Anyị Nwere Ngwá Ọrụ Ọhụrụ Maka Iji Na-amalite Ọmụmụ Ihe!

¹ Otu nwanyị bụ́ onye America na-anụ nnọọ ọkụ n’obi n’okpukpe Roman Katọlik. O ji ikwesị ntụkwasị obi na-agbachitere ozizi dị iche iche nke chọọchị ya. Ọbụna o mere njem ịga ala nsọ bụ́ Vatican. N’agbanyeghị nke ahụ, mgbe otu n’ime Ndịàmà Jehova kpọtụụrụ ya n’ụlọ ya, o kwetara ka e duziere ya ọmụmụ Bible ebe obibi. N’ihi gịnị? N’ihi na ọ chọrọ ịmata ihe Bible na-ekwu, chọọchị ya adịghịkwa eduzi ọmụmụ Bible ebe obibi. Gịnị ka ahụmahụ a na-akụziri anyị? Ọ na-akụziri anyị na anyị amaghị ndị nwere ike ịnakwere ọmụmụ Bible ebe obibi a na-eduzi n’efu.—Ekli. 11:6.

² Ọ̀ dịtụwo mgbe ị lara azụ n’ịgwa ndị mmadụ na anyị dị njikere iso onye ọ bụla nwere mmasị mụọ Bible? Mmadụ nile nọ n’ógbè gị hà maara na anyị na-ekwe nkwa ime ihe a a na-adịghị akwụ ụgwọ maka ya? Olee otú anyị pụrụ isi jide n’aka na ha maara? Site n’iji ngwá ọrụ ọhụrụ na-eme ihe! Ọ bụ traktị mara mma nke dị peeji isii, nke a kpọrọ Ị̀ Ga-achọ Ịmatakwu Banyere Bible? Ka anyị matakwuo ihe dị n’ime traktị a, site n’otu isiokwu nta gaa n’ọzọ.

³ “N’ihi Gịnị Ka A Ga-eji Gụọ Bible?” Ihe ndị traktị ahụ sịrị mere a ga-eji gụọ Bible na-akpali mmasị. Ọ na-akọwa na Bible nwere “ntụziaka ịhụnanya sitere n’aka Chineke,” na-egosi otú a pụrụ isi gakwuru ya n’ekpere maka enyemaka na ụzọ isi nweta onyinye ya nke bụ́ ndụ ebighị ebi. (1 Tesa. 2:13) Traktị ahụ na-ezo aka ‘n’eziokwu dị iche iche na-enye nghọta’ ndị dị n’ime Bible, dị ka ihe na-eme mgbe anyị nwụrụ nakwa ihe mere e ji nwee ọtụtụ nsogbu n’ụwa. Ọ na-akọwa “ụkpụrụ omume ndị Chineke nyere bụ́ ndị dị n’ime Bible,” ndị na-eweta abamuru nkịtị ma na-eme ka e nwee obi ụtọ, olileanya, na àgwà ndị ọzọ dị mma, mgbe e tinyere ha n’ọrụ. Traktị ahụ na-ezo aka n’otu ihe ọzọ mere a ga-eji na-agụ Bible—amụma ndị e buru banyere ọdịnihu bụ́ ndị na-egosi ihe ndị gaje nnọọ iwere ọnọdụ n’isi nso.—Mkpu. 21:3, 4.

⁴ “Enyemaka Iji Ghọta Bible”: Traktị ahụ na-ekwu, sị: “Anyị nile chọrọ enyemaka iji ghọta Okwu Chineke.” Ọ kọwaziri usoro anyị ji na-amụ Bible: “Ọ na-akasị mma iji nwayọọ nwayọọ na-amụ Bible malite n’ozizi ndị bụ́ isi.” Ọ bụ ezie na o mere ka o doo anya na “Bible bụ o kwuchaa o bie,” traktị ahụ kpọtụrụ broshuọ Na-achọ aha kpọmkwem dị ka ihe ga-enyere onye a na-amụrụ ihe aka “ịghọta ebe dị iche iche e zoro aka na ha n’Akwụkwọ Nsọ n’isiokwu dị iche iche.” Isiokwu nta ọzọ na-esonụ welitere ajụjụ chọrọ azịza.

⁵ “Ị̀ Dị Njikere Iwepụta Oge Kwa Izu Iji Ghọta Bible?” Traktị ahụ na-akọwa na a pụrụ ịhazi ọmụmụ Bible n’oge na n’ebe ga-akara onye a na-amụrụ ihe mma, ọ pụrụ ịbụ n’ebe obibi ya nanị ya ma ọ bụ ọbụna site n’iji telifon na-eme ihe. Ònye pụrụ ikere òkè ná nkwurịta okwu ahụ? Traktị ahụ na-aza, sị: “Ndị ezinụlọ gị nile. Ndị enyi gị ọ bụla i kpebiri ịkpọ pụkwara ikere òkè. Ma ọ̀ bụkwanụ, ọ bụrụ na ị chọọ, a pụrụ iso nanị gị na-enwe nkwurịta okwu ahụ.” Ruo ogologo oge hà aṅaa ka mmadụ na-aghaghị ịmụ ihe? Ọ na-akọwa, sị: “Ọtụtụ ndị na-ewepụta otu awa kwa izu iji mụọ Bible. Ọ bụrụ na ị pụrụ iwepụtakwu oge ma ọ bụ ọ bụrụ na ị pụrụ iwepụta nanị oge dị ntakịrị karị kwa izu, Ndịàmà ga-ewepụta onwe ha inyere gị aka.” Nke ahụ bụ isi ihe dị mkpa! Anyị dị njikere ime mgbanwe iji kwekọọ n’ọnọdụ nke onye ọ bụla anyị na-amụrụ ihe.

⁶ “Òkù Ịmụta Ihe”: E nwere akụkụ a pụrụ ịdọkapụta adọkapụta bụ́ ebe onye natara traktị ahụ pụrụ ịrịọ maka broshuọ Na-achọ ma ọ bụ ịrịọ ka a kpọtụrụ ya iji kọwaara ya usoro ọmụmụ Bible ebe obibi anyị na-eduzi n’efu. E sepụtara ihu broshuọ Na-achọ n’àgwà zuru ezu. Ị́ hụghị ihe mere traktị a ga-eji gbaa ọtụtụ ndị ọzọ nwere obi eziokwu ume ịnakwere enyemaka anyị? Ugbu a, olee otú anyị pụrụ isi jiri ngwá ọrụ ọhụrụ a mee ihe n’ụzọ kasị mma?

⁷ Ònye Ka Ị Pụrụ Inye Traktị Ahụ? A pụrụ inye mmadụ traktị ahụ n’aka ma ọ bụ tinye ya n’ụlọ ebe ndị a na-enwetaghị ndị mmadụ. A pụrụ ikesa ya site n’ụlọ ruo n’ụlọ, n’okporo ámá, nakwa n’ógbè azụmahịa. Nyefee ya ndị mmadụ ma hà naara akwụkwọ anyị ma ha anaraghị ya. Tinye ya n’ime magazin ma ọ bụ akwụkwọ ndị ọzọ a na-enyefe. Tinye ya n’ime akwụkwọ ozi ndị i dere. Gwa ndị ị kpọtụụrụ na telifon na ị ga-ezitere ha ya. Hụ na i nwere mgbe nile, ndị ị ga-ekesa mgbe ị gara ịzụta ihe n’ahịa, mgbe i ji ụgbọ njem ọha na eze na-eme ihe, na mgbe ị na-agba àmà mberede. Nye ya onye ọ bụla bịara n’ụlọ gị. Nye ya ndị ikwu gị, ndị agbata obi gị, ndị ọrụ ibe gị, ụmụ akwụkwọ ibe gị, na ndị ọzọ ị maara. Gbalịa inyefe onye ọ bụla i zutere traktị a! Mgbe ahụ, gịnị ga-emezi?

⁸ Ọ Bụrụ na E Meghachi Omume Ozugbo: Ụfọdụ ndị ga-emeghachi omume ozugbo site n’ikwu na ha ga-achọ ka e duziere ha ọmụmụ Bible. Ya mere, mgbe ọ bụla ị nọ n’ozi ubi, jide n’aka na i ji broshuọ Na-achọ abụọ—otu maka onye ị ga-amụrụ ihe, nke ọzọ maka onwe gị. Ọ bụrụ na onye ahụ dị njikere, malite ọmụmụ ihe ahụ ozugbo. Sapeta peeji nke abụọ, ma gụọ “Ụzọ Isi Jiri Broshuọ a Mee Ihe.” Mgbe ahụ, gaa kpọmkwem n’ihe ọmụmụ nke 1, ma gosi otú e si enwe ọmụmụ ihe ahụ. Ọ̀ bụ na nke a adịghị nnọọ mfe?

⁹ Ọ Bụrụ na Onye Na-ege Gị Ntị Chọrọ Oge Iji Chebara Ya Echiche: Tupu ogologo oge agafee, gbalịa ịkpọtụrụ ya ọzọ. Mgbe ị na-eme nke ahụ, jide n’aka na i ji broshuọ Na-achọ. Gosi ya ebe e depụtara ihe ndị dị n’ime ya bụ́ nke dị na peeji nke abụọ. Gwa ya ka ọ họrọ ihe ọmụmụ nke yiri ka ọ̀ ga-amasị ya karịsịa. Sapeta ya, ma malite ịtụle ihe ọmụmụ ahụ ọ họọrọ.

¹⁰ Isochi Magazin Ndị E Tinyere: Ọ bụrụ na i nyefekọtara traktị ahụ na magazin ụfọdụ, ị pụrụ ikwu ihe dị otú a mgbe ị gaghachiri: “N’oge gara aga mgbe m bịara, enwere m obi ụtọ ịhapụrụ gị magazin Ụlọ Nche. Ikekwe ị chọpụtara na aha magazin ahụ n’ụzọ zuru ezu bụ Ụlọ Nche Ikwupụta Alaeze Jehova. Taa, ọ ga-amasị m ịkọwa ihe Alaeze a bụ na ihe ọ ga-apụtara gị na ezinụlọ gị.” Mgbe ahụ, sapeta ihe ọmụmụ nke 6 na broshuọ Na-achọ. Malite na paragraf nke mbụ, gụọ ma tụlee ya ruo n’ókè onye nwe ụlọ nwere oge. Mgbe ahụ, mee ndokwa ịgaghachi n’ụbọchị ọzọ iji tụlezuo ihe ọmụmụ ahụ.

¹¹ Ya Adịla Mgbe Ọ Bụla Traktị ahụ Ga-akọ Gị: Onye nlekọta ije ozi na ụmụnna na-ahụ maka akwụkwọ kwesịrị ịhụ na e nwere traktị bụ́ Ịmata Bible otú ga-ezuru ọgbakọ n’oge nile. Tinye ụfọdụ n’akpa uwe gị ma ọ bụ n’ime pọọsụ gị, n’ime ụgbọala gị, n’ebe ọrụ gị, n’ụlọ akwụkwọ, n’akụkụ ọnụ ụzọ ụlọ gị—n’ebe ọ bụla aka ga-eru ha ngwa ngwa. Tinyekwa ụfọdụ n’ime akpa ozi ọma gị maka mgbe ị ga-ezute onye gị na ya pụrụ ikwurịta banyere Bible.

¹² Ka Jehova Gọzie Mgbalị Anyị: Ihe mgbaru ọsọ dị mma nke Ndị Kraịst nile bụ ịkụziri onye ọzọ eziokwu ahụ. (Mat. 28:19, 20) Ì nwere ọmụmụ Bible ebe obibi ị na-eduzi ugbu a? Ọ bụrụ na i nwere, ị̀ pụrụ iwepụta oge n’usoro ihe omume gị kwa izu maka iji na-eduzikwu ọzọ? Ọ bụrụ na i nweghị ọmụmụ ihe ị na-eduzi ugbu a, n’ezie ị ga-achọ inwe nke ị ga na-eduzi. Kpegara Jehova ekpere ka ọ gọzie mgbalị gị n’ịchọta onye ị ga na-amụrụ ihe. Mgbe ahụ, rụọ ọrụ n’ụzọ kwekọrọ n’ekpere ahụ.—1 Jọn 5:14, 15.

¹³ Anyị nwere ngwá ọrụ ọhụrụ maka iji na-amalite ọmụmụ ihe! Mara ihe dị n’ime ya nke ọma. Kesaara ya mmadụ nile. Mee ihe nile i nwere ike ime ‘ịrụ ọrụ ọma, ịba ọgaranya n’ezi ọrụ, ịdị na-emesapụ aka, na-adị njikere ikerịta ihe’ ị mụtaworo banyere Okwu Chineke.—1 Tim. 6:18.

Igbe dị na peeji nke 4]

OHERE NDỊ E NWERE IJI KESAA TRAKTỊ AHỤ

◼ Mkparịta ụka ndị a na-enwe n’ụbọchị

◼ Mgbe mmadụ naara akwụkwọ anyị

◼ Mgbe ọ na-adịghị onye nọ n’ụlọ

◼ Mgbe anyị na-eme nletaghachi

◼ Mgbe anyị zutere mmadụ n’oge anyị na-agba àmà n’okporo ámá

◼ Mgbe anyị na-agba àmà n’ógbè azụmahịa

◼ Mgbe a na-agba àmà mberede

◼ Mgbe anyị na-ede akwụkwọ ozi

◼ Mgbe anyị nọ n’ụgbọ njem ọha na eze

◼ Mgbe mmadụ bịara n’ebe obibi anyị

◼ Mgbe anyị na ndị ikwu, ndị agbata obi, ndị ọrụ ibe anyị, ụmụ akwụkwọ ibe anyị, na ndị ọzọ anyị maara, na-ekwurịta okwu