Jerusalem Gbeingọgọlọdẹ

Judah-otubo barịị barịị, Jehovah a barasinwẹrị oruama karịmị. Jehovah biin kụraịama ka kị á barịmị. Ómịnị biin bụrụ-otuama fịrịmọ mú berifaanye kọn á pịrịmị. Anịa ámịnị bụrụ-otubo peigha. Á peimụ bara dii a, ámịnị bụrụ-otubo yẹkwẹ kị yẹkwẹmị. Jehovah tebara ka kị ánị oru karị inyenrinbụọ tịẹmọ ma o?

Nebuchadnezzar kị Babylon pẹrẹ mị, ómịnị ibe duo mú ibe laasẹ kị dẹịnmọ timi mị. Ómịnị bọlọụ Jerusalem dẹịnmọ ifiemị, ómịnị Pẹrẹ Jehoiachin, okosu-otubo, soldier-otubo, bá bara-fịrị wẹnịmịnị otubo kpọ kẹrị-akị Babylon a múmị. Ómịnị Jehovah karịwarị bọọ timi yelaa yebo kpọ sibe-akịmị. Bịsẹ yọ bụọdẹ ifiemị, Nebuchadnezzar Zedekiah kọn Judah ibe daa-owei a tụamị.

Bọlọụ ifiemị, Zedekiah Nebuchadnezzar gbaa bara kị dimịẹ timi mị. Anịa á mọ mọ́ naịn-emi ibebo mọ bá ikpe bụrụ-otubo mọ sei tolumọbịbị akị Zedekiah pịrịmị. Ómịnị tịbịkụrọ akị Nebuchadnezzar pịrị bara ámịnị mọ gbaamị. Jeremiah berifaanye akị ụ pịrịmị. Ụ gbaamị: ‘Ị́mịnị tịbịkụrọ ụ pịrịdaba, Judah ibe mị, mọụn koromịnị, kịmịotu fịịmịnị, bá dọọn kpọ paamịnị.’

Zedekiah daatimi nigina (8) kụraị baị ifiemị, ómịnị tịbịkụrọ Nebuchadnezzar pịrịmị. Ómịnị Egypt otu baratụa-pịrịye biimị. Anịa Nebuchadnezzar wó soldier-otubo fịrịmọ mú Jerusalem tụayọrọmị. Jeremiah gbaa Zedekiah pịrịmị: ‘Jehovah gbaa amọ ị́mịnị tịbị-iyerimọ Babylon pịrịdaba, ị́ mọ ama mọ zụọbụọmọye nanamịnị. Anịa ị́ bụọghaba, Babylon-otubo Jerusalem ịyọụnmọ bá ị́ kọn ikoliwarị a múmịnị.’ Zedekiah gbaamị: ‘Ịmịnị bụọgha fa!’

Kẹnị kụraị mọ ikisẹ mọ bụọ ifiemị, Babylon soldier-otubo Jerusalem akpakpabo pẹị bá fẹnị akị ama ịyọụnmọmị. Ámịnị karịwarị ịyọụnmọ, biin kịmịama baa, bá biin kịmịama kọn ikoliwarị a múmị.

Zedekiah Jerusalem duo baịntẹịmị, anịa Babylon-otubo ụ pimọ anịghakpọ ụ dugo-baịnmị. Ámịnị Jericho mọ naịn yọ ka ụ kẹrịwẹrị ụ kọn Nebuchadnezzar yarịmị. Babylon pẹrẹ bị Zedekiah tọrụyọ ka Zedekiah awọụbo baamị. Bịsẹ yọ bụọdẹmị, Nebuchadnezzar Zedekiah tọrụbo mịẹ baanmọmị. Bá ụ kọn ikoliwarị a kaịmị. Ómịnị bịsẹ yọ ka timi fịịmị. Anịa Jehovah kikoromọ akị Judah-otubo pịrịmị: ‘Ịmịnị waị á kọn Jerusalem a bomịnị, 70 Kụraị-ama bụọdaba.’

Teeki á kẹrị-akị Babylon bọọ mú asịyaị-pesibo paamọmịnị a o? Ámịnị mọkpọ Jehovah karịmịnị a?