OTÚ NDỊ KRAỊST SI EBI NDỤ
Na-agbalị Ka Ị Mata Ihe Bụ́ Echiche Chineke
Anyị chọrọ ịna-eme ihe dị Jehova mma n’ihe niile anyị na-eme. (Ilu 27:11) Anyị ga na-eme otú ahụ ma anyị na-eme mkpebi ndị dabara n’echiche ya, ọ bụrụgodị mgbe a na-enweghị iwu a kapịrị ọnụ e nyere banyere ihe anyị chọrọ ime. Gịnị ga-enyere anyị aka ime ya?
Na-amụchi Baịbụl anya. Mgbe ọ bụla anyị na-agụ Baịbụl, ọ na-adị anyị ka anyị na Jehova ọ̀ nọ. Anyị ga-amata otú Jehova si eche echiche ma anyị mụọ gbasara otú o si mesoo ndị ya ihe n’oge ochie nakwa ma anyị mụọ gbasara ndị mere ihe ọ na-achọ na ndị na-emeghị ihe ọ na-achọ. Anyị chọzie ime mkpebi, mmụọ nsọ ga-echetara anyị ihe ndị dị mkpa anyị mụrụ n’Okwu Chineke.—Jọn 14:26.
Na-eme nchọnchọ. Ị chọwa ime mkpebi, jụọ onwe gị, sị: ‘Olee amaokwu Baịbụl ma ọ bụ akụkọ dị na Baịbụl ga-enyere m aka ịghọta echiche Jehova n’okwu a?’ Rịọ Jehova ka o nyere gị aka, jirikwa ihe ndị nzukọ a wepụtara e ji eme nchọnchọ n’asụsụ gị chọta ihe Baịbụl kwuru ga-enyere gị aka ime mkpebi dị mma.—Ọma 25:4.
LEENỤ VIDIO BỤ́ KA ANYỊ JIRI “NTACHI OBI NA-AGBA ỌSỌ”—NA-ERI NRI NA-EDOZI AHỤ́, ZAAKWANỤ AJỤJỤ NDỊ A:
Olee nsogbu ndị bịaara nwanna nwaanyị a anyị hụrụ na vidio a?
Olee otú ị ga-esi jiri ihe ndị anyị ji eme nchọnchọ chọta ihe ndị ga-enyere gị aka imeri ụdị nsogbu ndị ahụ?
Olee uru iwepụta oge mee nchọchọ na ịmụ ihe tupu anyị emewe mkpebi ga-abara anyị?—Hib. 5:13, 14