Jehoyada Katara Obi

Jezibel mụrụ nwa nwaanyị aha ya bụ Atalaya. Atalaya bụ ajọ nwaanyị ka mama ya. Atalaya bụ nwunye eze Juda. Mgbe di ya nwụrụ, nwa ya nwoke malitere ịchị Juda. Ma, mgbe nwa ya nwoke a nwụrụ, Atalaya mere onwe ya eze nwaanyị, malite ịchị Juda. O gburu onye ọ bụla si n’ezinụlọ eze nwere ike ịnọchi ya. O gbudịrị ụmụ ụmụ ya ndị nwoke. Onye ọ bụla na-atụ ya ụjọ.

Nnukwu Onye Nchụàjà bụ́ Jehoyada na Jehoshiba nwunye ya ma na ihe ahụ Atalaya na-eme jọgburu onwe ya. Ha zoro otu n’ime ụmụ ụmụ Atalaya n’agbanyeghị na Atalaya nwere ike igbu ha ma ọ mata. Aha nwa ahụ bụ Jehoash. Ha zụlitere ya n’ụlọ nsọ.

Mgbe Jehoash dị afọ asaa, Jehoyada kpọkọtara ndị isi niile na ndị Livaị ma gwa ha, sị: ‘Cheenụ ọnụ ụzọ ụlọ nsọ nche, unu ekwekwala onye ọ bụla bata.’ Jehoyada meziri Jehoash eze Juda ma kpuwe ya okpueze. Ndị Juda malitere iti mkpu, sị: “Eze, ị ga-adị ogologo ndụ!”

Mgbe eze nwaanyị bụ́ Atalaya nụrụ mkpu ha na-eti, ọ gbaara gaa n’ụlọ nsọ ozugbo. Mgbe ọ hụrụ eze ọhụrụ ahụ, o tiri mkpu, sị: “Ha agbaala m mgba okpuru! Ha agbaala m mgba okpuru!” Ndị isi ahụ jidere ya, kpọpụ ya n’ụlọ nsọ ma gbuo ya. Gịnịkwanụ ka a ga-eme maka ihe ọjọọ Atalaya mere ka ndị Juda na-eme?

Jehoyada mere ka ndị Juda na Jehova gbaa ndụ, ha ekwe Jehova nkwa na ọ bụ naanị ya ka ha ga na-efe. Jehoyada mere ka ha kụtuo ebe a na-achụrụ Bel àjà ma kụrisie arụsị ndị dị ebe ahụ. Ọ họpụtara ndị nchụàjà na ndị Livaị ka ha rụwa ọrụ ha n’ụlọ nsọ, ka ndị mmadụ nwee ike ịnọ ebe ahụ fewekwa Chineke. Ọ họpụtakwara ndị ga na-eche ụlọ nsọ nche ka onye na-adịghị ọcha ghara ịbanye na ya. Jehoyada na ndị isi Izrel kpọọrọ Jehoash gaa n’obí eze ma mee ka ọ nọrọ n’ocheeze. Ihe a mere ka ndị Juda ṅụrịa ọṅụ. Ugbu a Atalaya nwụrụla, e bibiekwa Bel, ndị Juda enwerela onwe ha ife Jehova. Ị̀ hụrụ na otú a Jehoyada si kata obi baara ọtụtụ ndị uru?