Kelee Jehova Ekele Maka Ebere Ya
A Ga-eme Ememe Ncheta Ọnwụ Kraịst na March 24
1. Olee otú Jehova siworo meere anyị ebere?
1 Ọbụ abụ ahụ ji oké olu kwuo, sị: “Ka ha kelee Jehova ekele banyere ebere Ya, na oké ọrụ Ya nile nke Ọ na-arụrụ ụmụ mmadụ!” (Ọma 107:8) Ebere Chineke karịrị nnọọ ọmịiko o nwere n’ebe ndị mmadụ nọ. E mere ka nke ahụ pụta ìhè n’okwu otuto a sitere n’ike mmụọ nsọ: “Ebere Gị na-akwagide m, Jehova.” (Ọma 94:18) Ebere Jehova meere anyị site n’inye anyị Ọkpara ọ mụrụ nanị ya enweghị atụ!—1 Jọn 4:9, 10.
2. Olee otú anyị pụrụ isi kelee Jehova?
2 Ka Ememe Ncheta ọnwụ Kraịst na-eru nso, olee otú anyị pụrụ isi kelee “Chineke nke ebere” ekele? (Ọma 59:17) Onye ọ bụla n’ime anyị kwesịrị iwepụta oge iji tụgharịa uche n’ụbọchị ndị ikpeazụ Jizọs biri n’ụwa. (Ọma 143:5) Ọ ga-abakwa uru isonye n’ọgụgụ Bible pụrụ iche e dokwara maka oge Ememe Ncheta dị ka o si dị n’Inyocha Akwụkwọ Nsọ Kwa Ụbọchị—2005. Ọ bụrụ na o kwe mee, ọ ga-adịkwa mma ka anyị mekwuo nnyocha n’isi nke 112-116 nke akwụkwọ Nwoke Kasị Ukwuu nakwa n’akwụkwọ ndị ọzọ dabeere na Bible. Tụgharịa uche n’ihe ndị ị gụrụ, ma kwe ka ha baa gị n’obi. (1 Tim. 4:15) Iji ekpere na-atụgharị uche n’Okwu Chineke abụghị nanị na ọ na-eme ka obi anyị sikwuo ike kamakwa ọ na-eme ka a mara otú anyị hụruru Jehova n’anya.—Mat. 22:37.
3, 4. (a) Olee otú anyị pụrụ isi ṅomie àgwà ụmụnna anyị ndị Liberia? (b) Olee ndị ị na-eme atụmatụ ịkpọ ka ha bịa Ememe Ncheta?
3 Kpalie Ndị Ọzọ Ikele Chineke: N’afọ gara aga, mmadụ 16,760,607 bịara Ememe Ncheta n’ụwa nile. N’otu obodo nta dị na Liberia, ụmụnna nọ n’ámá egwuregwu bọl dị n’obodo ahụ mee ya, a kpọsakwara ya n’obodo ahụ dum, na-agwa ndị mmadụ ka ha bịa. Ọ bụ ezie na e nwere nanị ndị nkwusa ise n’obodo ahụ, ndị bịara Ememe Ncheta ahụ dị 636!
4 N’otu aka ahụ, anyị kwesịrị inyere ọtụtụ mmadụ ruo ókè o kwere mee aka ịbịa Ememe Ncheta a. Í depụtakwanụ aha ndị ị chọrọ ịkpọ? Ihe osise ndị dị n’azụ Teta! nke March 8 na Ụlọ Nche nke March 15 na-akpọ òkù ka a bịa. A pụkwara iji akwụkwọ ịkpọ òkù Ememe Ncheta bụ́ nke e biri ebi mee ihe. Jiri typewriter ma ọ bụ aka depụta n’akwụkwọ ịkpọ òkù ahụ, oge na ebe a ga-eme ememe ahụ, ma nye onye ọ bụla ị kpọrọ otu. Ka March 24 na-eru nso, gaghachi na nke ndị nile ị kpọrọ iji chetara ha ya na iji hazie ihe nile nke ọma.
5. Olee otú anyị pụrụ isi gbaa ndị anyị na-amụrụ Bible ume ịbịa?
5 Olee otú anyị pụrụ isi nyere ndị anyị na-amụrụ Bible bụ́ ndị na-ebidobeghị ịbịa nzukọ aka ịbịa na irite uru nke ọma n’ememe ahụ? Wepụta minit ole na ole n’oge ọ bụla unu na-amụ ihe iji nyere ha aka ịghọta mkpa ememe ahụ dị. A pụrụ ịchọta ihe ọmụma bụ́ ịgba n’Ụlọ Nche nke March 15, 2004, peeji nke 3-7, nakwa n’akwụkwọ Reasoning, peeji nke 266-269.
6. N’ihi gịnị ka o ji dị mkpa ịnabata ndị ọbịa mgbe anyị bịara Ememe Ncheta?
6 Nabata Ndị Ọbịa: Mgbe ị bịara Ememe Ncheta ahụ, gakwuru ndị ọbịa ma nabata ha. (Rom 12:13) Mee ndokwa ka gị na ndị ị kpọrọ nọdụ ala n’otu ebe, hụkwa na ha ji Bible na akwụkwọ abụ. Anyị kwesịrị ibute ụzọ karịsịa n’iji obi ụtọ kelee ụmụnna ndị na-adịkwaghị eje ozi bụ́ ndị gbara mbọ bịa. Ịhụnanya anyị gosiri ha pụrụ ime ka ha maliteghachi iso ọgbakọ na-akpakọ. (Luk 15:3-7) N’ememe a kasị dị nsọ, ka anyị mee ike anyị nile iji gbaa ndị ọzọ ume iso anyị kelee Jehova maka “ebere Ya dị ebube.”—Ọma 31:21.