Igbe Ajụjụ

◼ Ọ̀ ka kwesịrị ekwesị iduziri nwanna nwoke ma ọ bụ nwanyị na-adịghị ejekwa ozi ọmụmụ Bible ebe obibi site ná ntụziaka nke otu n’ime ndị so na Kọmitii Ije Ozi Ọgbakọ?

Ndị okenye nwere ibu ọrụ nke ilekọta ọgbakọ, gụnyere ndị ọ bụla nọ n’ọgbakọ bụ́ ndị na-adịghị ejekwa ozi. Ha na-eleta ndị dị otú ahụ ma kpebie ụdị enyemaka dị mkpa. N’ebe o kwesịrị ekwesị, nke a pụrụ ịgụnye iduziri onye ahụ na-adịghị ejekwa ozi ọmụmụ Bible onwe onye. Nhazi E Mere Iji Jezuo Ozi Anyị, peji nke 104, na-akọwa na Kọmitii Ije Ozi Ọgbakọ ga-ekpebi onye ga-erite uru site ná ndokwa dị otú ahụ.

Onye nlekọta ije ozi na-ekpebi onye ga-akasị mma inye ụdị enyemaka ahụ, isiokwu ndị a ga-amụ, na akwụkwọ ga-akasị baa uru. Ikekwe onye duziiri onye ahụ ọmụmụ ihe na mbụ ma ọ bụ onye ọ maara ma na-asọpụrụ ga-anọ n’ọnọdụ dị mma inye aka. A pụrụ ịgwa nwanna nwanyị ruru eru, nke tozukwara okè ka o nyere nwanna nwanyị na-adịghị ejekwa ozi aka. Ọ dịghị adịkebe mkpa ka onye nkwusa ọzọ sonyere onye ahụ e kenyere iduzi ọmụmụ ihe ahụ. Mgbe e kenyere ya mmadụ, onye nkwusa na-eduzi ọmụmụ ihe ahụ pụrụ ịgụrụ awa, nletaghachi, na ọmụmụ ihe.—Lee Ozi Alaeze Anyị nke February 1989 peji nke 1-2.

Ebe onye ahụ a na-amụrụ ihe bụ onye e mere baptism, n’ozuzu ya ọ dịghị mkpa ka a nọgide na-enwe ọmụmụ ihe ahụ ruo ogologo oge. Nzube ya bụ inyere onye ahụ na-adịghị ejekwa ozi aka ịmaliteghachi bịawa nzukọ ọgbakọ dum na ịghọ onye nkwusa ozi ọma na-ejechi ozi anya. Onye nlekọta ije ozi ga-eleru anya n’ọganihu nke ọmụmụ ihe ndị dị otú ahụ. Ihe ga-esi n’enyemaka ịhụnanya a pụta kwesịrị ịbụ na ụmụnna nwoke na nwanyị ndị a ga-enwe ike iburu ibu ọrụ ha nwere n’ebe Jehova nọ ma ghọọ ndị ‘gbagidesiri mkpọrọgwụ’ ike n’eziokwu ahụ.—Efe. 3:17; Gal. 6:5.