Jide n’Aka na Ị Gaghachiri!
1 “Mkparịta ụka ahụ tọrọ nnọọ ụtọ! M ga-echeta ịga nletaghachi n’ebe ahụ.” Ọ̀ dịwo mgbe i kwuru okwu ahụ ma mesịa chefuo ebe onye ahụ bi? Ọ bụrụ otú ahụ, ị maara na nanị ụzọ ị pụrụ isi jide n’aka na ị laghachiri bụ idetu ya edetu.
2 Detuo Ha Nile Edetuo: Mgbe ị ka chetachara mkparịta ụka gị na onye nwere mmasị, wepụta oge iji detuo ihe ọmụma nile dị mkpa banyere nleta ahụ. Dee aha onye ahụ na otú ị ga-esi amata ya. Detuo adres ya, ma akọla nkọ banyere ya—nyochaa ya iji jide n’aka na ihe i deturu ziri ezi. Detuo isiokwu unu kwurịtara, akụkụ akwụkwọ nsọ ọ bụla unu gụrụ, na akwụkwọ i nyefere.
3 Ọ bụrụ na ị jụrụ onye ahụ ajụjụ a ga-aza mgbe ị ga-agaghachi, detuo ya edetuo. Ò nwere ihe ị mụtara banyere onye ahụ, ezinụlọ ya, ma ọ bụ okpukpe ya? Ọ bụrụ otú ahụ, detuo nke a edetuo. Mgbe ahụ, mgbe ọzọ ị gara, ịkpọtụ uche na ya ga-egosi mmasị i nwere n’ebe onye ahụ nọ. N’ikpeazụ, denye ụbọchị na oge i mere nleta nke mbụ na mgbe i kwuru na ị ga-alọghachi. Site n’inwe ihe ndekọ ziri ezi, ị ga-enwe ihe ncheta ndị doro anya, o yichaghịkwa ka ị ga-echefu nkwa i kwere ịlọghachi.—1 Tim. 1:12.
4 Ozugbo ihe ndekọ gị zuru ezu, dokọta ya na ihe ndị ọzọ i ji eje ozi ubi—akpa ozi ọma, Bible, akwụkwọ Reasoning, na akwụkwọ gị—ka o wee dịrị gị nso mgbe nile. Ọ kasị mma idetu ndị na-anọghị n’ụlọ n’akwụkwọ ihe ndekọ ụlọ n’ụlọ ndị dị iche ná ndị i ji edetu nletaghachi gị. N’ezie, n’agbanyeghị mgbalị i na-etinye idetu nletaghachi gị, ihe dị mkpa bụ ijide n’aka na ị na-agaghachi!
5 Na-eche Banyere Onye Ahụ: Mgbe ị na-akwadebe maka ozi, tụleghachi ihe ndekọ nletaghachi gị. Chee banyere onye nke ọ bụla na ihe kasị mma ị pụrụ ime mgbe ị na-agaghachi. Chee otú ị ga-esi zụlite mmasị onye ahụ, iji nwee ọmụmụ Bible ebe obibi. Atụmatụ dị otú ahụ pụrụ ịmụba ihe ị na-arụpụta dị ka onye ozi nke ozi ọma, mụbaakwa ọṅụ gị.—Ilu 21:5a.
6 Ya mere, mgbe ọzọ ị hụrụ onye gere gị ntị, echela na ọ pụrụ ịdịrị gị mfe icheta nleta ahụ. Kama nke ahụ, detuo ya, tụleghachi ihe ndekọ gị, nọgide na-eche banyere onye ahụ, ma jide n’aka na ị ga-agaghachi!