IHE ỌMỤMỤ NKE 2

Ikwu Okwu Ka Ebe Mmadụ na Ibe Ya Na-akparịta Ụka

2 Ndị Kọrịnt 2:17

IHE Ị GA-EME: Kwuo okwu otú i si ekwu okwu, otú ga-eme ka ndị ị na-agwa okwu mata otú i si were ma hanwa ma ihe ị na-ekwu.

Kpee ekpere, kwadebekwa nke ọma. Kpee ekpere ka uche gị dịrị n’ihe ị na-ekwu, ọ bụghị n’ebe gịnwa nọ. Gbaa mbọ ghọta isi ihe ndị dị n’ihe omume gị. Jiri okwu nke aka gị kwuo ya, agụla ya agụ.

Ọ bụrụ na ị chọrọ ịgụ Baịbụl ma ọ bụ akwụkwọ ọzọ, mụọ ya nke ọma ka o nwee ike ịga gị were were n’ọnụ mgbe ị na-agụ ya. Ị gụpụtawa ihe ndị ọzọ kwuru, gụọ ya otú ga-eme ka a ghọta otú obi dị ndị ahụ, kama ịgụ ya ka ọ tọwa ọchị.
Si n’obi gị kwuo okwu. Chee banyere ihe mere okwu gị ji dị ndị na-ege gị ntị mkpa. Buru ha n’obi. Otú i si kwụrụ, otú i si na-emegharị ahụ́ gị na ihu gị, ga-egosi na ihe ị na-ekwu si gị n’obi, nakwa na ị na echebara ha echiche.

Ikwu okwu otú i si ekwu okwu apụtaghị na ị ga na-ekwu ihe ọ bụla batara gị n’ọnụ. Ikwu okwu dị mfe nghọta na okwu ndị dabara adaba ga-egosi na ihe ị na-ekwu dị mkpa.
Na-ele ndị ị na-agwa okwu anya. Na-ele ndị ị na-agwa okwu anya ma ọ bụrụ na ọ dịghị njọ ime otú ahụ n’ógbè unu. Ị gwawa ọha mmadụ okwu, ọ ka mma i letụ otu onye anya, gị elee onye ọzọ, kama isi n’otu akụkụ lere mmadụ niile anya gaa n’akụkụ nke ọzọ.