Nọgidesie Ike n’Ọrụ Nkwusa
1 Oge dị oké egwu abịawo. Agha obodo, agha agbụrụ, ọdachi ndị na-emere onwe ha, na ihe ndị ọzọ na-eyi egwu juru ebe nile. Ozi ọma dị ụmụ mmadụ mkpa ugbu a karịa mgbe ọ bụla ọzọ. Ma, ọtụtụ mmadụ adịghị enwe mmasị n’ihe ime mmụọ. N’ebe ụfọdụ, ọ na-esi nnọọ ike ịchọta ndị mmadụ n’ụlọ, ọ na-akadị esi ike inweta ndị ga-ege anyị ntị ma ọ bụ ndị chọrọ ịmụ Bible. N’agbanyeghị nke ahụ, ọ dị mkpa ka anyị nọgidesie ike na-ekwusa ozi ọma nke Alaeze Chineke e guzobeworo.—Mat. 24:14.
2 Ịhụnanya Maka Ndị Mmadụ: Ọrụ nkwusa anyị na-eme ka ịhụnanya Jehova nwere n’ebe ndị mmadụ nọ pụta ìhè. “Ọ chọghị ka e bibie onye ọ bụla kama ọ na-achọ ka mmadụ nile ruo nchegharị.” (2 Pita 3:9; Ezik. 33:11) N’ihi ya, o nyewo iwu na, dị ka Jizọs kwuru, “a ghaghị ibu ụzọ kwusaa ozi ọma ahụ ná mba nile.” (Mak 13:10) Chineke na-arịọ ndị mmadụ ka ha lọghachikwute ya ma gbanahụ ikpe na-abịanụ nke a ga-ekpe ụwa Setan. (Joel 2:28, 29, 32; Zef. 2:2, 3) Obi ọ́ dịghị anyị ụtọ na Jehova nyere anyị ohere nke ikere òkè n’ọrụ dị otú ahụ?—1 Tim. 1:12, 13.
3 Akụkọ ozi ụwa nile nke afọ ije ozi 2004 gosiri na, ná nkezi, e duziri ọmụmụ Bible dị 6,085,387 kwa ọnwa, e meekwa ihe dị ka mmadụ 5,000, bụ́ ndị ka malitere amalite iso ụzọ Kraịst, baptizim kwa izu! A chọtara ụfọdụ n’ime ndị ọhụrụ a raara onwe ha nye n’ihi ngọzi Jehova gọziri mgbalị siri ike nke ndị nkwusa, bụ́ ndị nọgidere na-agba mbọ ịgwa onye ọ bụla nọ n’ókèala ha okwu. Lee ọṅụ nke ahụ meworo ka e nwee n’ọgbakọ! Leekwa ihe ùgwù ọ bụ ịbụ onye ya na Chineke na-arụkọ ọrụ a na-azọpụta ndụ!—1 Kọr. 3:5, 6, 9.
4 Ito Aha Chineke: Anyị na-anọgidesi ike n’ọrụ nkwusa iji too Jehova n’ihu ọha na iji doo aha ya nsọ n’ihu ihe nile a kpọrọ mmadụ. (Hib. 13:15) Setan eduhiewo “ụwa dum mmadụ bi” ikwere na ike Chineke erughị n’idozi nsogbu nke ihe a kpọrọ mmadụ, na ọ chọghị ịma banyere ahụhụ ụmụ mmadụ na-ata, ma ọ bụkwanụ na Chineke adịghịdị adị. (Mkpu. 12:9) Site n’ọrụ nkwusa anyị na-arụ, anyị na-eme ka a mara ihe bụ́ eziokwu banyere Nna anyị nke eluigwe dị ebube. Ka anyị nọgide na-eto aha ya—ugbu a na mgbe nile ebighị ebi.—Ọma 145:1, 2.