Na-egosipụta Mmụọ Ịsụ Ụzọ
1. Olee otú ị ga-esi akọwa mmụọ ịsụ ụzọ?
1 Ma hà pụrụ ije ozi dị ka ndị ọsụ ụzọ ka ọ dị ugbu a ma ọ bụ na ha apụghị ije, ndị nkwusa Alaeze nile pụrụ igosipụta mmụọ ịsụ ụzọ. Ha chọrọ n’ezie irube isi n’iwu ahụ e nyere nke bụ́ ime nkwusa na ndị na-eso ụzọ. (Mat. 28:19, 20; Ọrụ 18:5) Ha na-enwe ezi mmasị n’ebe ndị mmadụ nọ ma na-achụ ọtụtụ ihe n’àjà iji jee ozi ha n’ụzọ zuru ezu. (Mat. 9:36; Ọrụ 20:24) Ndị ohu Jehova dị njikere ime ihe ọ bụla dị mkpa iji nyere ndị ọzọ aka ịmụta eziokwu ahụ. (1 Kọr. 9:19-23) Ka anyị tụlee ihe atụ nke otu onye gosipụtara mmụọ dị otú ahụ, Filip onye na-ezisa ozi ọma.
2. Olee otú ndị okenye na ndị ohu na-eje ozi pụrụ isi ṅomie ịnụ ọkụ n’obi Filip n’ozi ahụ?
2 Ime Nkwusa na Izi Ihe: Filip buru ibu ọrụ ndị siri ike n’ọgbakọ narị afọ mbụ. (Ọrụ 6:1-6) N’agbanyeghị nke ahụ, ọ bụ nnọọ onye nkwusa ozi ọma na-anụ ọkụ n’obi. (Ọrụ 8:40) Ya mere taa, ka ha na-arụ ọrụ e nyere ha, ndị okenye na ndị ohu na-eje ozi pụrụ igosipụta mmụọ ịsụ ụzọ site n’iji ịnụ ọkụ n’obi na-edu ndú n’ozi ahụ. Lee ka nke a si eme ka mmụọ e nwere n’ọgbakọ dịkwuo ike!—Rom 12:11.
3. Olee otú anyị pụrụ isi gosipụta mmụọ ịsụ ụzọ mgbe anyị na-eche ule ihu?
3 Mgbe Stivin nwụsịrị, a kpagburu ndị ahụ na-eso ụzọ n’ụzọ kpụ ọkụ n’ọnụ. Otú ọ dị, Filip nọgidere na-eme nkwusa, ọ bụkwa n’aka ya ka e si mee ka ndị Sameria malite ịrụ ọrụ ahụ. (Ọrụ 8:1, 4-6, 12, 14-17) Anyị pụrụ iṅomi ihe nlereanya ya site n’ịnọgide na-ekwusa ozi ọma ahụ mgbe anyị na-eche ule ihu nakwa site n’ikwusara ndị anyị na-ezute ozi ọma ahụ n’eleghị mmadụ anya n’ihu.—Jọn 4:9.
4. Olee ihe nlereanya nke Filip setịpụrụ dị ka onye ozizi?
4 A pụrụ ịhụ nkà izi ihe Filip dị ka onye ozizi nke Okwu Chineke n’ihe ndekọ banyere ntọghata nke ọnaozi Etiopia ahụ. (Ọrụ 8:26-38) Ịzụlite ikike nke iji Bible eme ihe na ‘ịtụgharị uche site n’Akwụkwọ Nsọ’ bụ́ nnọọ ụzọ ọzọ anyị si egosipụta mmụọ ịsụ ụzọ. (Ọrụ 17:2, 3) Dị ka Filip, anyị na-achọ ikwusa ozi ọma ahụ n’ebe ọ bụla a pụrụ ịhụ ndị mmadụ nakwa n’oge ọ bụla kwesịrị ekwesị.
5. Olee ihe pụrụ inyere ndị nne na nna bụ́ Ndị Kraịst aka ịkụnye mmụọ ịsụ ụzọ n’obi ụmụ ha?
5 Ezinụlọ na Ọgbakọ: Obi abụọ adịghị ya na àgwà Filip nakwa ihe nlereanya ya nwere mmetụta dị mma n’ebe ụmụ ya ndị nwanyị nọ. (Ọrụ 21:9) N’otu aka ahụ, ndị nne na nna bụ́ Ndị Kraịst, bụ́ ndị mere ka ndụ ha hiwe isi n’ihe ndị metụtara Alaeze, na-agba ụmụ ha ume ime otu ihe ahụ. N’agbanyeghị na ike gwụrụ ya n’ihi ọrụ ọ rụrụ n’izu, nne ma ọ bụ nna nke na-eji ịnụ ọkụ n’obi na-ekwusara ndị ọzọ ozi ọma ahụ pụrụ inwe mmetụta na-adịgide adịgide n’obi nwata.—Ilu 22:6.
6. Olee otú anyị pụrụ isi na-egosipụta ekele maka ndị ọsụ ụzọ nọ n’ọgbakọ anyị?
6 Filip lere Pọl na Luk ọbịa, bụ́ Ndị Kraịst nụrụ ọkụ n’obi, ndị rụsikwara ọrụ ike n’ozi Jehova. (Ọrụ 21:8, 10) Olee otú anyị pụrụ isi gosi ekele nakwa nkwado anyị maka ndị na-anụ ọkụ n’obi taa? Ikekwe, anyị pụrụ iso ndị ọsụ ụzọ rụọ ọrụ n’ụtụtụ ma ọ bụ n’ehihie n’ụbọchị ndị ọ na-abụ nanị mmadụ ole na ole na-apụta ozi. (Fil. 2:4) Anyị pụkwara ịkpọ ha òkù ịbịa n’ebe obibi anyị maka inwe mkpakọrịta na-ewuli elu. Na-agbanyeghị ihe bụ́ ọnọdụ anyị, ka anyị nile na-agbalịsi ike igosipụta mmụọ ịsụ ụzọ.