Jehovah Ẹrẹmị Yelaa Jesus Pịrịemi Baramị

1-2. (a) Jesus a pịrị baa dọụtimi deinmị teekị mịẹma o? (b) Omịnị bei egberitịbịmị te yeama kị kẹrị ẹrẹtei dọụmịnị a o?

THURSDAY buburumị, dein korodẹ ifiemị, Nisan 14, 33 C.E., Jesus ámọ yẹrị, kịrịịgha ụgụla pẹlẹ ụ pịrị, ụ weri, ụ vụrọ bá ụ baamụ ifie kpọ naịndẹ. Jesus wó peibolou nana tuuduo-otubo mọ kẹnị agọnọ warịbolou a mú fịyaị fịmị. Bịsẹ fịyaị fịsiindẹ ifiebị, Jesus kunumọ kụrọmọ-yeama akị wó fịrịmọpaaotubo pịrịmị. Ámịnị bịsẹ warị duopaabị naa alaghatimi Jesus pẹlẹwẹrị kẹnị tẹẹbịbị mịẹmị. Fịrịmọpaaowei John bịsẹ tẹẹbịbị kọn John chapter 17 ma gẹẹ wẹrịemi.

² Mị egberitịbịmị, omịnị Jesus tẹẹbịbị duo tolumọ akị yebo mọ, bá Jesus kiriogbo ma timi ifiemị, yelaa ụ pịrịdẹịn timi yebo mọ wo mọ kẹrị ẹrẹteimịnị.

“ỊMỊNỊ INÉ ẸRẸ MỊẸ Á NIMIMỌDẸ”

3. Jesus, Jehovah ẹrẹ gbelemọ yọmị teeki gbaa ma o, ụ bịsẹ gbaa yẹbị teeki wo tuu a o? (John 17:​6, 26)

³ Jesus tẹẹtimi ifiemị gbaa Jehovah pirimị: “Ịmịnị iné ẹrẹ mịẹ á nimimọdẹ.” Jehovah ẹrẹmị yelaa Jesus pịrịemi kị duonị ómịnị maa ifie ẹrẹmị mịẹ wó tuuduo-otubo nimimọdẹ bara gbaamị. (John 17:​6, 26 goo.) Wó tuuduo-otubo Jew duo paaemi kịmịama duonị, Ọkpọnanaowei ẹrẹmị Jehovah bara nimi wẹrịemi. Bible didaba, bịsẹ ẹrẹmị Hebrew akị gẹẹ wẹrịemi angama biin yọama k’emi. Anịduonị Jesus teekị gbaamịnị a o? Ómịnị ánị nimigha wẹrị ẹrẹ kị gbaa á pịrịtimi ma? Jesus, “Ịmịnị iné ẹrẹ mịẹ á nimimọdẹ” bara gbaa ifiebị, Ọkpọnanaowei ẹrẹmị Jehovah bara kị gbaa á pịrị bara fa, anịa ómịnị ẹrẹmị a tịbịtịẹmọ wẹrịemi yebo kị gbaa á pịrịmị. Jesus baratụa wó tuuduo-otubo pịrịwerị ebibara Jehovah emibara ma sụọtuu nimimị. Gbaamịnị barasẹ, Jesus, Jehovah mịẹmịnị yebo mọ, wó tọnmịnị irorobo mọ bá wó ebi inyerinbụọbo mọ akị á tolumọmị. Jehovah nimi Jesus laa kịmị fa duonị, ómịnị kị laa ebibara bei yebo akị wo tolumọ a paaemi.

4-5. (a) Ebibara kịmị ẹrẹ nimi mọ yọmị, ye kọn tọnmọ gbaa? (b) Jesus tuuduo-otubo tebara ka kị Jehovah ẹrẹ nimi ma o?

⁴ Wẹrị bei tọnmọdịaye kẹrị iroro dii, iné itumị kẹnị David tịịnmịnị itu-kosuowei dọọnzụọ-owei ka paaemi, ị́mịnị biin kụraịama ka kị bịsẹ bịnaowei nimidẹ. Kẹnị erein laabị, ị́mịnị vurudu bara dọọnmị, ị́ saị mú bịsẹ bịnaowei fịrịwẹnịmịnị hospital laabị, David wó tolumọdẹ yebo kọn iné dọọn zụọmị. Ị́mịnị bei bịnaowei tarị bọlọụ ifie dẹịnmịnị, wó ẹrẹmị ị́ mọ naadẹ ifiesẹ, ị́mịnị ụ mịẹ ị́ pịrị yemị ukiemịnị. Ómịnị itu-kosuowei bara bẹtịbị ị́ mọ ukiegha fa, anịa ụndụ zụọmịnị dọọn zụọ-owei bara kpọ ị́ mọ ukiemịnị.

⁵ Bisẹbara kị Jesus tuuduo-otubo kpọ Jehovah ẹrẹ nimi wẹrịemi, anịa Jesus bo Jehovah ẹrẹ ma tuugbaa á pịrị ifiebi, ẹrẹbị dụba ánị nimiwẹrị bara dẹịnmị. Tetuu kị duonị omịnị bịsẹbara gbaa a paaemi a o? Tuumị, Jesus gbaamịnị egberibo mọ, bá inyenrinmịnị bara mọ ómịnị ụ dau kị dimịẹmịnị bara mịẹ gaan paamọmị. Anịduonị Jesus fịrịmọpaa-otubo wó tolumọ egberibo pei, bá wó akị kịmịotu mọ inyenrinmịnị barabị ẹrị ifiebị, ámịnị Jehovah asụotuu “nimi” dẹịnmị.—John 14:9; 17:3.

“INÉ ẸRẸBỊ NẸ, Ị́ KỌN Ị PỊRỊDẸ YEMỊ”

6. Jesus tetuu kị duonị Jehovah wó ẹrẹ kọn ị pịrịdẹ bara gbaa a paaemi a o? (John 17:​11, 12)

⁶ Jesus bịsẹ tẹẹbịbị mịẹtimi ifiemị, ómịnị tẹẹ wó tuuduo-otubo kpọ pịrịmị. Ụ gbaa amọ: “Iné ẹrẹbị nẹ, ị́ kọn ị pịrịdẹ ye duonị tọrụtụa á dii.” (John 17:​11, 12 goo.) Jesus mọ Jehovah mọ kẹnị ẹrẹ fịmịnị bara kị gbaamịnị a o? Bịsẹ baragha. Jesus bịsẹ tẹẹbịbị mịẹtimi ifiemị, “iné ẹrẹbị” kị gbaa Jehovah pịrịmị. Anịduonị Jehovah mọ Jesus mọ kẹnị ẹrẹ kị nana wẹrịemi bara fa. Anịa tetuu kị duonị Jesus gbaa amọ Jehovah wó ẹrẹ kọn ị pịrịdẹ bara gbaa ma o? Bọlọụ tuumị, Jesus kị Jehovah bẹbẹ ẹrẹ-owei bá Jehovah a tịbịtịẹmọ wẹrịemị. Ómịnị kiriogboma bo ifiemị Jehovah ẹrẹ ka kị tamamaa fịrịama wẹnịmị. (John 5:43; 10:25) Bịsẹ yọ kị bụọmọ kpọ Jesus ẹrẹ tuumị gbaa amọ “Jehovah kị Zụọbụọmọ-owei.” Anịduonị Jehovah ẹrẹbị Jesus ẹrẹ bolou bọọ sụọemi.

7. Tetuu kị duonị Jesus, Jehovah a tịbịtịẹmọ werị ẹrẹ a paaemi a o? Tọnmọdịaye gbaa.

⁷ Jesus, Jehovah bẹbẹ ẹrẹ-owei a paa baramị wo mọ nimi dọụmịnịsẹ, wo wẹrị bei tọnmọdịaye dii. Yọ daamịnị ụbọ, kịmị fịrịmọ wó a tịbịtịẹmọ wẹrị wó ịkịọụ emi egberi gbaa zịnịotu pịrị a paaemi. Bịsẹbara kị Jehovah, Jesus fịrịmọwẹrị wó ịkịọụ emi egberiama gbaa paamọmịnị. Anịduonị Jesus, Jehovah ẹrẹ ka tịbịtịẹmọ wẹrị ẹrẹ kịmịotu pịrịmị.—Matt. 21:9; Luke 13:35.

8. Tetuu kị duonị Jesus naa kiriogbo ma bogha ifie kpọ Jehovah wó ẹrẹmị Jesus mọ emibara gbaa ma o? (Exodus 23:​20, 21)

⁸ Bible mị, Jesus kọn Jehovah Ẹrẹbịbị kị tịịnmị. Tuumị, Jesus kị Jehovah bẹbẹ ẹrẹ-owei duonị, Jehovah ómịnị kị fịrịmọ yeama gbaa angel-otubo mọ bá kịmịawọụbo mọ pịrịmịnị. (John 1:​1-3) Israel otubo ozubọụ (wilderness) ma timi ifiemị, kaanghaba Jehovah Jesus kị fịrịmọ mú á kekeretimimị. Israel otubo, angel-owei gbaamịnị egberi pei agbẹị-emi tuu Jehovah mọ gbaa á pịrịtimi ifiemị, Ómịnị gbaamị: “Tuumị, ine ẹrẹmị ụ mọ mọ́ emi.”a (Exodus 23:​20, 21 goo.) Jesus kị wó bẹbẹ ẹrẹ-owei bá wó ẹrẹ mịẹ yalịyalịmịnị bara Jehovah mọ nimi wẹrịemi, anịkịduonị wó ẹrẹmị Jesus mọ “emi” bara gbaamị.

“Ị DAỤ, INÉ ẸRẸ TOKONI”

9. Jehovah ẹrẹmị tebara ka kị yelaa Jesus pịrị ma o? Tuugbaa.

⁹ Wo tolumọdẹ baramị, Jesus naa kiriogboma bogha ifie kpọ Jehovah ẹrẹbị yelaa ụ pịrịdẹịn timimị. Anịduonị Jesus wó wẹnị fịrịbosẹ, ụ Daụ ẹrẹ ka kị tụa mịẹ yọbị wo mịẹ tamamagha. Wó egberigbaa fịrịbị kunumọ dọụtimi ifiebị, Jesus gbaamị: “Ị Daụ, iné ẹrẹ tokoni.” Ifie famọgha barabị Jehovah opu okolo akị agọnọ duo parụmị: “Ịmịnị ine ẹrẹ tokonịdẹ bá mọkpọ tokonimịnị.”—John 12:28.

10-11. (a) Jesus tebara ka kị Jehovah ẹrẹ tokoni ma o? (Foto kpọ dii.) (b) Tetuu kị duonị Jehovah ẹrẹ mịẹ yalịyalị bá wó mịẹmịnị yebosẹ kịrịịemi bara mịẹgaan agbẹị-emi a o?

¹⁰ Jesus kpọ ụ daụ ẹrẹ tokonimị. Te ụwọụ a o? Kẹnị ụwọụ anị ómịnị ụ Daụ ebi inyenrinbụọbọ mọ bá wó wẹnịmịnị fịrịbo mọ gbaa zịnịotu pịrịmị. Mọabịkpọ, Jehovah ẹrẹ tokonịmụ yọmị, zịnị yeama sụọemi. Jesus, Jehovah ẹrẹmị mịẹ yalịyalị, bá ómịnị kịrịịye bẹtịbị kị mịẹmịnị bara kpọ mịẹgaan paamọmịnị.b Jesus tẹẹbịbị mịẹmụ bara kọn wó tuuduo-otubo tolumọtimi ifiemị, Jehovah ẹrẹ mịẹ yalịyalịmụ yọmị yelaaemi bara gbaa á pịrịmị. Ụ gbaamị: “Wo Daụ nẹ agọnọ emi owei, pebidá iné ẹrẹmị yalịyalịtimi.”—Matt. 6:9.

¹¹ Tetuu kị duonị Jehovah ẹrẹ mịẹ yalịyalị bá wó mịẹmịnị yebosẹ kịrịịemi bara wo mọ gbaa a paaemi a o? Tuubị Garden of Eden ifiebị, Satan, Jehovah diiseimọ bá wo ẹrẹ kpọ gbaseimọmị. Satan gbaa amọ, Jehovah ekpe-owei, bá Adam mọ Eve mọ laa agbẹị-emi ebi yeama kọn á pịrịgha bara kpọ gbaamị. (Gen. 3:​1-5) Jehovah mịẹmịnị yebo benebene ebigha bara kpọ Satan mọ gbaamị. Satan, Jehovah ebi inyenrinbụọbo kị gbaseimọmị. Job ereinbo kpọ Satan gbaa amọ Jehovah karịmịnị otubo, wó bara duo nanamịnị arerebo kị duonị ụ karịmịnị. Ómịnị mọkpọ gbaamị, kịmịawọụ Jehovah tarịgha duonị kụrọ bụụdọọnye asụọdaba, ba Jehovah karịgha fa. (Job 1:​9-11; 2:4) Anịa Jehovah mọ Satan mọ te ụbọ kị ekpemịnị a o? Kịmịotu ekpemịnị ubọ nimimụ yọbị ifie dọụ wẹrịemi.

“ỊMỊNỊ ANGỌ PAAMỌ FỊỊMỊ”

12. Jesus, Jehovah tarị wẹrịemi duonị teeki mịẹ ma o?

¹² Jesus, Jehovah tarịemi duonị wó kụrọsẹ kọn Jehovah ẹrẹ mịẹ yalịyalịmị bá Jehovah mịẹmịnị yebosẹ kịrịịemi bara mịẹgaan paamọ dọụmị, anịduonị Jesus gbaamị, “ịmịnị angọ paamọ fịịmị.” (John 10:​17, 18) Gesiibị, Jesus, Jehovah ẹrẹ duonị fịị kị paa kpọ fịịmụ bara gbinipẹlẹmị.c Adam mọ Eve mọ Jehovah dọụbara mịẹgha, Satan anga kị sẹlẹ angọ pịrịmị. Anịa Jesus bịsẹ bara mịẹgha, ómịnị Jehovah tarị duonị kịmị ụ penimọgha bara kiriogboma bomị. (Heb. 4:15; 5:​7-10) Jesus peibolou nana bara Jehovah gbaabara kị dii yebosẹ mịẹmị. Ómịnị wó peibolou kẹrị-kụrọmọtimi á pịrị kaị baa ifie laamị. (Heb. 12:2) Jesus bịsẹbara ka kị Jehovah mọ wó ẹrẹ mọ tarị wẹrịemi bara mịẹdịamị.

13. Tetuu kị duonị Jesus bẹtịbị kị laa Satan ekpe egberibo mịẹgaan paamọ a paaemi a o? (Foto kpọ dii.)

¹³ Jesus wó inyenrinbụọ ka kị Satan ekpe-owei, bá Jehovah kịrịịye kị mịẹmịnị Daụ bara mịẹgaanmị. (John 8:44) Jehovah tẹmẹ yebosẹ, Jesus kị ebibara Jehovah a sụọtuu nimi dẹịn-emi. Satan akị Jehovah gbaịnmọ egberibo gesii timiwẹrị a, Jesus nimimọ timimị. Anịa Jesus, Jehovah ẹrẹ kị mịẹ yalịyalịmị. Jehovah, Jesus a barasinwẹrị ụyafị ifie kpọ, Jesus, Jehovah tarị, bá fịị kị paa kpọ fịị Jehovah ẹrẹ pịrịmụ bara gbinipẹlẹmị.—Matt. 27:46.d

“Ị́ KỌN Ị PỊRỊ FỊRỊMỊ . . . Ị MỌ WẸNỊSIINDẸ”

14. Jesus peibolou nana yọmị te tarịama kị ụ laa ma o?

¹⁴ Jesus bịsẹ tẹẹbịbị mịẹtimi ifiemị, ụ gbaamị: “Ị́ kọn ị pịrị fịrịmị. . . ị mọ wẹnịsiindẹ.” Wó peibolou nana yọbị Jehovah tarịama kọn ụ pịrịmụ bara Jesus mọ nimimị. (John 17:​4, 5) Jesus akị ụ Daụ a nana etimị afẹn a fagha, tuumị Jehovah ụ bụọmọ dụwẹị-ogugu bọọ timi alagha. (Acts 2:​23, 24) Jehovah ụ tịịn fịịyọ duo serị agọnọ amúwẹrị yelaa kasị kọn ụ pịrịdẹ. (Phil. 2:​8, 9) Jehovah Daabụọ mị Jesus kị Pẹrẹ asụọdẹ. Bịsẹ Daabụọ mị teeki mịẹmịnị a o? Tẹẹbịbị mịẹmụ bara kọn wó tuuduo-otubo tolumọtimi ifiemị, Jesus gbaamị: “Pebidá iné Daabụọ mị bo, pebidá iné [Jehovah] dọụbaramị paa, agọnọ ma emi baramị bei kiriogbo kpọ a paa.”—Matt. 6:10.

15. Mị bọlọụmị Jesus mọkpọ te yeama kị mịẹmịnị a o?

¹⁵ Alaghatimi, Jesus Armageddon sụụmị Ọkpọnanaowei egiren-otubosẹ baamịnị. (Rev. 16:​14, 16; 19:​11-16) Bịsẹ sụụ bụọdaba, alaghatimi Jesus, Satan kẹrị kaịmịnị, Satan ba kụrọ nanawẹrị kẹnị ye kpọ mịẹgha fa. (Rev. 20:​1-3) Jesus kụraị kẹnị ogịzị akị daamịnị ifiemị, ómịnị dọọ bá sei fa akpọ mịẹ kịmịsẹ pịrịmịnị, fịịdẹ-otubo kpọ tịịn serimịnị, kiriogbosẹ kọn paradise mịẹmịnị bá Jehovah dọụyọ mịẹ beinmọmịnị!—Rev. 21:​1-4.

16. Jesus daatimi kụraị kẹnị ogịzị fadaba teeki paamịnị o?

¹⁶ Jesus daatimi kụraị kẹnị ogịzi laadaba teeki paamịnị a o? Ómịnị sei kọn kịmịawọụ angọbosẹ duo serimịnị. Bịsẹ ifie laadaba kịmị ba Jesus kụn ịkịan duo sei bụọmọ yọ biigha fa. Jesus mọ daamịnị 144,000 otubo kpọ ba kịmịawọụ ịkịankụn-otu a paagha fa. Jesus kpọ ba dụbadẹịn ịkịankụn-owei a paagha fa. Kịmịawọụ ba Jesus kị duo Jehovah mọ naịnmụ bara kpọ paagha fa. Wo “kunumọ egiren-owei, [Adam dụọbo] fịị kpọ ba timigha fa.” Fịịdẹ otubo tịịn sẹrịdẹ duonị dụwẹị ogugubo kpọ kẹnị ụbọ kpọ ba timigha fa. Kịrịogbo bọọ inyenrinmịnị otubosẹ ba sei angọ a timigha fa.—1Cor. 15:​25, 26.

17-18. (a) Jesus kụraị kẹnị ogịzị daabụọ mị fadaba teeki paamịnị a o? (b) Jesus daatimi kunumọ daba teeki mịẹmịnị a o? (1Corinthians 15:​24, 28) (Foto kpọ dii.)

¹⁷ Jesus daatimi kụraị kẹnị ogizi fadaba teeki mọkpọ paamịnị o? Bịsẹ ifie laadaba kẹnị yelaa ye paamịnị. Jehovah yalịyalị ẹrẹ seimọtimi egberimị dụụmịnị. Tebara a o? Eden fanịboloumị, Satan, Jehovah kọn ekpe-owei tịịn bá tarị nanagha ụwọụ ka kị kịmịawọụ daamịnị bara kpọ gbaamị. Anịa bịsẹ ifie duobosẹ Jehovah karịmịnị otubo, Jehovah yemịẹmịnị bara kị ebidẹịn-emi bara mịẹgaan timi mị tịẹkiri laadẹ. Anịduonị Jesus kụraị kẹnị ogịzị daabụọ mị fadaba, Satan kọn Jehovah tịbị gbaịnmọ egberibosẹ, ekpe egberiama bara bọ gaan paamịnị. Jehovah kọkọ tarịnana wẹrịemi agọnọ Daụ mịẹ gaan paamọmịnị.

¹⁸ Jesus daatimi kụraị kẹnị ogịzị fadaba, Satan gbaa yebosẹ ekpe egberiama bara kịmịsẹ mọ ẹrịmịnị. Jesus daatimi kunumọ daba teeki mịẹmịnị a o? Ụ kpọ Satan a tuuduowẹrị Jehovah gbaaseimọmịnị a o? Benebene! (1Corinthians 15:​24, 28 goo.) Jesus Daabụọ bụọmọ akị Jehovah pịrịmịnị, ómịnị ango-iyerimọ ụ Daụ pịrịmịnị. Jesus Ụ Daụ tarịemi duonị, yebosẹ kị bụọmọ ụ pịrịmịnị.

19. Jehovah ẹrẹmị tebara ka kị yelaa Jesus pịrịemi a o?

¹⁹ Jehovah, Jesus ka kị wó ẹrẹmị a tịbịtịẹmọ yọmị, seigha! Jesus gesii bara wó Daụ emibara kọn wo dịadẹ. Jehovah ẹrẹmị tebara ka kị yelaa Jesus pịrịemi a o? Jehovah ẹrẹmị yelaa Jesus pịrị zịnị yebosẹ dẹịn-emi. Jesus bịsẹ ẹrẹ duonị angọ paamọ fịịmị, bá bịsẹ ẹrẹ duonị, kụraị kẹnị ogịzị daabụọ dụụ daba, waị yebosẹ bụọmọ Daụ pịrịmịnị. Anịa wosẹ tebara ka kị Jesus dimịẹmịnị a o? Barịị egberitịbịmị, omịnị mị biibịbị kẹrị ẹrẹteimịnị.