Olee Ụdị Mmadụ M Bụ n’Anya Jehova?
1. Olee otú Baịbụl si dị ka enyo?
1 Ugboro ole ka ị na-ele onwe gị n’enyo? Ọtụtụ ndị na-ele onwe ha n’enyo kwa ụbọchị maka na ọ na-eme ka ha mara ihe ndị ha ga-emezi n’ahụ́ ha ma ha jie ejiji. Ị manụ na Baịbụl dị ka enyo. Ịgụ Baịbụl na-enyere anyị aka ịmata ụdị ndị anyị bụ, ya bụ, ụdị ndị Jehova chọrọ ka anyị bụrụ. (1 Sam. 16:7; Jems 1:22-24) Baịbụl ‘na-achọpụta echiche na ihe mmadụ bu n’obi.’ (Hib. 4:12) Olee otú ịgụ Baịbụl kwa ụbọchị na ịtụgharị uche n’ihe anyị gụrụ ga-esi nyere anyị aka ịmata ihe ndị anyị kwesịrị imezi ka anyị nwee ike ịna-emekwu nke ọma n’ozi anyị?—Ọma 1:1-3.
2. Olee otú ihe Baịbụl kwuru ga-esi nyere anyị aka inyocha onwe anyị?
2 Jiri Baịbụl Na-enyocha Onwe Gị: Ihe Baịbụl kwuru gbasara ndị rubeere Jehova isi n’oge ochie na-eme ka anyị mata ụdị àgwà ọ chọrọ ka anyị na-akpa. Dị ka ihe atụ, Devid ji ịnụ ọkụ n’obi jeere Chineke ozi. (1 Sam. 17:45, 46) Aịzaya wepụtara onwe ya ijere Chineke ozi n’ebe ihe siri ike. (Aịza. 6:8, 9) Jizọs ji obi ụtọ jeere Nna ya nke eluigwe ozi mgbe ọ bịara n’ụwa. Ijere ya ozi esirighị ya ike n’ihi na ọ hụrụ ya n’anya. (Jọn 4:34) Ndị Kraịst oge ochie adaghị mbà n’ozi ọma. Ha jikwa ịnụ ọkụ n’obi kwusaa ya n’ihi na ha tụkwasịrị Jehova obi. (Ọrụ 5:41, 42; 2 Kọr. 4:1; 2 Tim. 4:17) Ọ bụrụ na anyị ana-echebara otú ndị a niile si jiri ịnụ ọkụ n’obi jeere Jehova ozi echiche, ọ ga-enyere anyị aka iji obi anyị niile na-ejere Jehova ozi.
3. Gịnị mere anyị ga-eji kwụsị àgwà ọjọọ ọ bụla anyị na-akpa?
3 Mezie Ihe Ndị I Kwesịrị Imezi: Enyo mmadụ lere abaraghị ya uru ma ọ bụrụ na o lechara onwe ya hapụ imezi ihe na-adịghị mma ọ chọpụtara n’ahụ́ ya. Ọ ga-adị mma ka anyị rịọ Jehova ka o nyere anyị aka inyocha onwe anyị chọpụta ihe anyị kwesịrị imezi, meziekwa ya. (Ọma 139:23, 24; Luk 11:13) Ebe ọ bụ na ọ fọrọ obere ka Chineke bibie ndị na-anaghị eme ihe ọ na-achọ, anyị kwesịrị ịkwụsị àgwà ọjọọ ọ bụla anyị na-akpa ugbu a.—1 Kọr. 7:29; 1 Tim. 4:16.
4. Olee uru mmadụ ga-erite ma ọ na-enyocha Okwu Chineke, na-emekwa ihe o nyochatara na ya?
4 Ihe Jehova na-ele bụ ihe dị mmadụ n’obi, ọ bụghị otú anyị dị n’elu ahụ́. (1 Pita 3:3, 4) Olee uru mmadụ ga-erite ma ọ na-enyocha Okwu Chineke, na-emekwa ya eme? Ọ ‘ga-enwe obi ụtọ, n’ihi na ọ bụghị onye na-echefu ihe ọ nụrụ.’ (Jems 1:25) Nke bụ́ eziokwu bụ na obi ga-adị anyị ụtọ na anyị na-eme nke ọma n’ozi ọma n’ihi na anyị “na-egbukepụ ebube Jehova dị ka enyo.”—2 Kọr. 3:18.