Ndị Ohu Na-eje Ozi Na-eje Ozi Bara Uru
1 “Ha egosipụtawo onwe ha ịbụ ndị ikom raara onwe ha nye n’ezie ndị e meworo ka okwukwe ha pụta ìhè n’ozi ịnụ ọkụ n’obi nke Alaeze na n’inyere ndị ọzọ aka ịnọsi ike n’okwukwe.” Nke ahụ bụ ihe Nhazi E Mere Iji Jezuo Ozi Anyị kwuru na peji nke 57, banyere ndị ohu na-eje ozi. N’ezie, ihe nlereanya ime mmụọ ndị ohu na-eje ozi anyị na-esetịpụ kwesịrị nṅomi. Isoro ha na ndị okenye na-arụkọ ọrụ na-eme ka “ahụ nile ahụ . . . baa ụba iwuli onwe ya elu dị ka ụlọ n’ime ịhụnanya.”—Efe. 4:16.
2 Ndị ohu na-eje ozi na-arụ ọrụ dị mkpa n’ọgbakọ. Cheedị echiche banyere ozi nile bara uru ha na-eje! Ha na-elekọta ihe ndekọ ego, akwụkwọ, magazin, ụtụ magazin, na ókèala; ha na-arụ ọrụ dị ka ndị atendantị; na-elekọta ígwè okwu; na-enyekwa aka ilekọta Ụlọ Nzukọ Alaeze. Ha na-ekere òkè n’Ụlọ Akwụkwọ Ije Ozi Ọchịchị Chineke na ná Nzukọ Ije Ozi. Ụfọdụ n’ime ha pụrụ ọbụna ikwu okwu ihu ọha ma ọ bụ iduzi ụfọdụ n’ime nzukọ ọgbakọ. Dị ka akụkụ dị iche iche nke ahụ mmadụ, ndị ohu na-eje ozi na-eje ozi ndị dị anyị mkpa.—1 Kọr. 12:12-26.
3 Ịhụ ka ndị ohu na-eje ozi na-esoro ndị okenye na-arụkọ ọrụ ọnụ dị ka akụkụ nke òtù ndị na-eje ozi, na-akwanyerịtara ibe ha ùgwù, na-egosirịtakwa ibe ha nghọta, na-agba ndị ọzọ ume ime otú ahụ. (Kọl. 2:19) Site n’iji ikwesị ntụkwasị obi na-arụ ọrụ ha site n’izu ruo n’izu na site n’igosi mmasị onwe onye n’ebe ndị ọzọ nọ, ha na-atụnye ụtụ n’ọgbakọ na-aga n’ihu n’ụzọ ime mmụọ.
4 Gịnị ka anyị pụrụ ime iji gosi ekele anyị maka ndị ohu na-eje ozi na-arụsi ọrụ ike? Ọ dị anyị mkpa ịmata ọrụ ndị e kenyere ha ma gosi ịdị njikere irube isi mgbe a chọrọ enyemaka anyị. Site n’okwu ma ọ bụ n’omume, anyị pụrụ ime ka ha mara na anyị nwere mmasị n’ọrụ ha. (Ilu 15:23) Ndị na-arụsi ọrụ ike maka ọdịmma anyị kwesịrị ka anyị kwanyere ha ùgwù site n’obi.—1 Tesa. 5:12, 13.
5 Okwu Chineke na-eme ka a mata ọrụ na iru eru nke ndị ohu na-eje ozi. (1 Tim. 3:8-10, 12, 13) Ozi dị nsọ, bara uru ha na-eje dị oké mkpa ka ọgbakọ wee na-arụ ọrụ. Ndị ikom dị otú ahụ kwesịrị ịnọgide na-enweta agbamume anyị, ka ha nile “na-arụbiga ọrụ Onyenwe anyị ókè.”—1 Kọr. 15:58.