Paradaịs Ma Ọ Bụ Ebe Mkpofu Ihe—Olee nke Ị Họọrọ?

Ọ DỊGHỊ onye gaara akpọ ya ihe ọzọ ma ọ bụghị ihe ọ bụ: onye Europe na-eme mkpagharị nke nwere mkpa ezumike ma chọsie ike ịnyara anwụ n’otu agwaetiti yiri paradaịs. N’ịgafe ájá uzuzu sara mbara nke dị n’ụsọ osimiri ahụ, o ji nlezianya na-ezere ịzọnye ụkwụ n’ololo, kom kom, akpa wọtapruf, akwụkwọ chingọm na ihe nracha, akwụkwọ akụkọ na magazin ndị a tụfuru aghara aghara n’ụzọ ahụ. Ebe o doro anya na iwe were ya, o juru ya anya ma nke a ọ̀ bụ paradaịs ahụ nke o meworo njem irute na ya.

Ì nwetụwo ahụmahụ yiri nke ahụ? N’ihi gịnị ka ndị mmadụ ji arọ nrọ banyere ịga ezumike ha n’ebe yiri paradaịs, ma ozugbo ha ruru n’ebe ahụ, ọ na-eyi ka ọ bụ na ọ dịghị emetụ ha n’ahụ n’ime ya ka ọ ghọọ ezigbo ebe mkpofu ihe?

Ọ Bụghị Nanị na “Paradaịs”

Nleda nke a doro anya a na-eleda ịma mma, ịdị n’usoro, na ịdị ọcha abụghị nanị nke a na-eme n’ebe ndị ahụ yiri “paradaịs,” bụ́ ebe ọtụtụ ndị na-eme mkpagharị na-enuga. E tiwo ọha mmadụ nke oge a ihe otiti site ná mmetọ nke fọrọ ntakịrị ka ọ bụrụ n’ebe nile. Ọtụtụ ọrụ azụmahịa na-akpata mmetọ n’ọ̀tụ̀tụ̀ buru ibu site n’imepụta ọtụtụ tọn nke ihe ndị a na-ekpofu ekpofu. Ihe ndị na-egbu egbu a na-ekpofughị nke ọma na mmanụ ndị kwafuru n’ihe ọghọm na-eyi egwu ibibi ókèala buru ibu nke elu ala anyị, na-eme ka ha ghara ịdị mma maka ndụ.

Agha na-akpatakwa mmetọ. Ka ụwa nọ na-ele anya n’ụjọ, agha Persian Gulf ahụ a lụrụ na 1991 wepụtara usoro ọhụrụ. Ndị agha Iraq leziri anya mụnye ọkụ n’ihe dị ka 600 ọdọ mmanụ, na-agbanwe Kuwait “ịghọ ọhụụ apọkalip nke hell,” dị ka otu akwụkwọ akụkọ Europe si kọwaa ya. Magazin ndị Germany bụ́ Geo kpọrọ ọkụ ọgbụgba ahụ “mbibi gburugburu ebe obibi kasị ukwuu nke mmadụ jiworo aka ya kpata.”

Mgbe agha ahụ biri, a malitere ọrụ mkpocha ozugbo ahụ. Nanị ịgbanyụ ọdọ mmanụ ndị ahụ na-agba ọkụ were ọtụtụ ọnwa nke ịrụsi ọrụ ike. Òtù Ahụ Ike Ụwa kọrọ na mmetọ ahụ nọgidere na-amụba na Kuwait pụrụ ime ka ọ̀tụ̀tụ̀ ihe ji anwụ n’ebe ahụ jiri 10 pasent mụbaa.

Nke Dị Ize Ndụ Dị Ala ma Na-akpasu Nnọọ Iwe

Maka ihe atụ ọ bụla pụtara ìhè ma doo anya banyere mmetọ gburugburu ebe obibi n’ọ̀tụ̀tụ̀ buru ibu, e nwere ọtụtụ puku ihe atụ ndị nke ọ̀tụ̀tụ̀ ha dị nta. Ndị na-atụfukarị ihe n’ogige ọha na “ndị na-ese ihe” nsekasị pụrụ ịbụ ndị mmetọ dị ize ndụ dị ala, ma otú o sina dị ha na-ekere òkè n’ịnapụ mbara Ala ohere o nwere ịdị ka paradaịs.

N’ebe ụfọdụ ihe nsekasị na-ejupụta n’ebe nile nke na ụmụ amaala aghọwo ndị “kpuru ìsì ịhụ ihe nsekasị,” ndị ọ na-esiri ike ịchọpụta na ha dị. Ha dị n’ụgbọ okporo ígwè, n’ahụ ájá nke ihe owuwu dị iche iche, nakwa n’ụlọe telifon ọha. Ihe nsekasị ndị ahụ abụkwaghị nke a na-ahụ nanị n’ahụ ájá nke ụlọ mposi ọha.

Obodo ukwu ụfọdụ jupụtara ná mkpọmkpọ ụlọ ndị mmadụ na-ebighị na ha. A na-emetọ ógbè ndị mmadụ bi site n’ebe obibi na ogige ndị ruru unyi. Ụgbọ ala ndị kụkara akụka, ígwè ọrụ ndị a tụfuru atụfu na ngwọngwọ na ngwọngwọ jupụtara n’ala ebe e nwere ihe ọkụkụ ndị gaara adị mma ile anya ma à sị na ihe ndị ahụ adịghị na ha.

N’ebe ụfọdụ o yiri ka inwe ahụ ruru unyi ma dị nkịkara adịghị emetụ ndị mmadụ n’ahụ. Ọ pụrụ ịbụ na ịgagharị n’uwe na ejiji dị nkịkara abụghị nanị ihe a na-anakwere kama ọbụna ihe na-ewu ewu. A na-ele ndị na-aghọta mkpa ọ dị ịdị n’usoro na ịdị ọcha anya dị ka ndị na-eme nnọọ ihe mgbe ochie.

Lee Aha Oké Ọrụ Ọ Bụ!

Lee aha oké ọrụ mkpocha ga-adị mkpa iji gbanwee ụsọ osimiri, oké ọhịa, na ugwu nile nke ebe obibi ụwa anyị ịghọ paradaịs ndị ahụ a na-ese n’ihu magazin nkọwa nke ndị na-eme mkpagharị na-agụ​—⁠ma ya fọdụzie ihe a na-aghaghị ime n’obodo ukwu, nnukwu obodo, na ugbo dị iche iche nakwa ndị mmadụ n’onwe ha!

Onye ahụ na-eme mkpagharị e hotara na mbụ nwere obi ụtọ ịhụ ndị ọrụ mkpocha ka ha na-arụ ọrụ n’ebe ahụ mgbe e mesịrị n’ụbọchị ahụ, na-ekpochapụ ụmụ ngwongwo na ngwongwo buru ibu. Otú ọ dị, ha hapụrụ mpekere tọmbla wara awa, okwuchi ololo, kom kom, na ọtụtụ ike sịga a na-apụghị ịgụta ọnụ. Ya mere ọbụna mgbe mkpocha ahụ gasịrị, a ka nwere ọtụtụ ihe na-egosi na mbara ala ahụ yikarịrị ebe mkpofu ihe karịa paradaịs.

Mkpocha zuru ụwa ọnụ iji zọpụta mbara Ala ka ọ ghara ịghọ ebe mkpofu ihe zuru ụwa ọnụ ga-achọ ka e kpochapụ ihe àmà nile dị otú ahụ nke ihe otiti ndị a. È nwere olileanya ọ bụla na mkpocha dị otú ahụ ga-ewere ọnọdụ? Ya bụrụ otú ahụ, n’ụzọ dị aṅaa? Olee ndị ga-eme ya? Olee mgbe?