Mee Ka Ndị Ogbenye Nwee Olileanya
1 Jizọs nwere mmasị pụrụ iche n’ebe ndị ogbenye nọ. E nwere oge ndị ọ rụrụ ọrụ ebube wee nye ha nri, gwọọkwa ndị ọrịa. Ma, o lekwasịrị anya n’ịkpọsara ndị ogbenye “ozi ọma.” (Mat. 11:5) Ozi ọma Ndị Kraịst na-ezisa taa ka na-abara ndị ogbenye na ndị ọzọ uru.—Mat. 24:14; 28:19, 20.
2 Ezi Olileanya: Ndị ụkọchukwu Krisendọm na-ekwekarị ndị ogbenye nkwa na ọ bụrụ na ha enye ego buru ibu na chọọchị, ha ga-aba ọgaranya. Otú ọ dị, Bible na-akụzi na ọ bụ nanị Alaeze Chineke ga-akwụsị ịda ogbenye, gwọtakwa nsogbu nile mmadụ nwere. (Ọma 9:18; 145:16; Aịsa. 65:21-23) Site n’igosi ndị ogbenye ihe Bible na-akụzi n’ezie, anyị na-eme ka ha nwee olileanya, na-enyekwara ha aka igbo mkpa ime mmụọ ha.—Mat. 5:3.
3 Ndị Farisii nke oge Jizọs ledara ndị ogbenye anya, na-akpọ ha ‘am-ha·’aʹrets, ma ọ bụ “ndị ala” n’ụzọ ịkwa emo. Ma, Jizọs lere “ọbara ha,” ma ọ bụ ndụ ha, anya dị ka ihe dị “oké ọnụ ahịa.” (Ọma 72:13, 14) Anyị pụrụ iṅomi Jizọs ma na-emere ndị ogbenye dị otú ahụ “amara” site n’inwe obiọma na obi ebere. (Ilu 14:31) Anyị ekwesịtụghị ikwu okwu mkparị banyere ndị bi n’ógbè ndị dara ogbenye ma ọ bụ gosi na anyị enwechaghị mmasị ịgbara ha àmà. Ọtụtụ ndị na-aṅa ntị n’ozi Alaeze bụ ndị ogbenye.
4 Nyere Ha Aka Ugbu A: Ịkụziri ndị ogbenye nọ n’ókèala anyị ụkpụrụ Bible na-enyekwara ha aka ugbu a ka ịda ogbenye ghara ịkpacha ha aka ọjọọ. Dị ka ihe atụ, Bible katọrọ ịṅụbiga mmanya ókè, ịgba chaa chaa, ịdị umengwụ, ise siga ma ọ bụ ịkpọ ụtaba, na omume ndị ọzọ so akpata ịda ogbenye. (Ilu 6:10, 11; 23:21; 2 Kọr. 7:1; Efe. 5:5) Akwụkwọ Nsọ gbara ume ka anyị na-akwụwa aka ọtọ, jirikwa ‘mkpụrụ obi anyị dum,’ na-arụ ọrụ. A chọrọ ka ndị e were n’ọrụ na-akpa àgwà ndị a. (Kọl. 3:22, 23; Hib. 13:18) N’ezie, n’otu nnyocha e mere, ọtụtụ ndị na-ewe ndị mmadụ n’ọrụ kwuru na ịkwụwa aka ọtọ na ikwesị ntụkwasị obi bụ àgwà abụọ kacha amasị ha ka ndị ha na-ewe n’ọrụ nwee.
5 Ahụhụ ndị ogbenye na-ata na-emetụ Jehova n’obi. N’oge na-adịghị anya, Jizọs Kraịst ga-anapụta “ogbenye mgbe ọ na-etiku ya.” (Ọma 72:12) Tupu oge ahụ eruo, anyị nwere ihe ùgwù nke iji ozi ọma dị na Bible, nke na-eme ka e nwee olileanya, na-akasi ndị ọzọ obi, tinyere ndị ogbenye.