Ndị Nne na Nna, Nyerenụ Ụmụ Unu Aka Ka Ha “Mara Ihe Iji Nweta Nzọpụta”

1, 2. Gịnị nwere ike ime ka ndị nne na nna ụfọdụ na-echegbu onwe ha ma ụmụ ha chọọ inyefe Jehova onwe ha, e meekwa ha baptizim?

ỌTỤTỤ puku ndị anyị na-amụrụ Baịbụl na-enyefe Jehova onwe ha, e meekwa ha baptizim. Ọtụtụ n’ime ha bụ ndị na-eto eto a mụrụ n’ọgbakọ ma ha kpebiri iji ndụ ha na-eme ihe bara uru. (Ọma 1:1-3) Ọ bụrụ na ị bụ nne ma ọ bụ nna bụ́ Onye Kraịst, o doro anya na ị na-atụsi anya ụbọchị a ga-eme nwa gị baptizim, ike.—Tụlee 3 Jọn 4.

² Ma, e nwere ihe ndị nwere ike ịna-echegbu gị. O nwere ike ịbụ na ị hụla ụfọdụ ụmụ okoro na agbọghọ e merela baptizim, ma ka oge na-aga, ha amalite ịna-eche ma ime ihe Chineke kwuru ọ̀ baara ha uru. Ụfọdụ n’ime ha apụọla n’ọgbakọ. Ma, i nwere ike na-eche na nwa gị nwere ike malite ife Jehova, ma ka oge na-aga, ọ gaghịzi eji ọgbakọ kpọrọ ihe. O nwere ike ịdị ka ụfọdụ ndị nọ n’ọgbakọ Efesọs n’oge ndịozi, bụ́ ndị Jizọs gwara, sị: ‘Unu ahapụwo ịhụnanya ahụ unu nwere na mbụ.’ (Mkpu. 2:4) Olee otú i nwere ike isi mee ka ụdị ihe a ghara ime nwa gị, ma nyere ya aka ka o “toruo nzọpụta.” (1 Pita 2:2) Iji zaa ajụjụ a, ka anyị tụlee banyere Timoti.

“Ị MAARA IHE ODIDE NDỊ AHỤ DỊ NSỌ”

3. (a) Olee otú Timoti si ghọọ Onye Kraịst? Olee otú o si na-eme ihe ndị ọ mụtara? (b) Gịnị bụ ihe atọ Pọl gwara Timoti gbasara ha?

³ Pọl onyeozi gara Listra n’afọ 47. Ọ ga-abụ mgbe Timoti, bụ́ onye nwere ike ịbụ nwa okorobịa n’oge ahụ, mụtara banyere ihe Jizọs na-akụzi. Ọ nọ na-eme ihe ọ mụtara na Baịbụl. Mgbe afọ abụọ gachara, ya na Pọl malitere iso na-aga ozi ọma. Mgbe ihe dị ka afọ iri na isii gachara, Pọl degaara Timoti akwụkwọ ozi, sị: “Nọgide n’ihe ndị ị mụtara, ndị e mekwara ka i kwere, ebe ị maara ndị i si n’aka ha mụta ha, ebe ị makwaara na ọ bụ malite n’oge ị bụ nwa ọhụrụ ka ị maara ihe odide ndị ahụ dị nsọ [Akwụkwọ Nsọ Hibru], bụ́ ndị nwere ike ime ka ị mara ihe iji nweta nzọpụta site n’okwukwe i nwere n’ime Kraịst Jizọs.” (2 Tim. 3:14, 15) Cheta na Pọl kwuru gbasara (1) ịmara ihe odide ndị ahụ dị nsọ, (2) ime ka i kwere n’ihe ndị ị mụtara, na (3) ịmara ihe iji nweta nzọpụta site n’okwukwe i nwere n’ime Kraịst Jizọs.

4. Olee ihe ndị i jirila kụziere ụmụ gị ndị dị obere ihe? (Lee ihe e sere ná mmalite isiokwu a.)

⁴ Ebe ị bụ nne ma ọ bụ nna bụ́ Onye Kraịst, ị chọrọ ka nwa gị mara ihe odide ndị ahụ dị nsọ. Taa, ha bụ Akwụkwọ Nsọ Hibru na Akwụkwọ Nsọ Grik. Obere ụmụaka nwere ike ịmụta banyere ndị a kọrọ akụkọ ha na Baịbụl nakwa akụkọ ndị a kọrọ na Baịbụl. Nzukọ Jehova ewepụtarala anyị ọtụtụ ihe ndị nne na nna nwere ike iji na-akụziri ụmụ ha ihe. Ì nwere ike icheta ụfọdụ n’ime ha dị n’asụsụ gị? Nwa gị kwesịrị ịma ihe Baịbụl na-ekwu ka ya na Jehova nwee ike ịdị n’ezigbo mma.

‘IME KA I KWERE’

5. (a) Gịnị ka ‘ime ka i kwere’ pụtara? (b) Olee otú anyị si mara na e mere ka Timoti kwere n’ihe a kụziiri ya banyere Jizọs?

⁵ Ịma ihe odide ndị dị nsọ dị mkpa. Ma, ịkụziri ụmụaka banyere ndị a kọrọ akụkọ ha na Baịbụl nakwa ihe ndị mere eme a kọrọ na Baịbụl abụghị ebe okwu biri. E mere ka Timoti “kwere.” Ihe okwu Grik e si na ya sụgharịa “ka i kwere” pụtara bụ “ime ka obi sie mmadụ ike” ma ọ bụ “ime ka mmadụ kwetasie ike na ihe o kweere bụ eziokwu.” Timoti ma Akwụkwọ Nsọ Hibru malite mgbe ọ bụ nwa ọhụrụ. O mechara kweta na Jizọs bụ Mesaya. E nwere ike ikwu ya n’ụzọ ọzọ na ihe ndị ọ mụtara mere ka okwukwe ya sikwuo ike. Nke bụ́ eziokwu bụ na Timoti kwetasiri ike banyere ihe a kụziiri ya nke na e mere ya baptizim, ya esoro Pọl na-eje ozi ala ọzọ.

6. Olee otú ị ga-esi nyere ụmụ gị aka ka ha kwere n’ihe ha na-amụta n’Okwu Chineke?

⁶ Olee otú ị ga-esi mee ka okwukwe ụmụ gị sie ike ka Timoti, ka e nwee ike ime ka ha kwere? Nke mbụ bụ inwe ndidi. Ime ka mmadụ kwere n’ihe a kụziiri ya na-ewe oge. Ọ bụghịkwanụ ihe ị ga-ebufere ụmụ gị naanị n’ihi na e mere ka i kwere. Nwa gị nke ọ bụla kwesịrị iji “ike iche echiche” ya kweta n’eziokwu Baịbụl. (Gụọ Ndị Rom 12:1.) Gịnwa bụ́ nne ma ọ bụ nna nwere ọrụ dị mkpa ị ga-arụ iji mee ka okwukwe nwa gị sie ike, nke ka nke, ma ọ jụọ gị ajụjụ. Ka anyị tụlee otu ihe atụ.

7, 8. (a) Olee otú otu nna bụ́ Onye Kraịst si nwee ndidi mgbe ọ na-akụziri nwa ya ihe? (b) Olee mgbe i nweerela nwa gị ụdị ndidi ahụ?

⁷ Otu nna aha ya bụ Thomas nwere nwa nwaanyị dị afọ iri na otu. Ọ sịrị: “Nwa m nwere ike ịjụ, sị, ‘Ọ̀ ga-abụ na Jehova kere otu ihe, ihe ahụ e jiri nwayọọ nwayọọ ghọọ ihe ndị ọzọ dị ndụ?’ ma ọ bụ, ‘Gịnị mere anyị anaghị atụ vootu iji mee ka ihe ka mma?’ Mgbe ụfọdụ, ana m ejide onwe m ka m ghara ịgwa ya ozugbo ihe ọ ga-ekwere. A sị ka e kwuwe, ihe ga-eme ka mmadụ kweta na ihe a kụziiri ya bụ eziokwu abụghị otu ọkpụrụkpụ ihe. Kama, ọ bụ ụmụ irighiri ihe ga-eme ka o kweta.”

⁸ Thomas makwa na o kwesịrị inwe ndidi ka o nwee ike ịkụziri nwa ya ihe. Nke bụ́ eziokwu bụ na Ndị Kraịst niile kwesịkwara inwe ndidi. (Kọl. 3:12) Thomas ghọtara na ya na nwa ya ga-ekwurịta okwu ọtụtụ ugboro ka nwa ya nwee ike ikweta n’ihe ọ na-ekwu. Ya na nwa ya ga-ekwurịta ihe dị na Baịbụl ka o nyere ya aka ikweta n’ihe ọ na-amụ. Thomas kwuru, sị: “Mụ na nwunye m na nwa anyị kwuwe ihe dị mkpa, anyị ga-achọ ịmata ma ò kwetara n’ihe ọ na-amụ, nakwa ma ọ̀ ghọtara ya. Obi na-atọ anyị ụtọ ma ọ jụọ anyị ajụjụ. N’eziokwu, m na-echegbu onwe m ma ọ bụrụ na o kweta n’ihe ahụ n’ajụghị anyị ajụjụ.”

9. Olee otú i nwere ike isi nyere nwa gị aka ka o kweta n’ihe Okwu Chineke na-ekwu?

⁹ Ndị nne na nna jiri ndidi na-akụziri ụmụ ha ihe, ka oge na-aga, ụmụ ha ga-aghọtawa ihe ndị dị “obosara na ịdị ogologo na ịdị elu na ịdị omimi” dị n’ihe ndị ha kweere. (Efe. 3:18) Anyị kwesịrị iji ihe ha ga-aghọtali n’ihi afọ ndụ ha nọ na ya na-akụziri ha ihe. Ka ha na-ekwetasikwu ike n’ihe ndị ha na-amụta, ọ ga-adịrị ha mfe ịkọrọ ndị ọzọ ihe ndị ha kweere, ma ụmụ akwụkwọ ibe ha. (1 Pita 3:15) Dị ka ihe atụ, ụmụ gị hà nwere ike iji Baịbụl kọwaara mmadụ ebe mmadụ na-aga ma ọ nwụọ? Otú Baịbụl si kọwaa ya, hà ghọtara ya?a Cheta na i kwesịrị inwe ndidi iji nyere nwa gị aka ka o kweta n’ihe Okwu Chineke na-ekwu, ma mbọ ị gbara inyere ya aka efughị ọhịa.—Diut. 6:6, 7.

10. Gịnị bụ ihe dị mkpa so n’ihe ị na-akụziri ụmụ gị?

¹⁰ Ma, ka nwa gị nwee ike ikweta n’ihe ọ na-amụ, gịnwa ga-ebu ụzọ kweta na ha. Otu nne aha ya bụ Stephanie mụrụ ụmụ nwaanyị atọ. O kwuru, sị: “Kemgbe ụmụ m dị obere, m na-ajụ onwe m, sị: ‘M̀ na-agwa ụmụ m ihe mere m ji kwere na Jehova dị, na ọ hụrụ m n’anya, nakwa na ụzọ ya ziri ezi? Ụmụ m, hà ma na m hụrụ Jehova n’anya n’eziokwu?’ Agaghị m atụ anya ka ụmụ m kwere, ọ gwụkwala ma m kweere.”

‘ỊMARA IHE IJI NWETA NZỌPỤTA’

11, 12. Gịnị bụ amamihe? Gịnị mere anyị ga-eji kwuo na ọ bụghị afọ ndụ ga-eme ka mmadụ nwee amamihe?

¹¹ Anyị amụtala na Timoti (1) ma Akwụkwọ Nsọ nke ọma nakwa na (2) o kwetasiri ike n’ihe o kweere. Ma, olee ihe Pọl bu n’obi kwuo na ihe odide dị nsọ nwere ike ime ka Timoti “nweta nzọpụta”?

¹² Akwụkwọ bụ́ Insight on the Scriptures, Mpịakọta nke 2, kọwara na otu n’ime ihe amamihe pụtara na Baịbụl bụ “mmadụ iji ihe ọ ma na ihe ọ ghọtara na-edozi nsogbu nke ọma, na-agbara nsogbu ọsọ, na-eme ihe ụfọdụ ọ chọrọ ime, ma ọ bụ na-agwa ndị ọzọ ka ha mee otú ahụ. Ọ dị iche ná nzuzu.” Baịbụl kwuru na “nzuzu ka e kekọtara ya na obi nwata.” (Ilu 22:15) Ebe ọ bụ na amamihe dị iche na nzuzu, amamihe bụ otu n’ime ihe e ji ama onye tozuru okè. Ihe na-eme ka mmadụ bụrụ Onye Kraịst tozuru okè abụghị afọ ndụ ya, kama ọ bụ na onye ahụ na-atụ egwu Chineke ma dị njikere ịna-erubere ya isi.—Gụọ Abụ Ọma 111:10.

13. Olee otú ụmụ okoro na agbọghọ ga-esi gosi na ha ma ihe iji nweta nzọpụta?

¹³ Ụmụ okoro na agbọghọ tozuru okè n’ọgbakọ anaghị ekwe ka ihe na-agụ ha agụụ ma ọ bụ nsogbu ndị enyi ha na-enye ha mee ka ha bụrụ “ndị ebili mmiri na-enugharị na ndị ifufe ozizi ọ bụla na-ebugharị.” (Efe. 4:14) Kama, ‘a na-azụ ikike nghọta ha azụ,’ ka ha nwee ike “ịmata ihe dị iche n’ihe ziri ezi na ihe na-ezighị ezi.” (Hib. 5:14) Iji gosi na ha eruwela ntozu okè, ha na-ekpebi ihe ndị bara uru ha ga-eme, ma ndị mụrụ ha ma ọ bụ ndị ọzọ hà na-ahụ ha ma ọ bụ na ha anaghị ahụ ha. (Fil. 2:12) Mmadụ kwesịrị inwe ụdị amamihe a ka e nwee ike ịzọpụta ya. (Gụọ Ilu 24:14.) Olee otú ị ga-esi nyere ụmụ gị aka ka ha nwee ụdị amamihe a? Nke mbụ bụ na i kwesịrị ịgwa ụmụ gị hoo haa ihe ndị ị ma Baịbụl kwuru bụ àgwà ọma ma ọ bụ àgwà ọjọọ. Ụmụ gị kwesịrị isi n’ihe ndị ị na-ekwu na ihe ndị ị na-eme mata na ị na-agba mbọ ime ihe Baịbụl kwuru.—Rom 2:21-23.

14, 15. (a) Olee ihe nwa chọrọ ime baptizim kwesịrị ichebara echiche? (b) Olee otú i nwere ike isi nyere ụmụ gị aka ka ha chebara uru ọ ga-abara ha ma ha rubere Chineke isi, echiche?

¹⁴ Ma, naanị ịgwa ụmụ gị ihe ndị bụ́ ihe ọma na ihe ndị bụ́ ihe ọjọọ abụghị ebe okwu biri. I kwesịkwara inyere ha aka ka ha chebara ajụjụ ndị a echiche. Ha bụ: ‘Gịnị mere Baịbụl ji kwuo na ihe ndị nwere ike ịna-agụ anụ ahụ́ anyị agụụ adịghị mma? Gịnị mere m ji kwetasie ike na ime ihe Baịbụl kwuru baara m uru mgbe niile?’—Aịza. 48:17, 18.

¹⁵ Ọ bụrụ na nwa gị ekwuo na ya chọrọ ime baptizim, nyere ya aka ka o chebara ihe ndị a chọrọ ya n’aka ma e mechaa ya baptizim, echiche. Olee otú obi dị ya banyere ha? Olee uru ihe ndị ahụ ga-abara ya? Olee nsogbu ndị o nwere ike ịkpatara ya? Gịnị mere uru ọ ga-abara ya ji karịa nsogbu ndị o nwere ike ịkpatara ya? (Mak 10:29, 30) E mechaa mmadụ baptizim, ya na ihe ndị a nwere ike ịna-alụ. N’ihi ya, ọ dị mkpa ka mmadụ chebara ihe ndị ahụ echiche tupu e mee ya baptizim. Nyere nwa gị aka ka o chebara uru ọ ga-abara ya ma o rubere Chineke isi echiche, nakwa nsogbu ndị ọ ga-akpatara ya ma o nupụrụ ya isi. Ime otú ahụ nwere ike ime ka nwa gị kwetakwuo na ime ihe Baịbụl kwuru ga-abara ya uru mgbe niile.—Diut. 30:19, 20.

MGBE ONYE NA-ETO ETO E MERELA BAPTIZIM NA-ENWE OBI ABỤỌ

16. Olee ihe ndị nne na nna kwesịrị ime ma nwa ha e merela baptizim ejichaghịkwa ofufe Chineke kpọrọ ihe?

¹⁶ Gịnị ka ị ga-eme ma nwa gị e merela baptizim ejichaghịkwa ofufe Chineke kpọrọ ihe? Dị ka ihe atụ, nwa gị na-eto eto e merela baptizim nwere ike nwewe mmasị n’ihe ụwa ma ọ bụ malite inwe obi abụọ ma ime ihe Baịbụl kwuru ọ̀ baara ya uru. (Ọma 73:1-3, 12, 13) Ebe ị bụ nne ma ọ bụ nna, cheta na ihe i mere nwere ike ime ka nwa gị nọgide na-efe Jehova ma ọ bụ kwụsị ife ya. Ekwela ka ihe a nwa gị na-eche sewere gị na ya okwu, ma ọ̀ ka dị obere ma ọ bụ onye na-eto eto ugbu a. Ihe kwesịrị ịbụ mkpa gị bụ ime ka ọ mata na ị hụrụ ya n’anya, nakwa na ị chọrọ inyere ya aka.

17, 18. Ọ bụrụ na onye na-eto eto ana-enwe obi abụọ, olee otú nne na nna ya ga-esi nyere ya aka?

¹⁷ Onye na-eto eto merela baptizim enyefeela Jehova onwe ya. Ihe a o mere gosiri na o kwela Chineke nkwa na ọ ga na-ahụ ya n’anya, nakwa na ọ ga-eji ofufe ya kpọrọ ihe karịa ihe ọ bụla ọzọ. (Gụọ Mak 12:30.) Jehova ejighị nkwa ahụ egwu egwu. Anyị ekwesịkwaghị iji ya egwu egwu. (Ekli. 5:4, 5) Jiri nwayọọ kọọrọ nwa gị ihe ndị a n’oge dabara adaba. Ma, tupu gị eme otú ahụ, gụọ ihe nzukọ Jehova wepụtara maka nne na nna. Ime otú ahụ ga-enyere gị aka ime ka nwa gị ghọta na nnyefe o nyefere Jehova onwe ya, e meekwa ya baptizim abụghị ihe e ji egwu egwu, nakwa na ọ ga-abara ya ọtụtụ uru.

¹⁸ Dị ka ihe atụ, ị gaa n’ebe e dere isiokwu ndị ọzọ, ị ga-ahụ ihe ndị ga-enyere gị aka n’isiokwu bụ́ “Ajụjụ Ndị Nne na Nna Na-ajụ.” Ọ dị n’azụ akwụkwọ Ajụjụ Ndị Na-eto Eto Na-ajụ—Azịza Ndị Na-adị Irè, Nke 1. O kwuru, sị: ‘Echela ozugbo na nwa gị ajụla ihe i kweere. A na-enwekarị ihe na-akpata ya.’ O nwere ike ịbụ nsogbu ndị enyi ya na-enye ya. Ihe ọzọ nwere ike ịkpata ya bụ owu ma ọ bụ nwa ahụ ịna-eche na ụmụaka ndị ọzọ nọ n’ọgbakọ na-eme nke ọma karịa ya. Ihe ndị e dere n’isiokwu ndị ọzọ ahụ kwukwara na nsogbu ndị ahụ apụtaghị na nwa gị ajụla ihe i kweere. Ihe na-akpatakarị ya bụ ụfọdụ nsogbu ha na ya na-alụ ugbu a. Ihe ọzọ e kwuru n’isiokwu ndị ọzọ ahụ bụ otú nne ma ọ bụ nna ga-esi nyere nwa ya na-enwe obi abụọ banyere ihe ndị o kweere, aka.

19. Olee otú ndị nne na nna ga-esi nyere ụmụ ha aka ka ha “mara ihe iji nweta nzọpụta”?

¹⁹ Ebe ị bụ nne ma ọ bụ nna, i kwesịrị ịzụlite ụmụ gị “n’ọzụzụ na nduzi echiche nke si n’aka Jehova.” Ihe a bụ nnukwu ọrụ, nakwa ùgwù Jehova kwanyeere gị. (Efe. 6:4) Anyị amụtala na i kwesịrị ịkụziri ụmụ gị ihe Baịbụl kwuru ma nyere ha aka ka ha kweta n’ihe ha na-amụ. Ọ bụrụ na ha ekwetasie ike, ọ ga-eme ka ha nyefee Jehova onwe ha ma jiri obi ha niile na-ejere ya ozi. Ka Okwu Chineke, mmụọ nsọ ya, na mbọ niile ị na-agba nyere ụmụ unu aka ka ha “mara ihe iji nweta nzọpụta.”