Ebe otu nwoke ji onyinye e kechiri ekechi

Gịnị Ka Baịbụl Kwuru Banyere Inye Ihe?

Ihe Baịbụl kwuru

Baịbụl kwuru na ọ dị mma inye ndị ọzọ ihe, nakwa na onye na-enye ihe kwesịrị iji obi ọcha ya na-enye ya. O kwukwara na iji obi ọcha nye ihe na-abara ma onye e nyere ihe ahụ uru ma onye nyere ya ihe ahụ. (Ilu 11:25; Luk 6:38) Jizọs sịrị: “A na-enweta obi ụtọ ka ukwuu n’inye ihe karịa ka a na-enweta n’ịnara ihe.”—⁠Ọrụ Ndịozi 20:⁠35.

Olee ụdị inye ihe na-atọ Chineke ụtọ?

Ụdị inye ihe na-atọ Chineke ụtọ bụ nke mmadụ si n’obi ya nye. Baịbụl kwuru, sị: “Ka onye ọ bụla nye dị ka o kpebiri n’obi ya, ọ bụghị ná mwute ma ọ bụ ná mmanye, n’ihi na Chineke hụrụ onye na-eji obi ụtọ enye ihe n’anya.”—⁠2 Ndị Kọrịnt 9:⁠7.

Mmadụ isi n’obi ya nye ndị ọzọ ihe so ‘n’ụdị ofufe’ Chineke na-anabata. (Jems 1:27) Onye na-eji obi ya enyere ndị ọzọ aka so Chineke na-arụ ọrụ, n’ihi na Chineke na-ele onye na-emesapụ aka anya ka onye gbazinyere ya ihe. (Ilu 19:17) Baịbụl kwuru na Chineke n’onwe ya ga-akwụghachi onye ahụ ụgwọ ihe o mere.—⁠Luk 14:12-14.

Olee ụdị inye ihe na-anaghị amasị Chineke?

Ọ bụrụ na o nwere ihe mmadụ bu n’obi na-enye ya. Ihe ndị dị ka:

Ka ndị mmadụ too ya.—⁠Matiu 6:⁠2.
Iji ya nata ihe ọzọ.—⁠Luk 14:12-14.
Iji ya zụtara onwe ya nzọpụta.—⁠Abụ Ọma 49:6, 7.

Ọ bụrụ na e ji ya na-akwado ihe Chineke kpọrọ asị ma ọ bụ àgwà Chineke kpọrọ asị. Dị ka ihe atụ, ọ dị njọ inye mmadụ ego ka o jiri ya gbaa chaa chaa ma ọ bụ ka o jiri ya ṅụọ ọgwụ ike ma ọ bụ ṅụbiga mmanya ókè. (1 Ndị Kọrịnt 6:9, 10; 2 Ndị Kọrịnt 7:⁠1) Otú ahụ ka ọ dịkwa iwere ego nye onye ahụ́ dị mma na-achọghị ịrụ ọrụ, ebe ọ bụ yanwa jụrụ ịrụ ọrụ ka o nwee ike ịna-akpata ego.—⁠2 Ndị Tesalonaịka 3:10.

Ọ bụrụ na inye ihe ga-egbochi onye ahụ ịrụ ọrụ Chineke nyere ya. Baịbụl kwuru na ọ bụ ọrụ dịịrị ndị isi ezinụlọ inye ndị ezinụlọ ha ihe ndị na-akpa ha. (1 Timoti 5:⁠8) Ọ gaghị adị mma ka onyeisi ezinụlọ na-enye ndị ọzọ ihe ruo nke na ọ ga-eleghara ndị ezinụlọ ya anya. Jizọs katọdịrị ndị na-achọghị inyere ndị mụrụ ha merela agadi aka n’ihi na ha na-ekwu na ihe niile ha nwere bụ “onyinye a raara nye Chineke.”—⁠Mak 7:9-13.

Amaokwu Baịbụl ndị kwuru maka inye ihe

Ilu 11:25: “Mkpụrụ obi nke na-emesapụ aka ka a ga-eme ka ọ maa abụba, onye na-emekwa ka ndị ọzọ ṅụjuo mmiri afọ ka a ga-emekwa ka ọ ṅụjuo mmiri afọ.”

Ihe ọ pụtara: Inye ihe na-abara ma onye e nyere ihe ma onye nyere enye uru.

Ilu 19:17: “Onye na-emere onye ọ na-enweghị ka ọ hà ya amara na-agbazinye Jehova ihe, Ọ ga-akwụkwa onye ahụ ụgwọ ihe o mere.”

Ihe ọ pụtara: Chineke weere ya na ya ji ndị na-enyere ndị ọ na-enweghị ka ọ hà ha aka ụgwọ, o kwekwara nkwa na ya ga-akwụ ha ụgwọ ihe ọma ndị ha mere.

Matiu 6:2: “Mgbe ị na-enye onyinye ebere, afụla opi na-aga, dị nnọọ ka ndị ihu abụọ na-eme . . . ka ndị mmadụ wee nye ha otuto.”

Ihe ọ pụtara: Anyị ekwesịghị inye ihe ka ndị ọzọ wee hụ anyị.

Ọrụ Ndịozi 20:35: “A na-enweta obi ụtọ ka ukwuu n’inye ihe karịa ka a na-enweta n’ịnara ihe.”

Ihe ọ pụtara: Mmadụ isi n’obi nye ihe na-eme ka onye ahụ nwee obi ụtọ.

2 Ndị Kọrịnt 9:7: “Ka onye ọ bụla nye dị ka o kpebiri n’obi ya, ọ bụghị ná mwute ma ọ bụ ná mmanye, n’ihi na Chineke hụrụ onye na-eji obi ụtọ enye ihe n’anya.”

Ihe ọ pụtara: Ọ na-atọ Chineke ụtọ ma mmadụ si n’obi ya nye ihe.

.—Psalm 49:6, 7.