Peibolou Dadiye Asụọmị

Abraham wó tọbọụ Isaac tolumọwẹrị Jehovah tarịmị, bá peibolou akị Jehovah kikoromọ wẹrịemi yebosẹ a tụamị. Isaac 25 kụraị baịdẹ mị, Jehovah Abraham fịrịmọ kẹnị kụrọye mịẹmị. Jehovah te ka kị ụ fịrịmọ ma o?

Ọkpọnanaowei gbaa Abraham pịrịmị: ‘Sisei iné kpé-kẹnị owei-tọbọụ mị akị mú Moriah ogun-agọnọ bọọ ịkịan-kụn ị pịrị.’ Jehovah bịsẹ ye gbaa ụ pịrị tuumị, Abraham mọ nimigha. Mọabịkpọ, Abraham Jehovah gbaa bara kị mịẹmị.

Erein baị bị, Abraham, Isaac mọ bá maa odubo-otubo mọ akị wẹrị Moriah a múmị. Tara dein bụọmị, ámịnị alaayọ duo Moriah ogun-agọnọ bị ẹrịmị. Abraham wó odubo-otubo bịị wẹrị timi a koromị. Abraham mọ Isaac mọ kị ogun-agọnọ bọọ ịkịan-kụn yọ a múmị. Abraham fẹnị-ama akị Isaac pịrị sibemị, ómịnị bá adẹịn sibemị. Isaac wó daụ biimị: ‘Wo akị ịkịan-kụn dọụmịnị nama bị, te yọ ka emi a?’ Abraham ụ parụmị: ‘Ine tọbọụ, Jehovah nama mịẹpaamọ mịnị.’

Ámịnị mú ogun-agọnọ laa ifiebị, ámịnị kẹnị tana kẹrịmị. Abraham, Isaac barabo mọ bụọbo mọ kịkaịwẹrị Isaac kọn tana agọnọ bọọ gbanamị.

Abraham adẹịn serimọ uwoumọmịnị ifiebị, Jehovah angel-owei agọnọ duo gbaamị: ‘Abraham! Tọbọụ gbelekụmọ! Ị́mịnị iné tọbọụ kpọ akị ịkịan-kụn Ọkpọnanaowei pịrị dọụtimi yọmị, ị́mịnị kọkọ peibolou nana wẹrịemi bara ịmịnị mọ ẹrịdẹ.’ Abraham kẹnị owei-anịna bou bolou bọọ emi bara ẹrịmị. Ómịnị kịalị Isaac barabo mọ bụọbo mọ kpụkpọ wẹrị owei-anịna ka kị ịkịan-kụnmị.

Bịsẹ erein duobomị, Jehovah, Abraham akị wó ikie-owei kị tịịnmị. Jehovah Abraham akị wó ikie-owei tịịn tuumị ị́ mọ nimimị? Jehovah gbaadẹ yesẹ Abraham mọ mịẹmị, Jehovah ụ fịrịmọmịnị tuu kị Abraham mọ nimigha kpọ, ómịnị Jehovah gbaa bara kị mịẹmị.

Jehovah waị wó kikoromọ akị Abraham pịrịwẹrị yemị waị gbaa ụ pịrịmị: ‘Ịmịnị tarịama akị ị́ pịrị mịnị, bá biin awọụama kpọ akị ị́ pịrị mịnị.’ Bịsẹ yebị Jehovah Abraham duotolu a tarịama akị kịrịịye mịẹmịnị otubosẹ pịrị mịnị bara kị mịẹdịamị.