Akwụkwọ Ozi Si n’Alaka

Ezi Ndị Nkwusa Alaeze:

Obi dị anyị ụtọ ịhụ ọganihu e nwere n’afọ ije ozi nke 2007 n’ọrụ nkwusa anyị n’ókèala nke alaka ụlọ ọrụ Nigeria na-elekọta! Ụmụnna anyị nwere ahụmahụ dị iche iche mara mma n’ozi ha. Arụchaakwala Ọfịs ọhụrụ anyị dị na Lagos. Nke a ga-enyekwu aka n’ịrụ ọtụtụ ọrụ alaka ụlọ ọrụ anyị nwere ịrụ. A na-arụzigharị Ọfịs anyị nke ochie dị na Lagos ka e wee nọrọ na ya na-enwe Ụlọ Akwụkwọ Ọzụzụ Ndị Ozi. Anyị na-atụ anya na ụlọ akwụkwọ ahụ ga-amalite ná mbido afọ 2008.

N’ókèala dum nke alaka ụlọ ọrụ Nigeria na-elekọta, e kesara ihe karịrị nde ise nke Akụkọ Alaeze nke 37, nke isiokwu ya bụ, “A Ga-ebibi Okpukpe Ụgha n’Oge Na-adịghị Anya!” Mgbe otu nwanna nwanyị na-adịkwaghị eje ozi gụsịrị Akụkọ Alaeze a, ụra ekwekwaghị ya ohihi. Na Sunday sotere izu ọ gụrụ ya, ọ bịara ọmụmụ ihe ma rịọ ka a mụwara ya Bible. Ndị nwere mmasị dejupụtara ebe ahụ e nwere ike ịdọkapụta adọkapụta n’azụ Akụkọ Alaeze ahụ ma rịọ ka e zitere ha ọtụtụ broshuọ bụ́ Nọrọ na Nche! nakwa ka a mụwara ha Bible.

Ihe e bu n’obi na-eme ụdị mkpọsa a bụ iji nyere ndị nwere obi eziokwu aka ịmụta ihe Bible na-akụzi n’ezie. (Mat. 28:19, 20) Mgbe ị na-aga ozi ọma, echefula iburu ndị gosiri mmasị n’uche. Mgbe ị na-agaghachikwa na nke ha, mee ya ihe mgbaru ọsọ gị ịmalite iduziri ha Bible. Obi dị anyị ụtọ na anyị na unu na-arụkọ ọrụ a dị mkpa. Anyị na-ekele unu.

Ụmụnna unu,

Alaka Ụlọ Ọrụ Nigeria