Olu Ụtọ Ndị Na-enye Ume Ọhụrụ
1 Olu ụtọ na ịbụ abụ bụ ihe ndị dị oké mkpa n’ezi ofufe. N’Izrel oge ochie, Esaf na ụmụnne ya ndị nwoke bụrụ, sị: “Keleenụ Jehova . . . Bụkuonụ Ya abụ, bụkuonụ Ya abụ ọma; tụgharịanụ uche n’oké ọrụ Ya nile.” (1 Ihe 16:8, 9) Taa, anyị na-abụku Jehova abụ ná nzukọ ọgbakọ ndị anyị na-enwe kwa izu. (Efe. 5:19) Lee ohere magburu onwe ya nke a bụ iji too aha ya!—Ọma 69:30.
2 Ige Kingdom Melodies, bụ́ abụ Alaeze ndị e ji ngwá egwú olu ụtọ kụọ, pụrụ ime ka uche anyị jupụta n’ihe ime mmụọ. “Ka a na-akpọ olu ụtọ ndị ahụ, ana m echeta ihe ndị a na-ekwu n’abụ ndị ahụ,” ka otu nwanna nwanyị na-akọwa. “Lee ụzọ magburu onwe ya nke a bụ isi mee ka Jehova dịrị m n’uche ka m na-ege olu ụtọ!”—Fil. 4:8.
3 Oge Ndị A Pụrụ Ige Ha: Ịkpọ Kingdom Melodies n’ebe obibi na-eme ka e nwee ọnọdụ ime mmụọ na-enye obi ụtọ, bụ́ nke so eme ka e nwee udo n’ezinụlọ. “Anyị na-akpọ [olu ụtọ] a ugboro ugboro n’ebe obibi anyị nakwa n’ụgbọala anyị, ọ dịghịkwa mgbe ike na-agwụ anyị ige ha n’ihi ụzọ na-adọrọ adọrọ e si hazie ha,” ka otu ezinụlọ dere. “Mgbe mgbe, abụ Kingdom Melodies emewo ka anyị nọrọ n’ọnọdụ uche dị mma mgbe anyị na-ejikere maka nzukọ Ndị Kraịst ma ọ bụ mgbe anyị na-aga mgbakọ.” Otu nwanna nwanyị kwuru, sị: “Ige ha mgbe m na-arụ ọrụ n’ụlọ na-eme ka obi dị m nnọọ mma—ònye ga-ekweta na m ga na-enwe ọṅụ mgbe m na-apịa ákwà? Ana m akpọ olu ụtọ a mgbe m dara mbà n’obi. Olu ụtọ ndị ahụ na-akpali nnọọ akpali! . . . Abụ nke ọ bụla na-enye obi ụtọ.” È nwere oge ndị olu ụtọ ndị ahụ na-enye ume ọhụrụ ga-abara gị uru?
4 Ihe ka ọtụtụ n’ime egwú ndị a na-akụ taa na-egosipụta mmụọ nke ụwa. Ndị nne na nna pụrụ inyere ụmụ ha aka ịzụlite mmasị maka egwú ndị dị mma site n’ịdị na-akpọ Kingdom Melodies. Ọ ga-amasịkwa ọtụtụ ndị a na-amụrụ Bible na ndị nwere mmasị, ịmara banyere abụ ime mmụọ ndị a, bụ́ ndị na-enye Jehova otuto ma na-enye obi ụtọ.—Ọma 47:1, 2, 6, 7.