Ihe Baịbụl Kwuru Banyere Ịgba Alụkwaghịm na Nkewa

Jehova chọrọ ka di na nwunye kwesị ntụkwasị obi mgbe niile n’ebe ibe ha nọ. Mgbe Jehova na-ejikọta nwoke mbụ na nwaanyị mbụ, ọ sịrị: ‘Nwoke ga-arapara n’ahụ́ nwunye ya, ha ga-aghọkwa otu anụ ahụ́.’ Jizọs Kraịst mechara kwughachi okwu ahụ ma gbakwụnye, sị: “Ya mere, ihe Chineke kekọtara, mmadụ ọ bụla atọsala ya.” (Jenesis 2:24; Matiu 19:3-6) N’ihi ya, Jehova na Jizọs na-ele alụmdi na nwunye anya dị ka njikọ nke naanị ihe ga-egbubi ya bụ mgbe otu n’ime ha nwụrụ. (1 Ndị Kọrịnt 7:39) Ebe alụmdi na nwunye bụ ihe dị nsọ, e kwesịghị iji ịgba alụkwaghịm eti epele. N’ezie, Jehova kpọrọ ịgba alụkwaghịm nke Akwụkwọ Nsọ na-akwadoghị asị.—Malakaị 2:15, 16.

Olee ihe Akwụkwọ Nsọ kwuru nwere ike ime ka di na nwunye gbaa alụkwaghịm? Jehova kpọrọ ịkwa iko niile asị. (Jenesis 39:9; 2 Samuel 11:26, 27; Abụ Ọma 51:4) N’ezie, otú ọ kpọruru ịkwa iko asị mere ka o kwuo na ọ bụ ihe ga-eme ka mmadụ gbaa di ya ma ọ bụ nwunye ya alụkwaghịm. (Ị chọọ ịhụ ebe a kọwara ihe ịkwa iko pụtara, gụọ Isi nke Itoolu, paragraf nke 7.) Jehova kwuru na onye di ya ma ọ bụ nwunye ya kwara iko ga-ekpebi ma ya na ya hà ka ga-ebi, ka ọ̀ ga-agba ya alụkwaghịm. (Matiu 19:9) N’ihi ya, ọ bụrụ na o kpebie ịgba di ya ma ọ bụ nwunye ya ahụ kwara iko alụkwaghịm, o meghị ihe Jehova kpọrọ asị. Otú ọ dị, ọgbakọ Ndị Kraịst anaghị agba mmadụ ume ịgba di ya ma ọ bụ nwunye ya alụkwaghịm. N’ezie, e nwere ihe ndị nwere ike ime ka onye di ya ma ọ bụ nwunye ya kwara iko kpebie na ya agaghị agba ya alụkwaghịm, nke ka nke, ma ọ bụrụ na o ji obi ya dum chegharịa. Mee elu mee ala, ọ bụ ndị ahụ di ha ma ọ bụ nwunye ha kwara iko ga-ekpebi ma hà ga-agba alụkwaghịm. Ha ga-ejikwa isi ha buru ihe ọ bụla si na ya pụta.—Ndị Galeshia 6:5.

N’ọnọdụ ụfọdụ ebe ihe siri oké ike, ụfọdụ Ndị Kraịst ahapụla di ha ma ọ bụ nwunye ha ma ọ bụ gbaa ya alụkwaghịm n’agbanyeghị na onye ahụ akwaghị iko. Mgbe ihe dị otú ahụ mere, Baịbụl kwuru na onye ahụ hapụrụ di ya ma ọ bụ nwunye ya ‘ga-anọrọ n’alụghị di ma ọ bụ nwunye, ma ọ́ bụghị otú ahụ, ka ha abụọ kpezie.’ (1 Ndị Kọrịnt 7:11) Onye Kraịst ahụ ekwesịghị ịga chọwa onye ọzọ ọ ga-alụ. (Matiu 5:32) Ka anyị leba anya n’ọnọdụ ụfọdụ ebe ihe siri oké ike, nke mere ka ụfọdụ Ndị Kraịst kpebie ịhapụ di ha ma ọ bụ nwunye ha.

Mmadụ ịkpachara anya jụ ilekọta ezinụlọ ya. Ezinụlọ nwere ike ịghọ ogbenye ọnụ ntụ, n’ahụghị tụrụ rachaa, n’ihi na di anaghị egboro ha mkpa ha n’agbanyeghị na o nwere ego. Baịbụl kwuru, sị: ‘Ọ bụrụ na onye ọ bụla adịghị egboro ndị ezinụlọ ya mkpa ha, ọ jụwo okwukwe anyị, jọkarịakwa onye na-ekweghị ekwe ná njọ.’ (1 Timoti 5:8) Ọ bụrụ na nwoke ahụ ekweghị agbanwe, nwunye ya nwere ike ikpebi ma ọ̀ ga-anata akwụkwọ ga-enye ya ikike ịhapụ di ya ma chebe ya na ụmụ ya. N’ezie, ndị okenye ọgbakọ kwesịrị ileru anya ala mgbe e boro Onye Kraịst ebubo na ọ kpachaara anya jụ ilekọta ezinụlọ ya. E nwere ike ịchụpụ onye kpachaara anya jụ ilekọta ezinụlọ ya n’ọgbakọ.

Ịkụtara mmadụ isi aba okpu. Onye na-eme ihe ike nwere ike ịna-akụ di ya ma ọ bụ nwunye ya ihe ma mee ka ndụ ya na ọbụna ahụ́ ike ya nọrọ n’ihe ize ndụ. Ọ bụrụ na onye ahụ na-akụ di ya ma ọ bụ nwunye ya ihe bụ Onye Kraịst, ndị okenye ọgbakọ kwesịrị ịchọpụta ma ọ̀ bụ eziokwu. E nwere ike ikwo iwe ọkụ na ịkụ mmadụ ihe chụpụ mmadụ n’ọgbakọ.—Ndị Galeshia 5:19-21.

Igbochi mmadụ ife Chineke ma otu ma otu. Mmadụ nwere ike na-egbochi di ya ma ọ bụ nwunye ya mgbe niile ife Chineke ma ọ bụ ọbụna si n’ụzọ ụfọdụ na-agbalị ịmanye ya ka o mebie iwu Chineke. Mgbe ụdị ihe ahụ mere, onye ahụ a na-eme otú ahụ ga-ekpebi ma otú ọ ga-esi ‘erubere Chineke isi dị ka onye na-achị achị’ ọ̀ bụ inweta ikike ịhapụ di ya ma ọ bụ nwunye ya.—Ọrụ 5:29.

N’ọnọdụ ndị a niile anyị kwuru banyere ha, ọ dịghị onye kwesịrị ịgbalị ime ka onye a na-emegbu emegbu kweta ịhapụ di ya ma ọ bụ nwunye ya ma ọ bụkwanụ mee ka o kweta ka ya na ya biri. Ọ bụ ezie na ndị enyi jí ofufe Chineke kpọrọ ihe nakwa ndị okenye nwere ike inye nkwado na ndụmọdụ si na Baịbụl, ha enweghị ike ịmata ihe niile na-eme n’etiti di na nwunye. Ọ bụ naanị Jehova na-ahụ ihe niile na-emenụ. N’ezie, ọ bụrụ na Onye Kraịst etinye nsogbu ezinụlọ ya nnu na ose iji hapụ di ya ma ọ bụ nwunye ya, ọ gaghị abụ ịkwanyere Chineke ma ọ bụ alụmdi na nwunye ùgwù. Jehova ma nkata ọ bụla mmadụ kpara iji hapụ di ya ma ọ bụ nwunye ya, n’agbanyeghị otú o nwere ike isi gbalịa izochi ya. N’eziokwu, “ihe niile gba ọtọ, gherekwa oghe n’anya onye ahụ anyị ga-aza ajụjụ.” (Ndị Hibru 4:13) Ma ọ bụrụ na ọnọdụ ahụ ajọbiga njọ ókè ruo ogologo oge, ọ dịghị onye kwesịrị ịta Onye Kraịst mechara kpebie ịhapụ di ya ma ọ bụ nwunye ya ụta. Mee elu mee ala, “anyị niile ga-eguzo n’ihu oche ikpe nke Chineke.”—Ndị Rom 14:10-12.