Jehovah Ẹrẹmị Yelaa Wo Pịrịemi Baramị

1-2. Omịnị tebara kị mịẹtimi Jehovah ẹrẹmị yelaa Jesus pịrị bara nimi ma o?

JEHOVAH ẹrẹ kị yelaa Jesus pịrị dẹịnmị. Kẹnị ụbọ kpọ laa Jesus ụ Daụ ẹrẹ kọn kịmịotu tolumọ bara tolumọgha fa. Wo tolumọ bụọdẹ egberitịbịmị, Jesus fịị kị paa kpọ fịịwẹrị ụ daụ ẹrẹ mịẹ yalịyalịmụ bara mịẹdịamị. (Mark 14:36; Heb. 10:​7-9) Ómịnị daatimi Kẹnị Ogẹzị kụraị bụọdaba, ụ daụ ẹrẹ mịẹ yalịyalịmụ yọ duonị kụrọbosẹ bụọmọ ụ daụ pịrịmịnị. (1Cor. 15:​26-28) Tamanaịnyọ fa baramị Jesus mịẹ yebosẹ, ómịnị kọkọ ụ daụ mọ kẹnị sụọmọemi bara mịẹdịamị. Ómịnị ụ daụ tarị kụrọmọemi bara kpọ mịẹdịamị.

² Jesus ụ daụ ẹrẹ kị duonị kiriogbo bọọ bomị. (John 5:43; 12:13) Ómịnị wó daụ ẹrẹ mịẹ wó tuuduo-otubo pịrị nimimị. (John 17:​6, 26) Jehovah kị kụrọ kọn ụ pịrịwẹrị kịmịotu tolumọ bá tamama yeama mịẹmịnị bara kpọ gbaa á pịrịmị. (John 10:25) Jesus tẹẹbịbị duo gbaamị “iné ẹrẹ duonị tọrụtụa á dii.” (John 17:11) Ómịnị wó wẹnị fịrịbosẹ Jehovah ẹrẹ kị yelaa dẹịn-emi bara mịẹdịamị, bịsẹbara didaba Jehovah ẹrẹ kpọ nimigha ụbọ bá kọn zịnịotu kpọ tolumọgha ụbọ Christ tuuduo kịmị kọn angọ tịịn agbẹị-emi a o?

3. Bei egberitịbịmị omịnị teeki kẹrị ẹrẹteimịnị a o?

³ Omịnị kpọ Jesus tuuduo-otuama duonị, wó mịẹbara kị dịmịẹmịnị, omịnị kpọ Jehovah ẹrẹmị yelaa-emi bara mịẹdịamịnị. (1Pet. 2:21) Mị egberitịbịmị, Jehovah wó ẹrẹ kọn “daabụọ ebiegberi gbaamịnị” otubo tịịn wẹrịemi bara wo mọ ẹrịmịnị. (Matt. 24:14) Omịnị mọkpọ Jehovah ẹrẹmị yelaa wo kẹnị ụbọ kẹnị ụbọ pịrịemi bara kpọ kẹrị ẹrẹteimịnị.

“WÓ ẸRẸ KỌN TỊỊNDẸ KỊMỊAMA”

4. (a) Jesus waị agọnọ amú dọụtimi ifiemị te fịrị ka kị wó tuuduo-otubo pịrị ma? (b) Bịsẹ fịrị gbelemọ yọbị te biibịbị kị paa ma o?

⁴ Jesus waị agọnọ amúmụ ifie naịndẹmị, ómịnị gbaa wó tuuduo-otubo pịrịmị: “Yalịyalị tẹmẹ ánị a sụọwẹrị, ámịnị Jerusalem, Judea, Samaria, bá kiriogboma aladẹịn yọama amúwẹrị iseritịẹ ị pịrịmịnị.” (Acts 1:8) Ibebo emi kịmịbosẹ laa bo Jesus tuuduo-otuama a paamụ fomuun nanamụ yọ duonị, ebiegberi gbaa zịnị yọama kpọ laamịnị, Israel ibe bẹtịbịgha. (Matt. 28:​19, 20) Jesus kpọ gbaamị: “Ámịnị ine iseri-otuama a paamịnị.” Anịa mị aya tuuduo-otubo Jehovah ẹrẹ nimi agbẹị-emi a, anịghakpọ Jesus tuuduo-otuama bẹtịbị ka paamịnị a? Acts chapter 15 bọọ paa yemị anị biibịbị parụ wẹrịemi.

5. Jerusalem bọọ timi fịrịmọpaa-otubo mọ bá itu-kosuotubo mọ tebara ka kị kịmịsẹ Jehovah ẹrẹ nimi agbẹị-emi bara mịẹ ma o? (Foto kpọ dii.)

⁵ Kụrai 49 C.E. bị, fịrịmọpaa-otubo mọ bá itu-kosuotubo mọ Jerusalem a gbelei wẹrị, Jew duo paagha otubo mịẹ dẹkị bo Christtuuduo-otuama paamụ egberiama kẹrị ẹrẹteimị. Egberi kunumọ dọụtimi ifiemị, James, Jesus bịnaowei bị, mị egberi gbaamị: “[Peter] egberi gbaasindẹ, mị kị bọlọụ ifie nẹ Ọkpọnanaowei wó tọrụbọ kọn ibebo ditụa wẹrị wó ẹrẹ kọn tịịndẹ kịmịama” sẹlẹmịnị ifie. James te ụbọ ẹrẹ kị bẹmọmịnị a o? Bụrụowei Amos fun bọọ emi yebo ụ mọ gbaatimi ifiemị, James gbaamị: “Anịkị kọọemi kịmịbọ mọ bá ibe bọọ emi otubosẹ Jehovah dọụ mú a paadẹ, Jehovah gbaamị, bei ịmịnị ine ẹrẹ kọn tịịn wẹrịemi kịmịama.” (Acts 15:​14-18) Mị aya tuuduo-otubo Jehovah ẹrẹ bẹtịbị nimigha fa, anịa ‘wó ẹrẹ kpọ kọn á tịịnmịnị.’ Gbaamịnị barasẹ Jehovah ẹrẹ ka kị á tịịnmịnị bá Jehovah ẹrẹ ka kị á lelei nimimịnị.

6-7. (a) Jesus tetuu kị duonị kiriogboma bo ma? (b) Te zịnị yelaadẹịn ye kị Jesus mịẹ kiriogboma bo ma o?

⁶ Jesus ẹrẹ tuumị “Jehovah kị Zụọbụọmọ owei,” Jehovah, Jesus ka kị peibolou nana wẹrịemi otubosẹ zụọbụọmọmịnị. Jesus kiriogbo ma bowẹrị fịị kịmịawọụ pịrịmị. (Matt. 20:28) Kịmịawọụ laa fagha fagha ụndụ nanamụ yọ duonị, ómịnị parụbụọmọ ịkịan kụnmị.—John 3:16.

⁷ Tetuu kị duonị kịmịawọụ zụọbụọmọye dọụ ma o? Eden fanịbolou ma paaye kị duonị. Wo tolumọ bụọmọdẹ egberitịbịbị, wo bọlọụ daụ mọ yin mọ, Adam mọ Eve mọ, tịbịkụrọ Jehovah pịrị duonị fagha fagha ụndụ nanamụ fomuun tangbei bara wo mọ tolumọmị. (Gen. 3:​6, 24) Anịa, Satan Jehovah ẹrẹ gbaseimọ wẹrịemi kị duonị Jesus mị kiriogboma bomị. Bịsẹ yọmị yelaa akị kịmịawọụ zụọbụọmọmụ yọ dẹịn-emi. (Gen. 3:​4, 5) Anịduonị Adam mọ Eve mọ awọụbo zụọbụọmọye nanamụ yọ mọ Jehovah ẹrẹ mịẹ yalịyalịmụ yọ mọ kẹnị kị sụọmọemi. Jesus, Jehovah ẹrẹ ka tịbịtịẹmọ wẹrị kiriogboma bomị, anịduonị ómịnị Jehovah ẹrẹ mịẹ yalịyalịmụ yọbị dụba fịrị kị wẹnịmị.

8. Jesus tuuduo-otubosẹ teeki a sụọtuu nimi agbẹị-emi a o?

⁸ Peibolou akị Jesus atụa wẹrịemi kịmịbosẹ, Jew bá Jew otugha kpọ, zụọbụọmọye Jesus’ Daụ, Jehovah kị dụọbo á laamịnị bara nimi agbẹị-emi. (John 17:3) Bei kịmịbo kpọ Jesus bara, Jehovah ẹrẹ ka kị á leleimịnị. Ámịnị kpọ Jehovah ẹrẹ mịẹ yalịyalịmụ yọbị yelaa-emi bara nimimịnị. Ánị zụọbụọmọ yebị bịsẹyọ ka sẹsẹrẹ emi. (Acts 2:​21, 22) Anịduonị peibolou nana Jesus tuuduo-otubosẹ, Jehovah mọ Jesus mọ nimi agbẹị-emi. Anịkịduonị Jesus bei egberibo kọn John 17 bọọ emi tẹẹbịbị kunumị: “Ịmịnị iné ẹrẹ mịẹ á nimimọdẹ bá ịmịnị mọkpọ mịẹ á nimimọmịnị, anịkị ị́ kọn ine a nana wẹrịemi tarịbị ámọ mó timimịnị.”—John 17:26.

“ÁMỊNỊ INE ISERIOTUAMA”

9. Omịnị tebara ka kị Jehovah ẹrẹmị yelaa wo pịrịemi bara mịẹdịamịnị a o?

⁹ Jesus tuuduo-otubosẹ, Ọkpọnanaowei ẹrẹ mịẹ yalịyalịmụ yọmị dịsẹnana agbẹị-emi. (Matt. 6:​9, 10) Ámịnị Jehovah ẹrẹ didụbamọ zịnị ẹrẹbosẹ dẹịnmịnị, bịsẹ yọmị wẹnịfịrị kpọ bolouma sụọemi. Anịa omịnị tebara ka kị Jehovah ẹrẹ mịẹ yalịyalịmịnị a o, anịghakpọ Satan akị Jehovah gbaịnmọ wẹrịemi egberimị ekpe egberi bara mịẹgaan paamọmịnị a o?

10. Isaiah chapter 42 duo mú 44 mị teeki wo mọ dọụ ẹrị ma o? (Isaiah 43:9; 44:​7-9) (Foto kpọ dii.)

¹⁰ Jehovah ẹrẹ mịẹ yalịyalị agbẹị-emi bara gbaa wẹrịemi Bible yọmị, Isaiah chapter 42 duo mú 44 k’emi. Bei chapterbo Jehovah ụ karịgha otubo paabodá ánị karịmịnị orubo inyenrinmịnị bara mịẹgaan paamọ bara gbaamị. Kẹnị ụbọ kpọ laa ụ parụgha!—Isaiah 43:9; 44:​7-9 goo.

11. Isaiah 43:​10-12 bị, Jehovah teeki gbaa wó kịmịbo pịrị ma o?

¹¹ Isaiah 43:​10-12 goo. Jehovah wó kịmịbo gbelemọ yọbị gbaamị: “Ámịnị ine iseriotuama, . . . bá ịmịnị kị Ọkpọnanaowei.” Ámịnị mị biibịbị parụ bara Jehovah mọ gbaamị: “Ị́ bụọmọ daba zịnị Ọkpọnanaowei emi a?” (Isa. 44:8) Anịa, omịnị bei biibịbị parụmụ fomuun nana wẹrịemi. Omịnị wo ẹrẹmịnị egberibo mọ wo wẹnịmịnị fịrịbo mọ, Jehovah kị kọkọ gesii Ọkpọnanaowei bara mịẹdịamịnị. Jehovah ẹrẹbị dụba akị zịnị ẹrẹbosẹ dẹịn-emi. Satan kọn bodẹ dadiyesẹ, omịnị Jehovah mọ kpẹkpẹrẹẹ bá wo ụndụsẹ kọn ụ tarị wẹrịemi bara mịẹdịamịnị. Bịsẹbara wo mọ mịẹdaba, omịnị Jehovah ẹrẹ mịẹ yalịyalịmịnị.

12. Isaiah 40:​3, 5 bọọ gbaa wẹrịemi bụrụ-egberimị tebara ka kị paabein ma o?

¹² Omịnị kpọ Jehovah anga k’emi ifiesẹ, omịnị Jesus Christ damịẹmịnị. Isaiah kẹnị bụrụ-egberi gbaamị, kịmị “ụwọụ tọlọmọ” Jehovah pịrịmịnị.” (Isa. 40:3) Mị bụrụ egberimị tebara ka kị paabein ma o? John kịmị akị benibilemọ owei ụwọụ tọlọmọ Jesus pịrịmị, ómịnị kị Jehovah ẹrẹma tịbị-tịẹmọmị bá Jehovah ẹrẹ kọn egberi gbaamị. (Matt. 3:3; Mark 1:​2-4; Luke 3:​3-6) Bịsẹ bụrụ-egberi mọkpọ gbaamị: “Jehovah dụbamị gaan paamịnị.” (Isa. 40:5) Jehovah dụbamị tebara ka kị gaan paa ma o? Jesus kiriogbo ma bo ifiemị, Jehovah ebi inyenrinbụọbọ mịẹdịa duonị, Jehovah kị wó angọ kọn kịrịogbo ma bo bara kị paamị.—John 12:45.

13. Omịnị tebara ka kị Jesus damịẹmịnị a o?

¹³ Jesus bara, omịnị kpọ Jehovah Iseriotuama, Jehovah ẹrẹ ka kị wo tịịn wẹrịemi, omịnị Jehovah mịẹ tamama yebo gbaa kịmịotu pịrịmịnị. Bịsẹyọ mịẹ beinmọmụ yọmị, omịnị Jesus akị Jehovah ẹrẹ mịẹ yalịyalị bara kpọ gbaa kịmịotu pịrịmịnị. (Acts 1:8) Jesus kị Jehovah gbelemọ ebi egberibo gbaa dẹịnmị, omịnị ba Jesus kị dimịẹmịnị. (Rev. 1:5) Anịa omịnị tebara ka kị Jehovah ẹrẹmị yelaa wo kẹnị-ụbọ kẹnị-ụbọ pịrịemi bara mịẹdịamịnị a o?

JEHOVAH ẸRẸMỊ YELAA WO PỊRỊEMI BARAMỊ

14. Psalm 105:3 gbaa bara didaba, Jehovah ẹrẹ fịmịnị yọmị tebara ka kị wo mịẹmịnị a o?

¹⁴ Omịnị Jehovah ẹrẹ gbaa paamọmụ yọbị bụzegha fa. (Psalm 105:3 goo.) Omịnị Jehovah ẹrẹ fịmịnị yọmị kọn baladaba Jehovah mịẹ pọwẹị nanamịnị. (Jer. 9:​23, 24; 1Cor. 1:31; 2Cor. 10:17) “Jehovah kọn bala” gbaadaba, anị Jehovah wo Ọkpọnanaowei kọn pọwẹị nanamịnị yọ kị gbaamịnị. Jehovah yalịyalị emi bá ifiebosẹ ebiye kị mịẹmịnị bara wo mọ gbaa kịmịotu pịrịmịnị yọbị, opu fomuun kị wo laaemi. Anịduonị, omịnị Jehovah Iseriotuama bara gbaa akị wo mọ fịrị wẹnịmịnị otu, wo school otu, wo ovị-otu, bá gbaa zịnịotu pịrịmụ yobị bụze kụmọ! Devil omịnị Jehovah ẹrẹ gbaa kịmịotu pịrịmịnị yọ tịẹmọ dọụmịnị. (Jer. 11:21; Rev. 12:17) Satan mọ wó ekpe bụrụ-otubo mọ kịmịotu Jehovah ẹrẹ nimi kụmọ bara kị dọụmịnị. (Jer. 23:​26, 27) Anịa, omịnị Jehovah ẹrẹ tarị wẹrịemi duonị “ifiebosẹ” omịnị bolouịmbẹlẹ bara tokoni akị wó ẹrẹ pịrịmịnị—Ps. 5:11; 89:16.

15. Jehovah ẹrẹ tịịn gbaamịnị yọmị teeki wo tuu a o?

¹⁵ Omịnị ifiebosẹ Jehovah ẹrẹ kị tịịnmịnị. (Joel 2:32; Rom. 10:​13, 14) Jehovah ẹrẹ tịịnmịnị yọmị paa ẹrẹ nimi bá gbaa kịmịotu pịrịmịnị yọ dẹịn-emi. Omịnị Ọkpọnanaowei kọkọ inyenrinmịnị bara nimi, eti akị wó atụa, wó baratụa-pịrịye kẹrịakị bá wó kekereyọ ka sẹsẹrẹmịnị. (Ps. 20:7; 99:6; 116:4; 145:18) Omịnị Jehovah ẹrẹ mo bá wó ebi inyenrinbụọbo mọ gbaa kịmịotu pịrịmịnị. Bá ámịnị boloudei wẹrị Jehovah dọụbara mịẹdá ụndụ nanamụ bara kpọ gbaa á pịrịmịnị.—Isa. 12:4; Acts 2:​21, 38.

16. Omịnị tebara ka kị Satan ekpe owei bara mịẹdia a paaemi a o?

¹⁶ Omịnị kpọ Jehovah ẹrẹ duonị ụyafịmụ bara gbinipẹlẹdẹ. (Jas. 5:​10, 11) Omịnị ụya bolou k’emi kpọ, Jehovah mọ kpẹkpẹrẹẹ emisẹ, Satan ekpe owei bara kị omịnị mọ mịẹdịamịnị. Job inyenrintimi ifiemị, Satan ekpe egberi kọn Jehovah karịmịnị otubosẹ gbaịnmọmị, ụ gbaa amọ: “Kịmị tọbọụ wó ụndụ zụọmụ yọ duonị, wó nana wẹrịemi yebosẹ gbein-koromọmịnị.” (Job 2:4) Satan gbaa amọ kịmịawọụ bụụdọọnye fa ifie bẹtịbị ka Jehovah karịmịnị, bụụdọọnye á gbele daba ámịnị Jehovah gbein-koromọmịnị. Peibolou tụa owei Job, Satan mị gbaa egberibị, ekpe egberi bara mịẹgaan paamọmị. Satan biin dadiyeama kị kọn bo kpọ, omịnị kpọ Job bara, Jehovah karịmụ yọ gbeinmọ-koromọgha fa. Omịnị Jehovah wó ẹrẹ duonị ifiebosẹ wo kekeremụ bara nimi wẹrịemi.—John 17:11.

17. Wo 1Peter 2:12 gbaabara didaba, te zịnị ụwọụ kị omịnị tokoni akị Jehovah pịrị a paaemi a o?

¹⁷ Omịnị tokoni akị Jehovah ẹrẹ pịrịmịnị bara mịẹpaamọmịnị. (Prov. 30:9; Jer. 7:​8-11) Omịnị Jehovah ẹrẹ ka tịbị-tịẹmọ wẹrịemi bá Jehovah wó ẹrẹ ka kị wo tịịn wẹrịemi duonị, wo mịẹmịnị yebo tokoni anịghakpọ weribịbị kọn Jehovah pịrị a paaemi. Omịnị kị bẹtịbị ụ tokoni bá ụ tokonigha mọ yọ, sẹlẹ angọ pịrịmịnị. (1Peter 2:12 goo.) Anịduonị, pebidá wosẹ, wó ẹrẹmịnị egberibo mọ, wo inyenrinbụọbo mọ tokoni akị Jehovah ẹrẹ pịrịmịnị bara mịẹdịa. Bịsẹbara wo mọ mịẹdaba, omịnị yalịgha kị gbaa kpọ laa tokoni akị Jehovah ẹrẹ pịrịmịnị.

18. Omịnị te zịnị ụwọụ ka kị Jehovah ẹrẹmị yelaa wo pịrịemi bara mịẹdịamịnị a o? (Footnote kpọ dii.)

¹⁸ Jehovah ẹrẹmị yelaa wo pịrị akị kịmịotu kọn wo dimọ wẹrịemi bara dẹịn-emi. (Ps. 138:2) Tetuu kị duonị bịsẹ yọmị yelaaemi a o? Omịnị Jehovah dọụ wẹrịemi yeama mịẹdaba, kịmịotu agbẹịgha bara akị wo dimịnị.a Jesus ‘bụzemụ yọ esiingha’ anịduonị kịmịotu akị ụ dimọ baramị wó a bụụdọọngha. (Heb. 12:​2-4) Ómịnị wó ịkịọụsẹ akị Jehovah dọụyọ mịẹmị.—Matt. 26:39.

19. Jehovah ẹrẹmị tebara ka kị yelaa ị́ pịrịemi a, bá tetuu a o?

¹⁹ Jehovah karịmịnị yọ mọ bá Jehovah wó ẹrẹ kọn wo tịịn yọbị opu fomuun kị wo laaemi. Anịduonị, kịmịotu agbẹịgha bara akị wo dii kpọ, Jehovah ẹrẹmị yelaa wo pịrịemi duonị, omịnị ifiebosẹ ụ tokonimịnị. Jehovah ẹrẹmị yelaa akị kịmịotu akị wo dimọ wẹrịemi bara dẹịn-emi. Satan wo penimọmịnị kị gbaa kpọ, omịnị ifiebosẹ tokoni akị Jehovah ẹrẹ pịrịmụ bara gbinipẹlẹ. Bịsẹ bara wo mọ mịẹdaba, omịnị kpọ Jesus bara Jehovah ẹrẹmị yelaa wo pịrị dẹịn-emi bara kị mịẹdịamịnị.