Ndụ na Ije Ozi Jisọs

“Lee, Nwoke Ahụ!”

N’IBỤ onye otú Jisọs si mee omume masịrị, n’ịmatakwa na ọ bụ onye ikpe na-amaghị, Paịlat chọrọ ụzọ ọzọ ọ ga-esi tọhapụ ya. Ọ gwara ìgwè mmadụ ahụ, sị, “Unu nwere omenala, ka m hapụrụ unu otu onye n’ememe ngabiga.”

E jikwa Barabas eji, bụ́ onye ogbu mmadụ a ma ama, dị ka onye mkpọrọ, ya mere Paịlat jụrụ, sị: “Ònye ka unu na-achọ ka m hapụrụ unu? Barabas, ma ọ bụ Jisọs onye a na-akpọ Kraịst?”

N’ịbụ ndị ndị isi nchụaja ahụ rụgidere, bụ́ ndị kpaliworo ha, ndị ahụ rịọrọ ka a tọhapụ Barabas ma gbuo Jisọs. N’ekwenyeghịrị ha ngwa ngwa, Paịlat zaghachiri, na-ajụ ọzọ, sị: “Ònye n’ime mmadụ abụọ ahụ ka unu na-achọ ka m hapụrụ unu?”

Ha tiri mkpu, sị, “Barabas.”

Paịlat ji iwe jụọ ha, sị, “Ọ̀ bụ gịnị ka m ga-emekwa Jisọs onye a na-akpọ Kraịst?”

Ha ji oké iti mkpu zaghachi n’otu olu, sị: ‘Ka a kpọgbuo ya!’ ‘Kpọgbuo ya! Kpọgbuo ya!’

N’ịmata na ha na-achọ ka e gbuo onye na-emeghị ihe ọjọọ ọ bụla, Paịlat jụrụ ha, sị: “Ee e, n’ihi na onye a mere ihe ọjọọ gịnị? Ahụghị m ihe kwesịrị ịnwụ anwụ n’ahụ ya: ya mere m ga-adọ ya aka ná ntị, wee hapụ ya.”

N’agbanyeghị mgbalị ya nile, ìgwè mmadụ ahụ a kpasuworo iwe, n’ịbụ ndị ndị ndú okpukpe ha kpaliri, nọgidere na-eti mkpu, sị: ‘Ka a kpọgbuo ya!’ N’ịbụ ndị ndị nchụaja ahụ kpalibigara ókè, ìgwè mmadụ ahụ chọrọ ọbara. Cheedị nnọọ echiche, nanị ụbọchị ise tupu mgbe ahụ, ma eleghị anya ụfọdụ n’ime ha so ná ndị ahụ nabatara Jisọs na Jerusalem dị ka Eze! N’ime oge ahụ nile, ndị na-eso ụzọ Jisọs, ọ bụrụ na ha nọ n’ebe ahụ, nọrọ n’ekwughị okwu ọ bụla, n’ebe ndị mmadụ na-agaghị ahụkwa ha.

Paịlat, mgbe ọ hụrụ na arịrịọ nile ọ na-arịọ adịghị arụpụta ezi ihe ọ bụla, kama nke ahụ, na oké iti mkpu na-ebilite, o weere mmiri wee kwọọ aka ya abụọ n’ihu ìgwè mmadụ ahụ wee sị: “Ikpe ọbara onye ezi omume a amaghị m: unu onwe unu lee nke ahụ.” Mgbe o kwuru nke ahụ, ìgwè mmadụ ahụ wee zaa, sị: “Ọbara ya dị anyị n’isi, dịkwa n’isi ụmụ anyị,”

Ya mere, n’imere ha ihe ha chọrọ—n’ịchọkwa ime ihe ga-atọ ìgwè mmadụ ahụ ụtọ karịa ime ihe ọ maara na o ziri ezi—Paịlat tọhapụụrụ ha Barabas. Ọ kpọọrọ Jisọs, mee ka e yipụsịa ya uwe ma pịa ya ụtarị. Nke a abụghị ịpịa ụtarị nkịtị. Akwụkwọ bụ The Journal of the American Medical Association na-akọwa ihe omume ndị Rom nke ịpịa ụtarị, sị:

“Ihe a na-ejikarị eme ihe bụ ụtarị dị mkpirikpi (flagrum ma ọ bụ flagellum) nke nwere ọtụtụ eriri akpụkpọ anụ nọ otu otu ma ọ bụ a kpara akpa nke ịdị ogologo ha dị iche iche, bụ́ ndị e kenyesịrị mkpụrụ ihe ígwè ma ọ bụ iberibe ọkpụkpụ atụrụ ndị dị nkọ n’ebe dị iche iche. . . . Ka ndị agha Rom na-eji ike ha nile na-apịa mmadụ ihe ahụ n’azụ ugboro ugboro, mkpụrụ ihe ígwè ndị ahụ na-akpata mmerụahụ dịgasị omimi, eriri akpụkpọ anụ na ọkpụkpụ atụrụ ndị ahụ ga-akawasịkwa akpụkpọ ahụ onye ahụ ma kabanye n’ime ahụ. Mgbe ahụ, ka ịpịa ụtarị ahụ na-aga n’ihu, mmerụ ahụ ndị ahụ ga-abanye n’ime uru ahụ ndị dị n’okpuru akpụkpọ ahụ wee na-adọkapụtasị iberibe anụ ahụ ndị na-agba ọbara.”

Mgbe e tisịrị ya ihe n’ụzọ jọgburu onwe ya otú a, ha kpọọrọ Jisọs banye n’obieze onye ọchịchị ahụ, a kpọkọtakwara ìgwè ndị agha nile. N’ebe ahụ, ndị agha kwara emo ya gaa n’ihu site n’ịkpa otu okpueze e ji ogwu mee wee kpukwasị ya n’isi. Ha tinyere ya otu amị̀ n’aka nri ya, wee yikwasị ya uwe odo odo, bụ́ ụdị ahụ ndị eze na-eyi. Ha wee malite ịgwa ya n’ụzọ ịkwa emo, sị: “Ekele, Eze ndị Juu!” Ha bụsakwara ya ọnụ mmiri wee tie ya ihe n’ihu. N’ịnapụ ya amị̀ ahụ siri ike n’aka, ha ji ya tie ya ihe n’isi, na-akụmikwu ogwu ndị ahụ na-adụ adụ nke “okpueze” ahụ e ji na-eweda ya n’ala.

Ịdị ùgwù na ike dị ịrịba ama nke Jisọs nwere n’agbanyeghị mmeso ọjọọ nke a kpaliri Paịlat nke ukwuu nke na o mere mgbalị ọzọ ịnapụta ya. Ọ gwara ìgwè mmadụ ndị ahụ, sị, “Lee, ana m ekupụta ya n’èzí nye unu, ka unu wee mara na ahụghị m ihe kwesịrị ahụhụ mmehie n’ime ya.” Ma eleghị anya o chere na ịhụ Jisọs mgbe ọ nọ n’ọnọdụ ịta ahụhụ ga-emeda obi ha. Ka Jisọs na-eguzo n’ihu ìgwè mmadụ ahụ obi tara mmiri, na-eyi okpueze ahụ e ji ogwu mee na uwe odo odo ahụ, na ihu ọbara na-agba nke na-egosikwa ịta ahụhụ nke ihe mgbu, Paịlat kwupụtara, sị: “Lee, Nwoke ahụ!”

Ọ bụ ezie na e merụsịwo ya ahụ nke ukwuu, n’ebe a ka onye kasị pụta ìhè n’akụkọ ihe mere eme nile na-eguzo, n’ezie nwoke kasị ukwuu nke dịworo ndụ mgbe ọ bụla! Ee, Jisọs gosiri ịdị ùgwù na ịdị nwayọọ nke na-egosipụta ịdị ukwuu nke ọbụna Paịlat na-aghaghị ịnakwere, n’ihi na o yiri ka okwu ya ọ̀ bụ ngwakọta nke ma nsọpụrụ ma obi ebere. Jọn 18:39–19:5; Matiu 27:15-17, 20-30; Mak 15:6-19; Luk 23:18-25.

◆ N’ụzọ dị aṅaa ka Paịlat si nwaa ime ka a tọhapụ Jisọs?

◆ Olee ụzọ Paịlat si gbalịa igosi na ikpe amaghị ya?

◆ Gịnị ka ịbụ onye a pịara ụtarị gụnyere?

◆ Olee ụzọ e si kwaa Jisọs emo mgbe a pịasịrị ya ụtarị?

◆ Mgbalị ọzọ dị aṅaa ka Paịlat mere ịtọhapụ Jisọs?