Nkwa Ndị Izrel Kwere Jehova

Ihe dị ka ọnwa abụọ ndị Izrel hapụchara Ijipt, ha ruru n’Ugwu Saịnaị ma maa ụlọikwuu ha n’ebe ahụ. Jehova gwara Mosis ka ọ gbagoro n’ugwu ahụ. Mgbe Mosis gbagooro, ọ gwara ya, sị: ‘M napụtala ndị Izrel. Ọ bụrụ na ha erubere m isi ma debe iwu m, ha ga-abụrụ m ndị pụrụ iche.’ Mosis laghachiri n’ebe ndị Izrel nọ ma kọọrọ ha ihe Jehova kwuru. Olee ihe ndị Izrel kwuru? Ha kwuru, sị: ‘Anyị ga-eme ihe niile Jehova gwara anyị mee.’

Mosis gaghachiri n’ugwu ahụ. Jehova gwaziri ya, sị: ‘N’ụbọchị nke atọ, m ga-agwa gị okwu. Gwa ndị Izrel ka ha ghara ịgbago n’Ugwu Saịnaị.’ Mosis gakwuuru ndị Izrel ma gwa ha ka ha jikere ịnụ ihe Jehova ga-agwa ha.

N’ụbọchị atọ, ndị Izrel hụrụ ígwé ojii n’ugwu ahụ, hụkwa ka àmụ̀mà na-egbu na ya. Ha nụkwara ụda égbè eluigwe na ụda opi na-adasi ike. Jehova jizi ọkụ gbadata n’ugwu ahụ. Ezigbo ụjọ tụwara ndị Izrel nke na ha mawara jijiji. Ugwu ahụ niile nọ na-akwụ anwụrụ ọkụ ma na-ama jijiji. Ụda opi ahụ nọkwa na-adasikwu ike. Chineke gwaziri ha, sị: ‘Abụ m Jehova. Unu efela chi ọ bụla ọzọ.’

Mosis gaghachiri n’ugwu ahụ, Jehova enye ya iwu ọ ga-enye ndị Izrel gbasara otú ha kwesịrị isi na-efe ya na otú ha kwesịrị isi na-akpa àgwà. Mosis dere iwu ndị ahụ ede ma gụọrọ ha ndị Izrel. Ha kwere nkwa, sị: ‘Anyị ga-eme ihe niile Jehova gwara anyị mee.’ Ihe a bụ otú ndị Izrel si kwe Chineke nkwa. Ma, hà ga-emezunụ ya?