Jesus Kị Messiah Ma Paamị

John gbaamị: ‘Dụba Ị dẹịn kịmị bomịnị.’ John bịsẹ egberi gbaami zụa ifie bụọdẹ. John Jordan Tọrụ ka kịmịotu akị beni bilemọtimi mị. Jesus sii-oia kụraị fịnị (30) timitimi bara laa ifiemị, ómịnị Galilee a barasinwẹrị Jordan Tọrụ bọọ mú John laamị. John wó akị benibilemọ kị Jesus mọ dọụmị. Anịa, John gbaa ụ pịrịmị: ‘Ịmịnị ị́ kọn benibilemọ agbẹịgha. Ị́mịnị kị ị kọn benibilemọ agbẹị-emi.’ Jesus gbaa John pịrịmị: ‘Ị́mịnị ị kọn benibilemọ kị Jehovah mọ dọụ wẹrịemi.’ Anịduonị ámịnị Jordan Tọrụ beni duosụọwẹrị John, Jesus akị benibilemọmị.

Jesus tọrụ bọọ benibilesinwẹrị paabo ifiemị, ómịnị tẹẹmị. Bịsẹ tịẹkiri mị agọnọbo finiiwẹrị Ọkpọnanaowei yalịyalị tẹmẹ bị elekpukpu bara agọnọ duo korobo Jesus beinmị. Jehovah kpọ agọnọ duo ẹrẹ bomị: “Ị́mịnị ine Tọbọụ, Ịmịnị ị́ tarị wẹrịemi; Ịmịnị ị́ sẹlẹ akịdẹ.”

Jehovah yalịyalị tẹmẹ mị Jesus asụọ ifie ka Jesus bo Christ, anịghakpọ Messiah a paamị. Jesus bịsẹ ifie kọọ koro Jehovah ụ fịrịmọ fịrị bị akị kiriogbo bọọ wẹnịmị.

Jesus benibilesin mị, ómịnị bou amú inyenrintimi 40 erein-ama baịmị. Ómịnị bou duo paabo ifiemị, ómịnị mú John laamị. Jesus wẹnị ụ dọụ múmịnị mị, John gbaamị: ‘Bei Ọkpọnanaowei Anịna nị akpọ bọọ emi seibo kọnsinmụ owei bị.’ John gbaa yebị baratụa kịmịotu pịrịwẹrị Jesus kị Messiah bara nimi mị. Bou bọọ Jesus paamọye bị ị́ mọ nimi wẹrịemi a? Wo barịị yọ bọọ dọụ ẹrị.