Ihe Ncheta Maka Ememe Ncheta

Ememe Ncheta nke afọ a dabara na Wednesday, April 16. Ndị okenye kwesịrị ilebara ihe ndị na-esonụ anya:

◼ N’iyi oge maka nzukọ a, jidenụ n’aka na a gaghị ebugharị ihe nnọchianya ndị ahụ ruo mgbe anyanwụ dasịrị.

◼ E kwesịrị ịgwa mmadụ nile, tinyere onye ọkà okwu, kpọmkwem oge na ebe a ga-eme ememe a.

◼ E kwesịrị inweta ụdị achịcha na mmanya kwesịrị ekwesị, kwadebekwa ha.—Lee Ụlọ Nche nke February 15, 1985, peeji nke 19.

◼ E kwesịrị iweta efere, iko, na tebụl nakwa ákwà tebụl kwesịrị ekwesị n’ụlọ nzukọ ma hazie ha tupu oge eruo.

◼ E kwesịrị ihichasị Ụlọ Nzukọ Alaeze ma ọ bụ ebe ọzọ a ga-ezukọ nke ọma tupu oge eruo.

◼ E kwesịrị ịhọpụta ndị atendantị na ndị ga-ebugharị ihe nnọchianya ndị ahụ ma gwa ha tupu oge eruo ihe bụ́ ọrụ ha, ụkpụrụ kwesịrị ekwesị a ga-agbaso, nakwa mkpa ọ dị iyi uwe na iji ejiji ndị dị ùgwù.

◼ E kwesịrị ime ndokwa ibujere onye ọ bụla so ná ndị e tere mmanụ, bụ́ onye na-adịkwaghị ike, nke na-apụghị ịbịa, ihe nnọchianya ndị ahụ.

◼ Mgbe e mere ndokwa ka ihe karịrị otu ọgbakọ jiri otu Ụlọ Nzukọ Alaeze mee ihe, e kwesịrị inwe ezi mmekọrịta ihe n’etiti ọgbakọ ndị o metụtara iji mee ka ndị mmadụ ghara ijubiga ókè n’ụzọ na-adịghị mkpa n’ebe a na-anabata ndị ọbịa ma ọ bụ n’ụzọ mbata, okporo ụzọ, na n’ebe ndọba ụgbọala. N’ebe ọ ga-ekwe omume, ọ dị mma inye minit 45 mgbe e mesịrị otu ihe omume tupu a malite ihe omume ọzọ.