Igbe Ajụjụ
◼ Ị̀ dị njikere maka ọnọdụ mberede?
N’ụwa nke oge a, “mgbe na ihe ndapụta” na-ejikọkarị aka iji kpata ọnọdụ mberede ahụ ike, gụnyere nrụgide ịnara mmịnye ọbara. (Ekli. 9:11) Ka anyị wee nwee ike ijikere maka ihe dị otú ahụ ime, Jehova enyeworo anyị aka n’ụzọ dị iche iche site ná nzukọ ya, ma ọ na-atụ anya ka anyị mee akụkụ nke anyị. Ihe ndepụta dị n’okpuru bụ iji nyere gị aka.
• Na-eji kaadị Advance Medical Directive/Release gị nke kasị ọhụrụ mgbe nile.
• Jide n’aka na ụmụ gị na-eji Identity Card kasị ọhụrụ.
• Tụleghachi ihe ntinye Ozi Alaeze Anyị nke January 1997, na-amụgharị ụzọ isi soro ndị dọkịta na ndị ọkaikpe tụgharịa uche banyere ọgwụgwọ a ga-enye nwa gị.
• Tụleghachi isiokwu ndị kwuru okwu banyere ihe ndị si n’ọbara na ihe ndị a pụrụ iji mee ihe n’ọnọdụ ọbara. (Ndị a tụrụ aro ha: Ụlọ Nche, October 1, 1994, peji nke 31; June 1, 1990, peji nke 30-31; March 1, 1989, peji nke 30-31; Teta! (Bekee), December 8, 1994, peji nke 23-27; August 8, 1993 (Bekee), peji nke 22-25; November 22, 1991 (Bekee), peji nke 10; na ihe ntinye Ozi Alaeze Anyị nke September 1992 na August 1994. Tinye ha n’ime otu faịlụ maka ịchọta ha ngwa ngwa.)
• Jiri akọ na uche gị kpebie ma ị̀ pụrụ ikwe ka e jiri ígwè ọrụ na-ebugharị ọbara si n’ahụ pụọ mee ihe ma ọ bụ ma ị̀ pụrụ ịnakwere ihe ndị e tinyere ihe ndị si n’ọbara na ha.
• Tupu ị gawa ụlọ ọgwụ, ma ọ dị otú o si kwe omume, mee ka ndị okenye mara ka ha wee nwee ike ịkwado gị na ịkpọtụrụ Kọmitii Mmekọrịta Ụlọ Ọgwụ (HLC) ma ọ bụrụ na ọ dị mkpa. N’ihe banyere obere nwa, gwa ndị okenye ka ha mee ka HLC mara n’oge.
Mee Ka Ọjụjụ Ị Jụrụ Ọbara Doo Anya: Akụkọ na-egosi na ụmụnna nwoke na ụmụnna nwanyị ụfọdụ na-echere ruo n’ikpeazụ tupu ha agwa ndị dọkịta na-agwọ ha na ha achọghị ọbara. Nke a abụghị ụzọ dị mma isi mesoo ndị ọrụ ahụ ike, ọ na-etinyekwa gị n’ihe ize ndụ nke ịbụ onye a mịnyere ọbara. Ọ bụrụ na ndị dọkịta amara na ọ dị akwụkwọ a bịanyere aka na ya nke na-akwado ihe ndị i kwenyere na ihe ndị ị chọrọ, nke na-akọwapụta ntụziaka gị kpọmkwem, ọ na-enyere ha aka ịga n’ihu n’egbughị oge, ọtụtụ mgbekwa, na-eme ka ha nwekwuo ihe ndị ha pụrụ ime n’ịgwọ ọrịa n’ejighị ọbara.
Ebe ọnọdụ mberede ahụ ike pụrụ ịdapụta mgbe ọ bụla, dị ka ọ na-adịkarị, mgbe ị na-atụghị anya ya, mee ihe ugbu a iji chebe onwe gị na ụmụ gị pụọ ná mmịnye ọbara.—Ilu 16:20; 22:3.