bụ́ ọkà ihe ọmụma nke narị afọ 20 bụ́ Bertrand Russell na-ekwu. Nkà ihe ọmụma, dị ka The World Book Encyclopedia si kwuo, bụ “otu ụdị nke nchọpụta—usoro nnyocha, nkatọ, nkọwa, na ịkọ nkọ.” N’isiokwu nke Ndụ Mgbe A Nwụsịrị, ịkọ nkọ nke nkà ihe ọmụma anọwo na-adịrịta iche site n’ịkpọ anwụghị anwụ ọchịchọ efu a na-eche n’echiche gaa n’ịsị na ọ bụ ihe ruuru mmadụ ọ bụla site n’ọmụmụ.

Isi Iyi Pụrụ Iche nke Azịza

5. Olee akwụkwọ kasị ochie e detụworo?

⁵ Otú ọ dị, ọ dị akwụkwọ nke nwere azịza ndị bụ eziokwu nye ajụjụ ndị dị mkpa banyere ndụ na ọnwụ. Ọ bụ akwụkwọ kasị ochie e detụworo, nke e dere akụkụ ya ụfọdụ n’ihe dị ka afọ 3,500 gara aga. E dere akụkụ mbụ nke akwụkwọ a narị afọ ole na ole tupu e chepụta abụ ndị kasị ochie nke akwụkwọ nsọ Hindu, bụ́ Vedas, na ihe dị ka otu puku afọ tupu Buddha, Mahāvīra, na Confucius ebie ndụ n’ụwa. E dezuru akwụkwọ a na 98 O.A., ihe karịrị afọ 500 tupu Muḥammad eguzobe Alakụba. Isi iyi a pụrụ iche nke amamihe ka elu bụ Bible.a

6. N’ihi gịnị ka anyị ga-eji tụọ anya na Bible ga-agwa anyị ihe mkpụrụ obi bụ?

⁶ Bible nwere akụkọ ihe mere eme mgbe ochie kasị zie ezie n’etiti akwụkwọ nile dị adị. Akụkọ ihe mere eme e dekọrọ na Bible dịrị laa azụ ruo ná mmalite nke ezinụlọ mmadụ, na-akọwakwa otú anyị si bịa n’ụwa ebe a. Ọbụna ọ na-akpọrọ anyị laa azụ ruo n’oge dị tupu e kee mmadụ. N’ezie akwụkwọ dị otú ahụ pụrụ ime ka anyị ghọta ụzọ e si kee mmadụ na ihe mkpụrụ obi bụ.

7, 8. N’ihi gịnị ka anyị pụrụ iji were obi ike chigharịkwuru Bible maka azịza ndị bụ eziokwu, na-ejukwa afọ banyere ihe na-eme mgbe anyị nwụrụ?

⁷ Ọzọkwa, Bible bụ akwụkwọ nke nwere amụma ndị mmezu ha na-adịghị ehie ụzọ. Dị ka ihe atụ, o buru amụma banyere mbilite na ọdịda nke alaeze ukwu Midia na Peasia na Gris n’ụzọ zuru ezu. Okwu ndị a ziri nnọọ ezi nke na ụfọdụ ndị nkatọ nwara, n’efu, iji nwapụta na e dere ha mgbe ihe ndị ahụ mesịrị. (Daniel 8:1-7, 20-22) Amụma ụfọdụ e dekọrọ na Bible na-emezu n’ụzọ zuru ezu n’oge anyị kpọmkwem.b—Matiu, isi 24; Mak, isi 13; Luk, isi 21; 2 Timoti 3:1-5, 13.

⁸ Ọ dịghị mmadụ ọ bụla, n’agbanyeghị otú o si nweruo ọgụgụ isi, nke pụrụ ịkọ ihe ndị ga-eme n’ọdịnihu n’ụzọ ziri ezi otú ahụ. Nanị Onye Okike eluigwe na ala nke kasị ike ma kasị mara ihe pụrụ. (2 Timoti 3:16, 17; 2 Pita 1:20, 21) Bible bụ n’ezie akwụkwọ sitere n’aka Chineke. N’ezie, akwụkwọ dị otú ahụ pụrụ inye anyị azịza ndị bụ eziokwu, na-ejukwa afọ banyere ihe na-eme anyị mgbe anyị nwụrụ. Ka anyị buru ụzọ hụ ihe o nwere ikwu banyere mkpụrụ obi.

[Ihe ndị e dere n’ala ala peeji]

[Foto dị na peeji nke 18]

Akwụkwọ kasị ochie e detụworo

[Foto dị na peeji nke 18]

Akwụkwọ nke na-enye azịza ndị a pụrụ ịdabere na ha, ndị na-ejukwa afọ