Okwu Chineke Bara Uru Iji Zie Ihe
1. Gịnị bụ isiokwu mgbakọ sekit anyị ga-aga n’afọ 2014? Olee ajụjụ a ga-aza ná mgbakọ ahụ?
1 Jehova bụ “Onye Ozizi Ukwu” anyị. O nweghị onye nkụzi dị ka ya, ma n’eluigwe ma n’ụwa. (Aịza. 30:20, 21) Ma, olee otú Jehova si ezi anyị ihe? O nyere anyị akwụkwọ kacha akwụkwọ niile. Akwụkwọ ahụ bụ Baịbụl. O nyekwara ndị dere ya mmụọ nsọ ya. Olee otú ihe Jehova na-akụziri anyị ga-esi mee ka anyị na-enwe ezigbo ahụ́ ike, na-eche ihe dị mma, na-eme ka ahụ́ ruo anyị ala, na-emekwa ka anyị na ya dịrị ná mma? A ga-aza ajụjụ a ná mgbakọ sekit anyị ga-aga n’afọ 2014. Isiokwu mgbakọ ahụ ga-abụ “Okwu Chineke Bara Uru Iji Zie Ihe.” O si na 2 Timoti 3:16.
2. Olee ajụjụ ndị a ga-aza ná mgbakọ sekit afọ ọzọ bụ́ ndị ga-enyere anyị aka ịghọta isi ihe ndị a ga-ekwu?
2 Isi Ihe Ndị A Ga-atụle: O nwere ajụjụ itoolu e dere n’okpuru ebe a. A ga-aza ha ná mgbakọ ahụ. Ha ga-enyere anyị aka ịghọta isi ihe ndị a ga-ekwu. Ajụjụ ndị ahụ bụ:
• Olee uru ihe Chineke na-ezi anyị na-abara anyị? (Aịza. 48:17, 18)
• Ọ bụrụ na anyị na-agba mbọ ịhazi oge anyị ka anyị nwee ike ijere Jehova ozi oge niile, gịnị ka Jehova ga-emere anyị? (Mal. 3:10)
• Gịnị ka anyị kwesịrị ime ma a chọọ izi anyị “ozizi ọhụrụ” ọ bụla? (Hib. 13:9)
• Olee otú anyị ga-esi ṅomie ‘otú Jizọs si zie ihe’? (Mat. 7:28, 29)
• Gịnị mere ndị na-akụzi ihe n’ọgbakọ ga-eji na-akụziri onwe ha ihe? (Rom 2:21)
• Olee uru Okwu Chineke bara? (2 Tim. 3:16)
• Gịnị ka ndị mmadụ na-eme n’ihi otú Jehova si eme ka mba niile “maa jijiji”? (Hag. 2:6, 7)
• Gịnị ka obi siri Jehova ike na anyị ga-emeli? (Efe. 5:1)
• Olee ihe mere anyị ga-eji gbalịsie ike ka anyị nọgide n’ozizi Jehova? (Luk 13:24)
3. Gịnị mere anyị ji kwesị ịga mgbakọ sekit nke afọ 2014 ma gee ntị nke ọma?
3 Tupu Pọl edee ihe dị na 2 Timoti 3:16, o kwuru ihe ndị ga na-eme n’ụwa n’oge ikpeazụ a. O dere, sị: “Ndị ajọ mmadụ na ndị nduhie ga na-ajọwanye njọ, na-eduhie ndị mmadụ ma bụrụ ndị a na-eduhie.” (2 Tim. 3:13) Ọ bụrụ na anyị achọghị ka e duhie anyị, anyị kwesịrị ịna-ege ntị n’ihe Jehova na-akụziri anyị, na-emekwa ya. N’ihi ya, ka anyị kpebie na anyị ga-ege ntị ma anyị gaa mgbakọ sekit n’afọ ọzọ, bụ́ nke a haziri ka ọ baara anyị uru.