Ozi Ìgwè Na-enye Ọṅụ
1 Mgbe Jizọs na-ezipụ ndị na-eso ụzọ 70 ịga kwusaa ozi ọma, o nyere ha ntụziaka banyere ihe ha ga-ekwu, kee ha abụọ abụọ, ma gwa ha ókèala ha ga-eje ozi na ya. Nke a so mee ka ha nwee ọṅụ. (Luk 10:1-17) N’otu aka ahụ taa, ozi ìgwè na-enye aka akwadebe, ahazi, ma na-agba ndị Chineke ume maka ọrụ nkwusa ahụ.
2 Ndị Okenye Na-ebute Ụzọ: Ndị okenye na-ekere òkè dị oké mkpa n’inyere mmadụ nile aka ikerechi òkè anya n’ọrụ nkwusa. Onye nlekọta ije ozi na-ebute ụzọ n’ime ndokwa maka ozi etiti izu. Ọ dị onye nlekọta ọmụmụ akwụkwọ ọgbakọ nke ọ bụla n’aka ịhazi ihe omume ahụ n’ìgwè nke ya, karịsịa ná ngwụsị izu. N’oge ndị ọgbakọ nile zukọrọ maka ozi ubi, dị ka mgbe e nwesịrị Ọmụmụ Ihe Ụlọ Nche, onye nlekọta ọmụmụ akwụkwọ ọgbakọ nke ọ bụla kwesịrị ịhụ maka mkpa nke ìgwè nke ya.
3 “N’ụzọ Kwesịrị Ekwesị Nakwa Dị Ka Ndokwa Si Dị”: Onye a họpụtara iduzi nzukọ maka ozi ubi kwesịrị ịmalite n’oge ma mee ka nzukọ ahụ ghara ịkarị minit 10 ma ọ bụ 15. Ọ kasị mma ma ọ bụrụ na o kee ìgwè ahụ ma nye ha ókèala (ọ gwụla ma ndị nlekọta ọmụmụ akwụkwọ ọgbakọ hà ga-ahụ maka nke a dị ka e kwuru na mbụ) tupu e mechie n’ekpere. Nke a na-ebelata mkpa ọ dị ndị nkwusa ịgbakọta n’ókèala ahụ, bụ́ nke pụrụ ime ka ọrụ anyị ghara inwechazi ùgwù. O kwekọkwara na ndụmọdụ Pọl bụ́: “Ka ihe nile were ọnọdụ n’ụzọ kwesịrị ekwesị nakwa dị ka ndokwa si dị.” (1 Kọr. 14:40) Ndị nile ga-aga nzukọ a kwesịrị inye aka hụ na ndokwa a gara nke ọma site n’ịbịa n’oge, ikwenyere onye na-eduzi nzukọ ahụ n’ụzọ zuru ezu, na ịgawa n’ókèala a ga-arụ ọrụ na ya n’egbughị oge ozugbo e mechiri nzukọ ahụ.
4 Ndị E Mere Ka Ha Dị n’Otu: Ndokwa maka ozi ìgwè na-emeghere anyị ohere magburu onwe ya ịmata ndị ọzọ nọ n’ọgbakọ. Ọ bụ ezie na ọ dịghị njọ ibu ụzọ mee ndokwa isoro mmadụ jee ozi, ọ pụkwara ịbara anyị uru ịga nzukọ maka ozi ubi n’ebughị ụzọ mee ndokwa maka ndị anyị na ha ga-arụ. A pụrụ ikenye anyị isoro onye anyị na-amachaghị jee ozi, wee si otú ahụ mee ka anyị nwee ike ‘ịgbasapụ’ n’ịhụnanya anyị.—2 Kọr. 6:11-13.
5 Ozi ìgwè na-agba anyị ume ma na-adọta anyị n’otu dị ka ‘ndị na-arụkọ ọrụ n’eziokwu.’ (3 Jọn 8) Ka anyị na-ekere òkè n’ụzọ zuru ezu na ya!