Ọrụ Ọma Ndị A Na-agaghị Echefu Echefu

Onye ọ bụla bụ́ onye Jehova nwere ike ịrụ ọtụtụ ọrụ ọma a na-agaghị echefu echefu n’ozi Chineke. Nna ọ bụla ụmụ ya na-eme nke ọma ga na-enwe obi ụtọ, ọ ga-ahụkwa ha n’anya. Otú ahụ ka Jehova dị. Ọ naghị echefu ọrụ ọma anyị na-arụrụ ya na ịhụnanya anyị na-egosi maka aha ya. (Mat. 6:20; Hib. 6:10) Nke bụ́ eziokwu bụ na ọnọdụ anyị dị iche iche, ike anyị ahaghịkwa otu. Ma, anyị mee ike anyị niile n’ozi Jehova, obi ga-adị anyị ụtọ. (Gal. 6:4; Kọl. 3:23) Kemgbe ọtụtụ afọ, ọtụtụ puku ụmụnna nwoke na ụmụnna nwaanyị ejeela ozi na Betel. Ị̀ ga-ewepụtali onwe gị ije ozi na Betel? Ọ bụrụ na ọ gaghị ekweli gị omume, ì nwere ike ịgba onye ọzọ ume ka o mee otú ahụ, ma ọ bụkwanụ gị enyere onye na-eje ozi na Betel aka ka ọ nọgide na-eje ozi a pụrụ iche?

LEENỤ VIDIO BỤ́ IHE NDỊ Ị GA-EME KA I NWEE IKE IRU ERU ỊNA-EJE OZI NA BETEL, ZAAKWANỤ AJỤJỤ NDỊ A:

• Olee ihe mmadụ kwesịrị ibu n’obi chọọ ije ozi na Betel?

• Olee ngọzi ndị ụfọdụ kwuru na ha nwetara mgbe ha na-eje ozi na Betel?

• Olee ihe a chọrọ n’aka mmadụ iji ruo eru ije ozi na Betel?

• Olee otú ị ga-esi mee ka a mata na ị chọrọ ije ozi na Betel?