Jehovah Kị “Dụba-dẹịn Pọwẹị” Kọn Wo Pịrịmịnị

1-2. (a) Mị tịẹkirimị teeki biin kịmịama paamọmịnị a? (b) Omịnị mị egberitịbịmị teeki kẹrị ẹrẹtei dọụmịnị a o?

KỊMỊAMA pọwẹịmụ yọ duonị biin yeama kị mịẹmịnị. Mọabịkpọ ámịnị gesii pọwẹị nanagha. Biin kịmịama ebi paagha fa bara kị iroromịnị, anịduonị ámịnị bolouịmbẹlẹgha. Mị yemị Jehovah kịmịbo kpọ gbelemịnị. Tuubị omịnị “kunumọ ereinbo” ka timi inyenrinmịnị, bá inyenrinbụọmị “kụrọ bọlọụ dẹịnmịnị” bara wo mọ nimi wẹrịemi.—2Tim. 3:1.

² Mị egberitịbịmị, wo pọwẹị seimọ a paaemi yeama mọ, omịnị waị pọwẹị nanamụ bara mọ, wo mọ kẹrị ẹrẹteimịnị. Anịa, wo wẹrị bọlọụ gesii pọwẹị mịẹpaamọ wo pịrịmịnị yebo diitụa.

GESII PỌWẸỊ MỊẸPAAMỌ WO PỊRỊMỊNỊ YEBO

3. Jehovah tẹmẹ wẹrịemi yebo te ka kị wo tolumọ ma o? (Fotobo kpọ dii.)

³ Jehovah ifiebosẹ pọwẹịmịnị. Omịnị kpọ pọwẹịtimi kị Jehovah mọ dọụmịnị. Anịkịduonị, ómịnị kiriogboma biin nama-ama mọ ịmbẹlẹ fịyaị-ama mọ bẹbẹpaa colour-ama mọ bá zịnị ebi yeama tẹmẹ wẹrịemi. Ọkpọnanaowei kọkọ wo tarị wẹrịemi, bá omịnị pọwẹịtimi kị ómịnị mọ dọụ wẹrịemi!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Kịmịotu ụyafịmịnị bara Jehovah mọ ẹrịmịnị kpọ, teeki duonị ómịnị bịsẹ yebo bụọmọ wẹrị wó pọwẹị seimọgha a? (b) Jehovah teeki kọn wo pịrị ma o? (Psalm 16:11)

⁴ Jehovah “pọwẹị nanamịnị Ọkpọnanaowei,” bịsẹ bara kị gbaa kpọ, ómịnị akpọ ma kịmịotu fịmịnị ụyabosẹ ẹrị wẹrịemi. (1Tim. 1:11) Anịa, ómịnị bịsẹ yebo bụọmọ wó pọwẹị seimọgha. Ómịnị akpọma emi bụụdọọnyebo timi alagha fa bara nimi wẹrịemi, ómịnị á kọnsiinmụ ifie gbaa wẹrịemi. Anịduonị ómịnị etipou bara inetimi ụyafị inyenrinbụọ kọnsiinmụ ifie kị korumịnị. Bịsẹ bara kị gbaa kpọ, Jehovah mị tịẹkirimị wo paamọmịnị yebosẹ nimi wẹrịemi bá baratụa wo pịrịmịnị. Ómịnị tebara ka kị baratụa wo pịrịmịnị a o? Ómịnị pọwẹị kọn wo pịrịmịnị. (Psalm 16:11 goo.) Wo wẹrị Jehovah mị pọwẹị kọn wó Tọbọụ Jesus Christ kpọ pịrị bara diitụa.

5-6. Teeki Jesus mịẹ pọwẹịmịnị a o?

⁵ Jehovah tẹmẹ yebosẹ, Jesus kị pọwẹị dẹịn-emi. Tetuu a o? Wo wẹrị maa tuu diitụa. (1) “Ómịnị wo tọrụ ẹrịgha Ọkpọnanaowei emi bara k’emị” bá wó mịẹmịnị yesẹ ómịnị wó Daụ nana wẹrịemi inyenrinbụọbo kị dimịẹmịnị. (Col. 1:15; see “happy” study note on 1Timothy 6:15.) (2) Jesus ifiebosẹ pọwẹị mịẹpaamọmịnị Ọkpọnanaowei mọ k’emi.

⁶ Ọkpọnanaowei kọn Jesus pịrịdẹ fịrịsẹ, ómịnị pọwẹị pọwẹị bara ka kị bịsẹ fịrị wẹnịmịnị. (Prov. 8:​30, 31; John 8:29) Jesus peibolou nana yọ duonị, Jehovah ifiebosẹ bolouịmbẹlẹ ụ pịrịmị.—Matt. 3:17.

7. Omịnị tebara ka kị gesii pọwẹị nanamịnị a o?

⁷ Omịnị kpọ pọwẹị mịẹpaamọmịnị Ọkpọnanaowei mọ naịndaba, gesii pọwẹị nanamịnị. Omịnị ifie mịẹpaamọ Jehovah tolumọ nimi bá ụ dimịẹdaba, bịsẹ yọmị wo mịẹ pọwẹịmịnị. Omịnị Ọkpọnanaowei dọụ yọ mịẹ, bá wo wẹnịmịnị fịrịbị ụ mịẹ bolouịmbẹlẹmịnị bara nimidaba, bịsẹ yọmị wo kpọ mịẹ pọwẹị nanamịnị.a (Ps. 33:12) Anịa omịnị zụa ifieama pọwẹịghaba, Ọkpọnanaowei ba bolouịmbẹlẹ wo pịrịgha bara kị mịẹdịamịnị a? Benebene bịsẹ baragha! Mị akpọmị zụa ifieama omịnị dọọn naa, eneni kẹrị, bá pọwẹịgha ifieama paamịnị bara Jehovah mọ nimi wẹrịemi. (Ps. 103:14) Wo wẹrị, wo pọwẹị nanamụ yọ seimọ a paaemi yeama mọ, bá baratụa wo pịrịwẹrị waị pọwẹị nana a paaemi yeama kị wo mọ kẹrị ẹrẹteimịnị.

KẸNỊYE KPỌ BỤỌMỌ INÉ PỌWẸỊ NANAMỊNỊ YỌ SEIMỌ KỤMỌ

8. Akpọma paamịnị bụụdọọnyebo tebara ka kị wo gbeleimịnị a o?

⁸ Pọwẹị seimọ a paaemi ye #No. 1: Akpọ bụụdọọnyeama. Ị́mịnị kpọ penimọye, vurudu paamịnị akpotu, ịngo, dọọn, bá okosu bụụdọọnye pịrị ụyamọmịnị a? Bei yebo wo paamọdaba, omịnị mịẹmụ bara nimighasẹ wo pọwẹị seimọ a paaemi. Bible mị wo adụdụmị bolouịmbẹlẹghasẹ wo nana wẹrịemi pọwẹị seimọ a paaemi bara gbaa wẹrịemi. (Prov. 15:13) Babis, tịịnmịnị itu-kosuowei, nia kụraị ovuru kị ụ daụ mọ yin mọ fịị bá wó bịnaowei kpọ fịịmị, ụ gbaamị: Ịmịnị bẹtịbị k’emi, bá barịị kịmị kpọ fa bara kị iroromị. Zụa ifieama, ịmịnị ebi ifie akị ine bịnaowei mọ, bá ị daụ mọ yin mọ inyenringha timi á pịrị fịị yọmị ị dọọn kụrọmọmịnị. Akpọ bụụdọọnyebo zụa ifieama wo mịẹ suusụọ kụrọmọmịnị.

9. Teeki baratụa wo pịrịwẹrị waị pọwẹị nana a paaemi a o? (Jeremiah 29:​4-7, 10)

⁹ Teeeki baratụa wo pịrịwẹrị waị pọwẹị nanamịnị a o? Wo nana wẹrịemi yebo wo a tọrụ-kẹrịdaba, wo mịẹ pọwẹị nanamịnị. Akpọmị, omịnị wo dọụ wẹrịemi yebosẹ nana dẹkị pọwẹị nana a paaemi bara kị gbaamịnị. Anịa ánị ekpe egberi. Gbaamaba, Jehovah gbaa akị kẹrịakị wẹrị Babylon amú Jew-otubo pịrị amọ, ámịnị zịnị ibe bá kụrọ inyenrinbụọ kị á laamịnị kpọ, ámịnị ánị emiyọ ma pọwẹị nanamịnị bara gbaamị. (Jeremiah 29:​4-7, 10 goo.) Jehovah mị gbaa egberimị, omịnị teeki tolumọ akị ma o? Tịẹkirima iné ụndụ bọọ paamịnị ebi yebo dọụ ẹrịdá kọn pọwẹị nana. Ukie, Jehovah baratụa ị́ pịrịmịnị, ómịnị ị́ gbeinmọ-koromọgha fa. (Ps. 63:7; 146:5) Effie, tịịnmịnị araụ accident a sụọ wẹrị ba laa wẹnịgha ifiemị, á gbaamị: “Jehovah mọ, ine warị-otubo mọ, bá itu mọ opu bara ka baratụa ị pịrịmị. Anịduonị, ịmịnị suusụọdaba, á mịẹ ị pịrịmịnị yebo ine a tọrụkẹrịgha bara kị paadẹ bara ịmọ iroromị. Ịmịnị tọrụkẹrịyọ mịẹ Jehovah mọ, bá bịnaotubo dịamụ bara tọnpẹlẹmị.”

10. Bụụdọọnyeama kị wo laamịnị kị gbaa kpọ, tetuu kị duonị omịnị mọkpọ pọwẹị nanamịnị a o?

¹⁰ Bụụdọọnyeama wo laa bá wo warị-otuama kị laa kpọ, omịnị mọkpọ pọwẹịtimi a paaemi.b (Ps. 126:5) Tetuu a o? Wo bolouịmbẹlẹ yọmị wo laamịnị bụụdọọnyeama duo bogha. Maria, kẹnị ụwọụpẹlẹ fịrị wẹnịmịnị bịnaraụ, gbaamị: “Bụụdọọnyeama wo laadaba, omịnị mọkpọ pọwẹịmịnị, tuubị omịnị Jehovah kikoromọ wẹrịemi yebo baragha bara kị mịẹdịamịnị. Bịsẹ bara gbaadẹ duonị bụụdọọnye wo laadaba, omịnị yougha anịghakpọ yemị wo dọọn-emi bara mịẹdịagha bara fa. Mọabịkpọ, wo daụ Jehovah baratụa wo pịrịwẹrị pọwẹị nanamịnị.” Ukie, inyenrinbụọ kị kụrọ-emi kị gbaa kpọ, bei yebosẹ alaghatimi bụọmịnị—beniaka emi owun agọnọ ị́mọ duo wẹnịdaba, adaịwaịnbo iné wẹnị bụọbo suru siinmịnị bara kị, wo laamịnị bụụdọọnyebo kpọ alaghatimi Ọkpọnanaowei a suru siinmịnị.

11. Fịrịmọpaa-owei Paul mịẹdịa yemị tebara ka kị ị́ kụrọmọ ma o?

¹¹ Bụụdọọnyeama wo paamọdaba, Jehovah ba pọwẹị wo pịrịgha bara wo mọ iroro kpọ paaemi. Omịnị bịsẹ bara iroromịnị ifiesẹ, bụụdọọnye wo laadaba, peibolou nana bara kọn Jehovah karị otuama kẹrị ukie. Wo wẹrị fịrịmọpaa-owei Paul mịẹdịaye diitụa. Jesus kị ụ sẹlẹ wẹrị mú egberigbaa “ibe-ama mọ, pẹrẹ-ama mọ, bá Israel otubo mọ pịrịmị.” (Acts 9:15) Anị opu fomuun ka paaemi! Mọabịkpọ, biin bụụdọọnyeama kị fịrịmọpaa-owei Paul laamị. (2Cor. 11:​23-27) Bịsẹ bụụdọọnyebo duonị Jehovah ba pọwẹị ụ pịrịgha bara kị Paul mọ iroro ma? Benebene! Wó ye-ine yọmị, Jehovah baratụa ụ pịrịtimi bara mịẹgaanmị. (Rom. 5:​3-5) Wẹrị ị́ paamọmịnị bụụdọọnyebo kẹrị iroro dii. Biin bụụdọọnyeama kị ị́mọ nana wẹrịemi kpọ, ị́mịnị pẹlẹgha bara Jehovah karị bọlọụ a múmịnị. Bịsẹ yọmị Jehovah baratụa ị́ pịrịmịnị bá pọwẹị ị́ pịrịmịnị bara kị mịẹdịa wẹrịemi.

12. Tọn wẹrị bara paagha yọmị tebara ka kị wo pọwẹịmịnị yọ seimọ a paaemi a o?

¹² Pọwẹị seimọ a paaemi ye #No. 2: Ye iné tọn wẹrị bara paagha ifiesẹ. (Prov. 13:12) Omịnị Jehovah tarị, ba ụ mịẹ wo pịrịmịnị yebo wo a tọrụkẹrịemi duonị, ụ karịmịnị yọmị mịẹmụ yeama tọnpẹlẹ angọ pịrịmịnị. Anịa, bụụdọọnyeama duonị omịnị laa wo tọn angọ pịrị yebo mịẹ beinmọgha ifiesẹ, omịnị suusụọ a paaemi. (Prov. 17:22) Holly tịịnmịnị ụwọụpẹlẹ fịrị wẹnịmịnị bịnaraụ gbaamị: “Ịmịnị School for Kingdom Evangelizers ámú wẹrị zịnị ibe a egberigbaa fịrị wẹnị anịghakpọ Ramapo warị kẹrị fịrịma múmịnị bara tọn angọ pịrịmị. Anịa, ine ụndụbị dei yọama paamị, anịduonị ine mịẹmụ tọnpẹlẹ wẹrị yebo, ịmịnị ba laa mịẹ beinmọgha. Bịsẹ yọmị dọlọ kpọ ị mịẹ pọwẹịgha. Ị́mịnị biin mịẹmụ yeama tọn angọ pịrịwẹrị, laa kẹnị kpọ mịẹ beinmọgha ifiesẹ, ị mịẹ suusụọ a paaemi.” Biin kịmịama kpọ bịsẹ bara kị gbaamị.

13. Bụụdọọnyeama k’emi kị gbaa kpọ, omịnị laa te yeama kị mịẹ a paaemi a o?

¹³ Teeeki baratụa wo pịrịwẹrị waị pọwẹị nanamịnị a o? Jehovah biin yeama akị wo bara biigha. Bá wo laa mịẹgha fa yeama kpọ kọn wo bara á biigha; omịnị wo kụrọyọsẹ akị Jehovah fịrị wẹnịmịnị yọkị, wo mịẹ Jehovah tọrụyọma yelaa kịmịama. Omịnị wo laa mịẹmụ yọsẹ mịe, bá gerede bara akị ụ karị kị Jehovah mọ dọụmịnị. (Mic. 6:8; 1Cor. 4:2) Ómịnị wo adụdụbo emi bara kị ditụamịnị. Jehovah kọn wo a dọụ wẹrịemi bara dẹịn bara omịnị mọ kọn wo angọbo dii agbẹị-emi a o?c Benebene! Anịduonị, bụụdọọnyeama ị́ bụọmọ wẹrị iné mịẹmụ tọn angọ pịrịwẹrị yebo mịẹ beinmọgha kpọ, iné laa mịẹ a paaemi yebo kẹrị iroro. Ị́mịnị laa ebi mịẹdịaye a paa asịyaịpesiama pịrị a paaemi a anịghakpọ baratụa okosudẹ otu kụrọmọ a paaemi a? Ị́mịnị kịmị warị amú kịmị kụrọmọ bá phone kọn ụbọ tịịn anịghakpọ text message fịrịmọ ụbọ kụrọmọ a paaemi a? Ị́ bịsẹ bara mịẹdaba Jehovah pọwẹị ị́ pịrịmịnị, ị́mịnị kpo pọwẹị nanamịnị! Ukie ayakpọ laadaba, iné laa mịẹmụ tọngha wẹrị fịrịama kị ị́mịnị mọ wẹnị Jehovah pịrịmịnị! Holly, bọlọụ anga ma tịịn wẹrịemi bịnaraụma, gbaamị: “Ịmịnị suusụọmịnị ifiesẹ, ‘ịmịnị inyenrintimi bẹseri bẹseri laamịnị bara kọn ine angọ ukiemọmịnị.’ Ayakpọ laadaba Jehovah baratụa ị pịrị wẹrịemisẹ, ịmịnị laa ine mịẹmụ tọnpẹlẹdẹ yebosẹ mịẹ beinmọmịnị bara ịmọ nimi wẹrịemi.”

14. Te zịnị ye kị wo pọwẹị seimọ a paaemi a o?

¹⁴ Pọwẹị seimọ a paaemi ye #No. 3: Angọ mịẹ ganagana yeama. Zụaotu angọ mịẹ ganaganamịnị yọkị gesii pọwẹị akị kịmị pịrịmịnị bara ka kị internet bọọ mịẹdịamịnị. Anịduonị zụaotu zoru tei, yeama fẹị, bá yọụpaamịnị yọkị ka kị bọlọụdaa bara ka kị kịmịotu kụrọmọmịnị. Anịa bịsẹ yebo akị pọwẹị nanamụ yọmị seigha. Jehovah omịnị wó tẹmẹ wẹrịemị ebi yebo kọn pọwẹị nanamụ bara ka kị wo tẹmẹ wẹrịemi. Biin kịmịama, á mịẹ pọwẹịmọmụ bara tọn wẹrị yebo gesii pọwẹị akị á pịrịgha bara dọụ ẹrịdẹ. Eva tịịnmịnị ụwọụpẹlẹ fịrị wẹnịmịnị bịnaraụ, gbaamị, “Ị́mịnị ifiebosẹ iné angọ mịẹ pọwẹịmọmụ yọkị dọụdaba, ị́mịnị biribeingha fa.” Anịduonị ị́mịnị iné angọ mịẹ ganaganamụ yọ ka kị iné ụndụ ma bọlọụdaa-daba, ị́mịnị pọwẹịgha fa ị́mịnị bo fee kị pamịnị.

15. Omịnị ibe-daaowei Solomon duo teeki tolumọ akị ma o?

¹⁵ Ibe-daaowei Solomon angọ mịẹ ganaganamụ yọ duonị, ebi fịyaị fị, ịmbẹlẹ duma-ama pei bá sịlị akị fẹị a paaemi yesẹ fẹịtimimị. Anịa bịsẹ yebo wó a biribeingha bara ụ mọ dọụ ẹrịmị. Anịkịduonị ómịnị gbaamị: “Tọrụ ẹrịmịnị yebo biribeingha fa; beri a naamịnị yebo kpọ biribeingha fa.” (Eccl. 1:8; 2:​1-11) Akpọ duo bomịnị angọ mịẹ gana-ganamịnị yebo pọwẹị akị kịmị pịrịmịnị bara k’emi, anịa gesii pọwẹị akị kịmị pịrịgha.

16. Tebara kị baratụa zịnịotu pịrịmịnị yọmị wo mịẹ pọwẹị nanamịnị a o? (Fotobo kpọ dii.)

¹⁶ Teeeki baratụa wo pịrịwẹrị waị pọwẹị nanamịnị a o? Jesus wo tolumọ amọ “ye akị kịmị pịrịmị ụbọmị pọwẹị nana akị kẹrị akịmịnị ụbọ dẹịn-emi.” (Acts 20:35) Alekos tịịnmịnị itu-kosuowei gbaa ámọ: “Ịmịnị kala kala yeama mịẹ zịnịotu pịrịmị. Bịsẹ yebo ịmọ mịẹ á pịrịmịnịmị, ịmịnị ine bẹtịbị angọ dọụemi yebo kẹrị irorogha, bịsẹ yọmị ị mịẹ pọwẹịmị.” Ị́mịnị teeki mịẹ zịnịotu pịrị a paaemi a o? Kịmị bụụdọọnye laa-emisẹ, ị́mịnị ụbọ kụrọmọ a paaemi. Ị́mịnị laa ụbọ bụụdọọnye kọnsiingha kpọ paaemi, ánịa ụbọmị wó a bụụdọọnmịnị yebo gbaamịnị ifiemị, ị́mịnị dineni nana bara ebibara ụ pei bá ómịnị wó bụụdọọnyebo gbaa Jehovah pịrị bara akị ụbọ kụrọmọ. (Ps. 55:22; 68:19) Jehovah naa ụ gbeinmọ-koromọgha bara akị ụbọ kụrọmọ. (Ps. 37:28; Isa. 59:1) Ị́mịnị laa ụbọ warị bọọ mụ́wẹrị fịyaị tụọ, beni zuu, bịdẹ pọụ, bá ụ mọ mó wẹnị tei kpọ paaemi. Ị́mịnị ụbọ tịịn ị́mọ mọ́ egberigbaayọ amú kpọ paaemi, bịsẹ yọmị ụ kụrọmọmịnị. Jehovah bụọmọ ị́ kọn fịrị wẹnị zịnịotu pịrị. Omịnị wo ifie kọn baratụa zịnịotu pịrịdaba, bịsẹ yọmị gesii pọwẹị akị wo pịrịmịnị!—Prov. 11:25.

17. Omịnị pọwẹịtimi dọụmịnịsẹ, teeki mịẹmịnị a o? (Psalm 43:4)

¹⁷ Omịnị wo agọnọ Daụ mọ naịn-mịnịmị, gesii pọwẹị nana dẹịn-mịnị. Bible Jehovah kị “dụbadẹịn pọwẹị” akị wo pịrịmịnị bara gbaa wẹrịemi (Psalm 43:4 goo.) Anịduonị, omịnị bụụdọọn yeama kị nana wẹrịemi kpọ, malafa kụmọ. Pebidá wosẹ Jehovah, dụụ fa pọwẹị akị wo pịrịmịnị owei ka kị, wo ụndụ bọọ a bọlọụdaa!—Ps. 144:15.